Read Toraja-Sa'dan RUT 2 Bible Online

RUT 2 - Toraja-Sa'dan bible

RUT 2

¹Iatu Naomi den misa’ rampeananna, misa’ to sugi’ kapua, dio mai pa’rapuanna Elimelekh, disanga Boas.

²Ma’kadami tu Rut, to Moab, lako Naomi nakua: Melo ke malena’ lako bela’ angku ruruk buli dalle sisikan dio boko’na to ungkaturu-turuina’. Ma’kadami tu Naomi lako nakua: Malemoko, e anakku.

³Malemi anna rampo lako bela’, narurukki tu buli dalle sisikan dio boko’na to massasa’ dalle sisikan; siappa’mi rampo lako sangtempe’ bela’na Boas, tu dio mai pa’rapuanna Elimelekh.

⁴Ta’kala saemi tu Boas dio mai Betlehem, nama’kada lako to massasa’ dalle sisikan, nakua: Narondongmorokomi PUANG! Mebalimi tu tau iato mai lako nakua: Napamasakke-sakkemorokomi PUANG!

⁵Ma’kadami Boas lako taunna tu umbandoro’i to massasa’ dalle sisikan, nakua: Mindara nanii torro te baine mangura?

⁶Mebalimi tu taunna, tu umbandoro’i to massasa’ dalle sisikan, nakua: Iamote tu misa’ baine mangura lu dio mai Moab, tu sae sola Naomi dio mai padang marantena Moab.

⁷Nakua ma’kada: Ma’dinra’ka urruruk sia urrampun buli dalle sisikan sikandappi’ pa’kutu’ dio lu boko’na to massasa’ dalle sisikan. Susimoto anna sae inde te sia mukkun bang randuk dio mai melambi’na sae lako totemo; iamo misa’ tau tu tae’ naunno’ko’ len dio lu banua.

⁸Ma’kadami Boas lako Rut nakua: Perangii meloi, e anakku, da mumale mangruruk lako bela’ senga’ sia da duka mumallai inde te; sirondong bangmoko baine to mengkarangku.

⁹Mutiromo tu bela’ dio tingayomu, tu nanii tau massasa’ dalle sisikan — undi bangmoko dio boko’na tu mai baine. Inang mangkamo kugagai tu mintu’ taungku, kumua da nasussaiko. Iake ma’rangko, maleko lako to’ busso ammu iru’i tu apa natimba tau iato mai.

¹⁰Tukkumi tu Rut menomba rokko padang anna ma’kada lako nakua: Ma’apai mipa’pekitananni tu kamaturu-turuammi lako kaleku, miurunganni untirona’, moi angku misa’ to sae?

¹¹Mebalimi tu Boas lako nakua: Napokada nasangmo tau lako kaleku tu mintu’ apa mangka mupogau’ lako matusammu to mangkanna mate tu muanemu, sia umba mukua untampe ambe’mu sia indo’mu sia tondok kadadiammu, ammu male lako misa’ bangsa, tu tae’pa mutandai dolona.

¹²Na PUANGmora umpapakkanni lako kalemu tu penggaurammu, sia nasundunmora tu rongko’mu dio mai PUANG, Kapenombanna to Israel, tu diong pani’Na munii sae mentiongan.

¹³Ma’kadami tu Rut nakua: Napa’pekitanan tonganmo puangku lako kaleku tu kamaturu-turuanna, belanna mipakatanamo’ sia ma’kada melokomi lako te taummi, moi anna tae’ kupada susi misa’i tu mintu’ taummi.

¹⁴Iatonna attu kakumandean ma’kadami Boas lako, nakua: Maiko inde te mukande roti sia otonni tama sukka tu apa la musuak. Unno’ko’mi tu Rut dio sa’dena to massasa’ dalle sisikan, anna tadoanni Boas pa’sara’buk, anna kandei sadia’na, sia nasesapa.

¹⁵Iatonna ke’de’omo la mangruruk, mepasanmi tu Boas lako mintu’ taunna, nakua: Ma’din duka sia mangruruk lan lu to’ alla’ pa’kutu’ sia da mirosoi;

¹⁶sangadinna la miangga’i usseranganni sisidi’ lako kalena tu pa’kutu’, ammi tampei, narurukki, da misarabai lenni.

¹⁷Mangruruk bangmi tu Rut dio bela’ iato sae lako makaroenna, nabamba-bambami tu apa naruruk, den sangepa dalle sisikan.

¹⁸Naalami namale tama kota. Iatonna tiromi matusanna tu apa naruruk, sia iatonna bungka’mi sia naben tu apa nasesa tonna dia’mo,

¹⁹ma’kadami tu matusanna lako, nakua: Umbara munii mangruruk te allo iate sia umbara munii mengkarang? Namaupa’mora tu to untiroko! Nauleleanmi lako matusanna tu naninna mengkarang, nakua: Iatu to kunii mengkarang allo iate disanga Boas.

²⁰Ma’kadami Naomi lako minintunna, nakua: Napamasakke-sakkemira PUANG tu tau iato, tu tang undampa kamasokananNa lako to tuo sia to matemo. Sia nakuapa Naomi lako: Iatu tau iato, sangdadianta sia ia duka misa’ to mangla’bakta.

²¹Ma’kadami tu Rut, to Moab, nakua: Sia nakuapa tu tau iato ungkuanna’: Mareke’ bangko lako taungku sae lako mutu’na tu mintu’ bela’ku dialai.

²²Ma’kadami tu Naomi lako Rut, minintunna, nakua: Melo, e anakku, ke tassu’ko sola baine to sumarona Boaz, da nasussaiko to dio lu bela’ senga’.

²³Susimoto mareke’ bangmi lako baine to sumarona Boas mangruruk sae lako mutu’na tau medalle sisikan sia megandung. Torro bangmi sola matusanna.