Read Toraja-Sa'dan 1 SAMUEL 14 Bible Online

1 SAMUEL 14 - Toraja-Sa'dan bible

1 SAMUEL 14

¹Den sangallo nama’kada Yonatan, anakna Saul lako pa’takinna, nakua: Maiko talamban lian lako surodadu pa’kampana to Filistin, tu sambalinna lu. Apa iatu iannato tae’ napokadanni ambe’na.

²Iatu Saul torro dio tampak Gibea diong garonto’ dalima tu dio Migron. Na iatu mintu’ to nasolan agi-agi annan ratu’.

³Iatu Ahia, anakna Ahitub, siulu’na Ikabod, anakna Pinehas, anakna Eli, iamotu to minaanNa PUANG dio Silo, ma’pake epo’. Tae’ natandai to buda tu diona Yonatan kumua malemo.

⁴Diong alla’ aa’ tu la nalendu’i Yonatan rampo lako surodadu pa’kampana to Filistin, den buntu batu massura, misa’ indena mai namisa’ diona lu; misa’ disanga Bozes namisa’ disanga Sene.

⁵Iatu buntu batu misa’ bendan malolo rampe rekkena sitingoan Mikhmas na iatu misa’na rampe sau’na sitingoan Geba.

⁶Ma’kadami tu Yonatan lako pa’takinna nakua: Talamban lian pa’kampan surodadunna tu to tang disunna’. Den sia manii upa’ Natunduiki’ PUANG, belanna tae’ Nakasuliranni PUANG la umpa’bengan kadirampanan umpobannang kabudan ba’tu kasidiranna tau.

⁷Mebalimi tu pa’takinna lako, nakua: Pogau’mi mintu’ tu naalanna penaammi; turu’ bangmi tu pa’poraiammi; angku undi duka ussisolangkomi umba-umba tu miporai miola.

⁸Nakuami Yonatan: La lambanki’ lako tau iato, anta pa’petiroan kaleta lako.

⁹Ianna kuai tu tau iato mai: Kampaipi dolo, kiurunganni rampo lako kalemi melo ke torroki’ bendan dio inanta, da takendek umpessitammui tu tau iato mai.

¹⁰Apa ianna kuai tu tau iato mai: Kendekkimokan mai! takendekkimi, belanna Nasorongmo PUANG tama limanta. Iamote tu la dadi tanda lako kaleta.

¹¹Iatonna pa’petiroammo kalena sola duai lako surodadu pa’kampana to Filistin, nakuami tu to Filistin: Tassu’mo tu to Ibrani lan mai kalo’tok, tu naninna membuni.

¹²Mebalimi tu surodadu pa’kampa lako Yonatan sia lako pa’takinna, nakua: Kendekkimokan mai, angki benkomi taami. Ma’kadami Yonatan lako pa’takinna, nakua: Kendekmoko mai unturu’na’, belanna Nasorongmo PUANG tama limanna to Israel.

¹³Ma’dangkanmi kendek tu Yonatan, naturu’ pa’takinna. Tibambangmi tu tau iato mai dio tingayona Yonatan, naundi tu pa’takinna dio mai boko’na umpatei.

¹⁴Lan te kapasaburan bunga’na, tu napogau’ Yonatan sola pa’takinna, den agi-agi duangpulo tau mate, dio misa’ inan landona agi-agi sangtangnga kadaang lalan tengko sangayoka sapi lan sangpolo allo.

¹⁵Dadimi misa’ katirambanan lan lu to’ tenda surodadu sia dio lu padang sia dio lu to’ to buda; sia tiramban duka tu surodadu ma’kampa sia ia duka tu mai surodadu mangrampa sangbaanan; ondong pissanpi tigega’ tu mintu’ tondok, naurungan susi misa’ katirambanan dio mai Puang Matua.

¹⁶Iatu surodadu pa’kampana Saul dio Gibea lan lili’ Benyamin, tonna tiroi kumua den tu kamarukkan kapua dio to Filistin, naurunganni tu tau iato mai pada male sisarak-sarak,

¹⁷ma’kadami tu Saul lako tu to nasolan, nakua: Bilangi tu mintu’ to buda sia paressai mindamora tu messarak dio mai kaleta. Dibilang nasangmi tu tau mintu’, o! Yonatan sola pa’takinna tu tae’ dio.

