Read Toraja-Sa'dan 1 SAMUEL 10 Bible Online

1 SAMUEL 10 - Toraja-Sa'dan bible

1 SAMUEL 10

¹Naalami Semuel tu misa’ gori-gori nanii minna’ busarungngu’, naboloanni langngan ulunna Saul, sia naudung, anna ma’kada nakua: Tang PUANG raka untokkoko la dadi arung mana’Na?

²Allo iate, ke miboko’imo’ male, la sitammuko da’dua muane sikandappi’ lamunanna Rahel, angge lili’na padang Benyamin, dio Zelzah. Anna ma’kada tu tau iato lako kalemu, nakua: Iatu keledai birang, tu male mudaka’, diappa’mo; manassamo napaboko’i penaa ambe’mu tu keledai iato, anna kamu napomagiang, nakua: Apara la ma’din kupogau’ diona tu anakku?

³Iammi lendu’imito, la rampokomi lako to’ kayu tarpin dio Tabor, ammu sitammu muane tallu inde to dio, tu ma’palulangngan Betel la menomba lako Puang Matua, misa’ umbaa bembe’ bitti’ tallu, misa’ umbaa roti tallu na misa’ umbaa kariba’ nanii uai anggoro’.

⁴Sia la napekutanan tau iato mai tu kamalaga’-laga’rammu sia la nabenko roti da’dua; la mutarima tu apa iato dio mai kalena.

⁵Mangkato la rampoko lako GibeaNa Puang Matua, tu nanii pa’kampan to Filistin. Iake tamako kota, ta’pa la sitammuko sangtuntunan nabi solo’ dao mai inan madao nadoloan to sibaa dandi sia ganda’-ganda’ sia suling sia su’dekan, anna tiakka’ penaanna ma’nubua’.

⁶La Narampoiko PenaanNa PUANG, anna tiakka’ penaammu ma’nubua’ sola tau iato mai sia la dipopendadiko to makalaen-laen.

⁷Iake sae nasangmi te tanda iate lako kalemu, pogau’mi tu ma’dinna mupogau’, belanna Puang Matua urrondongko.

⁸La doloko rokko Gilgal, sia manassa la malena’ rokko umpessitammuiko, la umpemalaran pemala’ ditunu pu’pu’ sia untunu pemala’ kasalamaran. Ammu kampaina’ diong pitung allo sae lako rampoku umpokadangko tu apa sipatu la mupogau’.

⁹Mane memboko’ la untampe Samuel, Napopembalimi PUANG Matua tu penaanna, sia mintu’ tanda iato dadimo tonna allo ia dukato.

¹⁰Iatonna rampomo sola duai lako Gibea, natammuimi kasirampunan nabi. Anna rampoi penaanNa Puang Matua, naurunganni tiakka’ penaanna ma’nubua’ dio lu tau iato mai.

¹¹Na iatu mintu’ tu to untandai dolona, tonna tiroi marassan ma’nubua’ sola tu mintu’ nabi iato, sipa’kada-kadami, nakua: Apamora tu dadi lako anakna Kish? Naala dukaraka bilangan nabi tu Saul?

¹²Mebalimi tu misa’ tau inde to dio mai, nakua: Mindara tu ambe’na? Iamoto anna dadi misa’ parumbasan, nakua: Naala dukaraka bilanganna nabi tu Saul?

¹³Iatonna mangkamo tiakka’ penaanna ma’nubua’, rampomi langngan inan madao.

¹⁴Ma’kadami tu pa’amberanna Saul lako Saul sia lako taunna, nakua: Umbara minii sule sola dua? Mebalimi nakua: Laokan undaka’i tu keledai birang; apa iatonna tae’mo kitiro, malemokan lako Samuel.

¹⁵Nakuami tu pa’amberanna Saul: Pokadanna’i apa napokada Samuel lako kalemi.

¹⁶Mebalimi tu Saul lako pa’amberanna, nakua: Ta’pa napokadangkanni, kumua: Iatu keledai diappa’mo. Apa iatu diona kadatuan tu napokada Samuel, tae’ napokadanni.

¹⁷Mangkato natambaimi Samuel tu mintu’ tau sirampun lako PUANG dio Mizpa,

¹⁸sia ma’kada lako to Israel, nakua: Susite tu kadanNa PUANG, Kapenombanna to Israel: Kusolammo tu to Israel tassu’ lan mai tondok Mesir sia Kurampanammokomi dio mai mintu’ kadatuan, tu umpandasakomi.

¹⁹Apa totemo miboko’imo tu Kapenombammi, tu mangka urrampanangkomi lan mai kamaparrisan sia ma’kadakomi, mikua: Moi umba nakua, inang la miangkarangkan misa’ datu. Iamoto, maimokomi mennolo lako PUANG situru’ bilanganna sukummi sia pa’rapuammi.

²⁰Mangkato nasuami Samuel tu mintu’ suku Israel sae mennolo, anna suku Benyamin narua.

²¹Iatonna disuamo sae mennolo tu suku Benyamin situru’ mintu’ pa’rapuanna, pa’rapuannami Matri nakanna. Mangkato Saulmi, anakna Kish nakanna, anna didaka’, apa tae’ nadiappa’.

²²Mekutanaomi tu tau lako PUANG, nakua: Ba’tu saemi tu tau iato?, anNa balii PUANG, Nakua: Manassa membunimo lan lu to’ pareanan.

²³Ma’dondomi tu tau male unnalai inde to dio mai; iatonna bendan lan tangnga-tangnga to buda, angge palempengnari tu malangka’na mintu’ tau.

²⁴Ma’kadami tu Samuel lako mintu’ tau, nakua: Mitiromoraka tu to Natonno’ PUANG, belanna moi misa’ tau tae’ padanna lan te mintu’ tau. Unnarrak-arrakmi tu mintu’ tau, nakua: La maupa’ tu datu!

²⁵Mangkato napokadami Samuel lako mintu’ tau tu atoran kadatuan, anna sura’i lan misa’ luntara’, anna patorroi dio oloNa PUANG; namane urrampunni Samuel tu mintu’ tau pantan sule lako banuanna.

²⁶Sule dukami tu Saul lako banuanna dio Gibea nasolan to barani tu Napatiakka’ Puang Matua penaanna.

²⁷Apa den tu ba’tu pira to bulituk ma’kada, nakua: Umba nakua la urrampanangki’ te? Sia napamatuna tau iato mai sia tae’ nama’kasian lako kalena, apa nakappai bang Saul tu iannato.