Read Toraja-Sa'dan RUT 3 Bible Online

RUT 3 - Toraja-Sa'dan bible

RUT 3

¹Mangkato ma’kadami Naomi, matusanna, nakua lako: E anakku, ma’apai angku tang la undakarangko kamanamanan, ammu maupa’?

²Tang sangdadiantaraka tu Boas, tu musisolan bang tu mai baine to sumarona? Manassa bongi iate la unta’pii dalle sisikan dio to’ panglulluran.

³Iamoto mendio’moko, ammu minna’i pandere’ tu kalemu sia ma’pakeammoko, ammu male rokko to’ panglulluran. Apa da naissan lenko Boaz, ke tae’pi napura kumande sia mangiru’.

⁴Ianna umbambangammo kalena, la mutiro melo tu naninna mamma’; ammu male urreke’i lako, mubungka’i tu parramba’ diong to’ lentekna, ammu bambangan kalemu diong. Attu iato la napokadangko tu apa sipatu la mupogau’.

⁵Ma’kadami Rut lako nakua: Mintu’ tu mipasananna’ la kupogau’.

⁶Malemi rokko to’ panglulluran, napogau’i tu mintu’ apa napasananni matusanna.

⁷Iatonna mangkamo tu Boas kumande sia mangiru’ sia parannumo tu penaanna, malemi umbambangan kalena dio to’ garonto’ patuku. Napela’-pela’mi tu Rut sae, nabungka’i tu parramba’ diong to’ lentekna, anna mamma’ dio.

⁸Iatonna ma’tangngamo bongi, pakalan tirambanmi tu Boaz, nakaka’i tiku lao, manassa den misa’ baine mamma’ diong to’ lentekna.

⁹Mekutanami nakua: Mindarako? Mebalimi nakua: Akumo Rut, tu taummi: balla’i tu pani’mi dao te taummi, belanna kamumo tu to mangla’bak.

¹⁰Ma’kadami tu Boaz nakua: Napamasakke-sakkemoroko PUANG, e anakku, iatu pa’kaboro’mu tu mupasombo undinna mandu mala’bi’ na iatu dolona, belanna tang untuntunko to mangura, ba’tu to sugi’, ba’tu to bongko.

¹¹Iamoto, e anakku, da mumataku’; mintu’ tu mupokada la kupogaurangko; belanna iatu mai bangsaku dio babangan unnissanni kumua misa’ko baine lambu’.

¹²Iate aku tongannamo aku to mangla’bak, apa denpa misa’ to mangla’bak mandu marengke’ na aku.

¹³Torromoko ma’bongi indete; masiangpa, ke morai siai la ulla’bakko, melo ke nala’bakko, apa iake tang naalai penaanna ulla’bakko, la lelukraka tuoNa PUANG, manassa la kula’bakko. Mamma’ bangmoko sae lako masiangna.

¹⁴Mamma’ bangmi diong to’ lentekna sae lako masiangna; millikmi tonna la sisarakmo masiang, belanna ma’kada tu Boas nakua: Da naissanni tau kumua den baine sae lako to’ panglulluran.

¹⁵Sia ma’kadapa nakua: Baai mai tu lullungmu ammu patadoi. Napatadomi. Nasuka’mi annan bakku’ tu dalle sisikan, anna parokkoi. Malemi tu Boas lako kota.

¹⁶Rampomi tu Rut lako matusanna, anna ma’kada tu matusanna lako nakua: Ma’patumbamoroko, e anakku? Nauleleanmi lako tu mintu’ apa napogau’ muane iato lako kalena,

¹⁷anna ma’kada nakua: Pennannan bakku’ te dalle sisikan nabenna’, belanna nakua: Da musule lo’bang lako matusammu.

¹⁸Ma’kadami tu Naomi nakua: Kappa bangmoko ma’peagi, e anakku, sae lako muranginna, umba nakua dadinna te apa iate; belanna iatu tau iato tae’ narapa’, ke tae’pi naupu’ te apa iate lan allo ia bangsiamote.