¹⁸Ma’kadami tu Saul lako Ahia, nakua: Baai mai tu pattinNa Puang Matua; belanna attu iato iatu pattinNa Puang Matua dio lu to Israel.

¹⁹Iatonna marassan bangsiapa tu Saul ma’kada lako to minaa iato, sakerangngan-rangngannami tu kamaramban dio to’ tenda surodadu to Filistin, iamoto anna ma’kada pole’o tu Saul lako to minaa, nakua: Torroimi.

²⁰Sirampunmi tu Saul sola mintu’ to nasolan anna tama pa’telangan kasirarian, pakalan napa’dangna kalenamo to Filistin silaoan solana, lendu’ tongan marukkanna.

²¹Ondong pole’pi den to Ibrani, tu masaimo torro sola to Filistin sia male bang sola surodadunna tiku lao: tau iato mai sita’pamo to Israel tu sola Saul sia Yonatan.

²²Iatonna rangimi mintu’ to Israel tu membuninna dao lu buntu Efraim, kumua mallaimo tu to Filistin, turu’ dukami mangula’ parari.

²³Susimoto tu to Israel Narampanan PUANG allo iato. Tarru’ bang tu kasirarian iato sae lako nalendu’i tu Bet-Awen.

²⁴Iatonna dipakapussakan tu to Israel allo iato, napa’parentammi Saul lako to buda tu ullaoanni kada, nakua: Tampakan ropu tu to ullepa’ apa, ke tae’pi namakaroen sia ke tae’pi kupabala’i tu ualingku. Iamoto anna tae’ bangi misa’ tu to buda ullepa’ kande.

²⁵Iatu to buda male nasang tama pangala’ anna dio padang lappa’ iato den tani’ enoan.

²⁶Iatonna rampomo tu to buda tama pangala’, denmi inde to tu tani’ enoan sebo, apa moi misa’ tau tae’ umparampo limanna lako pudukna, belanna ungkataku’ laoan kada.

²⁷Apa tae’ narangii Yonatan tonna pa’parentan laoan kada tu ambe’na lako to buda. Napa’dulluammi tu tampak tekken dio limanna naotonni tama tani’ enoan; iatonna parapa’mi tu limanna lako pudukna, masiangmi natiro.

²⁸Ma’kadami misa’ dio mai tu to buda lako kalena, nakua: Mandu liu napa’parentan ambe’mi tu laoan kada lako tu buda, nakua: Tampakan ropu, tu to ullepa’ apa lan allo iate. Iamoto anna bo’yok liumo tu to buda.

²⁹Nakuami Yonatan: Ambe’ku umpamandasai tu tondok! Tiromi matumbai mase’rokna matangku tongku lepa’i sidi’ tu tani’ enoan.

³⁰Ondong pole’pi tu to buda, kenna la ma’din lan allo iate ma’lalan inaanna ungkandei tu pangrampa uali naappa’. Ia dukamo bannangnato anna tae’ nakapua tu kapataloanna to Israel lako to Filistin.

³¹Allo ia dukato nataloi tu to Filistin randuk dio mai Mikhmas sae lako Ayalon, naurunganni lendu’ mata’ka’na tu to buda.

³²Iamoto nalaoimi to buda tu pangrampa; naalami tu domba sia sapi sia anak sapi, natunui dao kuli’na padang, anna kandei sola rarana.

³³Naparampomi tau lako Saul, nakua: Tonganna iatu mintu’ to buda kasalanmo langngan PUANG, belanna tau iato mai ungkande duku’ sola rarana. Ma’kadami Saul nakua: Untengkaimokomi parentaNa PUANG; lolinanna’ misa’ batu kapua mai.

³⁴Sia nakua duka Saul: Malekomi ullelei lan lu te to buda, ammi pokadanni, kumua: Pada baakomi sapimmi sia dombami mai, mitunui inde te, mikandei. Apa da mikasalan lako PUANG, belanna ungkande duku’ sola rarana. Bongi ia dukato pantan ia kalenami tu to buda urrendenni tu sapinna la natunu dio.

³⁵Napabendanammi Saul misa’ inan pemalaran tu PUANG; iamote tu inan pemalaran bunga’na napabendanan PUANG.

