Read Toraja-Sa'dan RUT 4 Bible Online

RUT 4 - Toraja-Sa'dan bible

RUT 4

¹Attu iato malemi tu Boas lako babangan, anna unno’ko’ dio. Siappa’ attu iato lendu’mi tu to mangla’bak tu napokada Boas. Ma’kadami nakua: E sangmane, lempangko mai sattu’ ammu unno’ko’ inde te. Lempangmi anna unno’ko’ dio.

²Natambaimi tu tau sangpulo dio mai pekaamberan lan kota, anna ma’kada nakua: Unno’ko’komi indete. Unno’ko’mi tu tau iato.

³Attu iato ma’kadami lako to mangla’bak nakua: Iatu Naomi, tu sule dio mai padang marantena Moab, la umbaluk sangtempe’ bela’, tu apanna siulu’ta Elimelekh.

⁴Kusanga melo, iamoto angku somboangko, kumua: Melo ke muallii tu bela’ iato dio tingayona te to unno’ko’ inde sia pekaamberanna bangsata. Iammu la ulla’bakki, la’bakmi; apa iake tae’i mumorai ulla’bakki, pokadanna’, angku issanni, belanna tae’ misa’ tau la ulla’bakki sangadinna iko, namane aku. Mebalimi tu tau iato nakua: Akumo la ulla’bakki.

⁵Apa ma’kada tu Boas nakua: Iammu allimi tu bela’ iato dio mai Naomi, la mutarima duka tu Rut, to Moab, bainena tu to mate iato, ammu patontongi tu sanganna tu to mate iato diona taa mana’na.

⁶Ma’kadami tu to mangla’bak iato nakua: Iake susito tang kubela ulla’bakki, belanna la ussanggang kalenana’ mana’ku. Kamu bangmo ulla’bakki tu apa sipatu la kula’bak, belanna tae’ kubelai ulla’bakki.

⁷Dolo-dolona iatu ada’ dio lu to Israel, ianna mangla’bak ba’tu umpasituka’ apa, kumua la untonganni tu apa iato, iatu misa’ ullossokki sepatunna anna benni solana. Susimoto dinii umpamanda’i tu apa iato dio lu to Israel.

⁸Ma’kadami tu to mangla’bak lako Boas, nakua: Melo ke kamumo unnallii tu bela’ iato. Nalossokkimi tu sepatunna.

⁹Mangkato ma’kadami tu Boas lako mintu’ pekaamberan sia lako mintu’ to buda, nakua: Allo iate kamumo sola nasang titanan sa’bi, kumua iatu mintu’ apanna Elimelekh sia iatu mintu’ apanna Kilyon sia Mahlon kuallimo dio mai Naomi;

¹⁰sia ia duka tu Rut, to Moab, bainena Mahlon kutarimamo angku pobainei, la umpatontongi tu sanganna to mate iato diona mana’na. Susimoto tu sanganna to mate iato tang la ka’tu dio mai mintu’ siulu’na sia dio mai babangan nanii ma’tondok. Kamumo tu la titanan sa’bi.

¹¹Ma’kadami mintu’ to buda tu dio babangan iato sia mintu’ pekaamberan, nakua: Kamimo sola nasang tu titanan sa’bi. Na PUANGmora umpasusi Rahel sia Lea tu baine tama banuammi, tu mangkamo umbangun tongkonanna to Israel! La batta’komi lan mintu’ penggaurammi dio Efrata sia la umpalayukkomi sangammi lan Betlehem.

¹²Na iatu tongkonammi la susi tongkonanna Perez, anakna Tamar, tu napadadian Yehuda, tete dio bati’ Nakamaseangkomi PUANG, la nadadian baine mangura iate!

¹³Attu iato naalami Boas tu Rut napobainei, anna sangampa’ sola. Nakamasei PUANG anna ma’tambuk, nadadian misa’ pia muane.

¹⁴Attu iato ma’kadami tu mintu’ baine lako Naomi nakua: Mintu’ kadipudian lu lako PUANG, tu tang umpadapai dio mai kalemi tu misa’ to mangla’bak; natarompo’mora tu sanganna dio lu to Israel.

¹⁵Na iamo la umpakatana penaammi sia undaranaikomi lan kamatuammi, belanna minintummi undadianni, tu ungkamaseikomi, tu mandu losong lako kalemi na iatu pitu pia muane.

¹⁶Naalami Naomi tu pia iato nariai na ia dadi to mantaranakna.

¹⁷Nasangaimi baine sangbanuanna, nakua: Dadimo misa’ pia muane dio Naomi; nasangaimi tu pia iato Obed. Iamote tu ambe’na Isai, ambe’na Daud.

¹⁸Iamote tu bati’na Peres: Iatu Peres undadian Hezron,

¹⁹na Hezron undadian Ram, na Ram undadian Aminadab,

²⁰na Aminadab undadian Nahason, na Nahason undadian Salmon,

²¹na Salmon undadian Boas, na Boas undadian Obed,

²²na Obed undadian Isai, na Isai undadian Daud.