Read Toraja-Sa'dan 1 SAMUEL 11 Bible Online

1 SAMUEL 11 - Toraja-Sa'dan bible

1 SAMUEL 11

¹Ta’kala saemi tu Nahas to Amon umpatama limbu tondok Yabesy dio lili’na Gilead. Ma’kadami tu mintu’ to Yabesy lako Nahas, nakua: La untananki’ misa’ basse, angki lumbang baka direngnge’ sola nasang lako kalemi.

²Apa ma’kada tu Nahas, to Amon lako, nakua: Misa’ri kutuntun ke la sibasseki’, iamotu mata kananmi la kusu’be’i nasang; susimoto la kunii untodingi siri’ tu mintu’ to Israel.

³Ma’kadami tu mintu’ pekaamberan Yabes lako, nakua: Popa’elo’nakan pitung allo, angki sua tau lako mintu’ lili’na tondok Israel. Iake tae’i misa’ tau sae untunduikanni, la tassu’kan ussorong kaleki lako kalemi.

⁴Iatonna rampo tu pesua iato lako Gibea-Saul, napokadami tu mintu’ kada iato lako to buda, anna siurrukan tumangi’.

⁵Ta’kala saemi tu Saul dio mai boko’ sapinna lan mai pa’lak, anna ma’kada, nakua: Apara napomasussa tu to buda anna siurrukan tumangi’? Nauleleammi tau lako kalena tu mintu’ apa napokada to Yabes.

⁶Tonna rangimi Saul tu kada iato, narampoimi PenaanNa Puang Matua sia re’dek tu ara’na.

⁷Naalami tu sapi sangayoka, nata’tak-ta’takki, nasuai tu pesua iato umbaai tu panta’tak iato lako mintu’ lili’na tondok Israel, anna ma’kada nakua: Minda-minda tu tae’ natassu’ umbumbun boko’na Saul sia Samuel, manassa iatu sapinna la dipasusi dukato. Attu iato saemi tu kamatakuran lu dio mai PUANG lako mintu’ tau, anna sangtiangkaran tassu’.

⁸Nabilangmi tu tau iato dio Bezek, naden tallu ratu’ sa’bu tu to Israel, na to Yehuda tallungpulo sa’bu.

⁹Nakuami lako to disua sae: Susite tu la mipokadan to Yabesy dio Gilead, kumua: masiang la sae tu kadirampanammi, ke kulla’i allo. Tonna rampomo tu to disua napokadammi to Yabesy tu iannato, anna parannu tu tau iato mai.

¹⁰Ma’kadami tu to Yabesy, nakua: Masiang angki tassu’ ussorong kaleki lako kalemi, ammi pogau’i lako kaleki tu misanganna melo.

¹¹Iatonna masiangmo napatallung tuntunammi Saul tu tau iato mai, anna tama to’tendana uali tonna dannari sia nasabu’imi tu to Amon tonna tae’pa nakulla’ allo; anna sisarak-sarak tu mintu’ to torropa, naurunganni tae’mo torro sibaa sida’dua tu tau.

¹²Attu iato ma’kadami tu to buda lako Samuel, nakua: Mindara ia, tu ma’kada dolona kumua: Umbani apa tu Saul la umparentaki’? Baai mai tu tau iato, angki patei.

¹³Apa nakua Saul: Allo iate tae’ nama’din misa’ tau dipatei, belanna allo iate Napaden PUANG tu kadirampanan lako to Israel.

¹⁴Sia nakuapa Samuel lako to buda: Maikomi, melo ke maleki’ lako Gilgal, anta ba’rui tu kadatuan dio.

¹⁵Male nasangmi tu bangsa iato lako Gilgal unnangka’ Saul dadi datu dio oloNa PUANG dio Gilgal sia napemalaran inde to tu pemala’ kasalamaran dio oloNa PUANG; parannu-rannumi tu Saul inde to dio sola mintu’ to Israel lendu’ marua’na.