³⁶Mangkato ma’kadami Saul: Maikomi tamengkalao unnula’i tu to Filistin ke bongii sia tapangrampai sae lako berre’na allo sia da tapatorroi moi misa’ duka. Mebalimi tu tau iato mai, nakua: Pogau’mi tu mintu’na misanganna melo dio pentiromi. Apa nakua tu to minaa: Tamenomba lako Puang Matua indete.

³⁷Mekutanami tu Saul lako Puang Matua, nakua: Ma’dinra’ka mengkalao unnula’i tu to Filistin? La Misorong siaraka tama limanna to Israel? Apa iatonna allo iato tae’ Napebalii.

³⁸Ma’kadami Saul nakua: Maikomi sola nasang, e kamu mintu’ pangulu to buda, la miparessa ammi issanni, kumua umba nanii bu’tu tu kasalan iato.

³⁹Belanna la lelukrika tuona PUANG, tu urrampanan to Israel, moi anna bu’tu dio anakku Yonatan tu kasalan, inang la dipatei. Moi misa’ tu mintu’ to buda tae’ umpebalii.

⁴⁰Mangkato ma’kadami tu Saul lako mintu’ to Israel, nakua: Kamu sola nasang la ma’misa sangsese, anna aku sola anakku sangsese. Mebalimi tu to buda lako Saul, nakua: Pogau’mi tu misanganna melo dio pentiromi.

⁴¹Ma’kadami tu Saul lako PUANG, nakua: O Kapenombanna Israel, papayanni tu pangra’ta’ malolo. Yonatanmi sola Saul nakanna, anna tilendok tu to buda.

⁴²Ma’kadami tu Saul, nakua: Biangikanni sola dua, aku anna anakku Yonatan. Yonatanmi nakanna.

⁴³Nakuami Saul lako Yonatan: Pokadanna’, apara tu penggaurammu. Napokadammi Yonatan lako, nakua: Uai tani’ manna kulepa’ sidi’, kutossok tampak tekken kutoe. Inde siana’: tae’ kupomatana’i tu la mate.

⁴⁴Nakuami Saul: La Nasanggangina’ Puang Matua, sia la Narangngannipa, ke tae’i mudipatei, Yonatan.

⁴⁵Apa mebali tu to buda lako Saul, nakua: Ma’dinraka la dipatei tu Yonatan, tu umpadenmo kapataloan kapua dio lu to Israel? Toyang mambela iato! La lelukrika tuoNa PUANG, anna la rondonra tu beluakna sanglamba’ dao mai ulunna rokko padang. Belanna diona pa’tunduanNa Puang Matua anna pogau’i tu mintu’ apa iato lan allo iate. Susimoto tu kanarampananna mintu’ tau tu Yonatan, naurunganni tae’ nadadi dipatei.

⁴⁶Sulemi tu Saul natorroimo unnula’ to Filistin, anna iatu to Filistin sule lako inanna.

⁴⁷Iatonna manda’ untoe kadatuan tu Saul dio to Israel, narariimi tu mintu’ ualinna tiku lao: Iamotu to Moab, sia to Amon, sia to Edom, sia mintu’ datu to Zoba sia to Filistin. Sia umba-umba tu nanii male parari, inde dukato nanii unnappa’ kapataloan.

⁴⁸Napalalongmi tu gau’na, nataloi tu to Amalek sia narampanan tu to Israel dio mai limanna mintu’ to umpangrampai.

⁴⁹Iatu muane anakna Saul iamotu Yonatan sia Yiswi sia Malkisua na iatu anakna baine da’dua disanga Merab tu pa’bunga’na, na Mikhal tu tampakna.

⁵⁰Iatu bainena Saul disanga Ahinoam, anakna Ahimaas sia iatu pa’baraninna disanga Abner, iamo anakna Ner, pa’amberanna datu.

⁵¹Na iatu Kish, ambe’na Saul, sia Ner, ambe’na Abner, anakna dua Abiel.

⁵²Lan mintu’ allo katuoanna Saul tae’ upu’na tu rari maparrang unnea to Filistin; iamoto anna rampunni Saul lako kalena tu mintu’ to barani sia lalong natiro.