Read Toraja-Sa'dan 1 SAMUEL 15 Bible Online

1 SAMUEL 15 - Toraja-Sa'dan bible

1 SAMUEL 15

¹Ma’kadami tu Samuel lako Saul, nakua: Akumo tu Nasua PUANG untokkokomi dadi datu umparenta taunNa, iamotu to Israel, totemo duka perangiimi tu kadanNa PUANG.

²Nakua kadanNa PUANGna mintu’ ma’dandan maritik: La Kupabala’i tu mintu’ apa napogau’ Amalek lako to Israel, belanna tae’ natangga’i lendu’ dio lalan, tonna lu diong mai Mesir.

³Totemo malemokomi untaloi tu to Amalek, sabui’ tu mintu’ apa dio kalena butung pepayu; da midampangi, sangadinna patei la muane la baine, la pia la anak ma’susupa, la sapi la domba, la unta sia keledai.

⁴Narampunmi Saul tu mintu’ to buda, anna paressai sia nabilangi dio Telaim: duaratu’ sa’bu tu to lumingka na sangpulo sa’bu tu to Yehuda.

⁵Iatonna rampomo tu Saul lako tondok Amalek, napadiongmi lombok tu ba’tu pira-pira to mangaung.

⁶Mesuami Saul umpokadanni to Keni, nakua: Mallaikomi toyangkomi sia tassu’komi dio mai to Amalek, da angku sabu’ikomi sola tu tau iato mai; belanna mipa’pekitanammo tu kamarurusammi lako to Israel tonna lu diong mai Mesir. Toyangmi tu to Keni dio mai to Amalek.

⁷Natalomi Saul tu mintu’ to Amalek randuk dio mai Hawila ma’palulako Syur rampe matallona Mesir.

⁸Natingkan tuomi tu Agag, datu to Amalek, apa mintu’ to buda nasabu’i pa’dang butung pepayu.

⁹Napatuomi Saul sola mintu’ to budanna tu Agag sia iatu mai domba sia sapi tu me’lokna sia tu melona, sia tu mintu’ anak domba, sia iatu mintu’ mandu keangga’na; manoka tu tau iato mai ussabu’i butung pepayu. Sangadinna mintu’ tu tang keangga’na sia kadakena nasabu’i.

¹⁰Attu iato saemi kadanNa PUANG lako Samuel, Nakua:

¹¹MenassanNa’, belanna Kuangka’ tu Saul dadi datu, belanna toyangmo dio mai Kaleku sia tae’mo naturu’i tu parentaKu. Massengmi penaanna tu Samuel, anna meongli’ lako PUANG situ’turan bongi.

¹²Mangkato millik melambi’mi tu Samuel, namale sitammu Saul; napokadami tau lako Samuel, nakua: Rampomo tu Saul lako Karmel, anna osokan kalena misa’ batu dipotanda; iatonna sepang senga’mo, tarru’mi male rokko Gilgal.

¹³Iatonna rampomo tu Samuel lako Saul, nakuami Saul lako: Napamasakkemorokomi PUANG! Iatu parentaNa PUANG kupalalomo.

¹⁴Nakuami Samuel: Apara la napatu te oni domba tu rampo tama talingangku sia oni sapi tu kurangi?

¹⁵Mebalimi Saul nakua: Nabaa tau dio mai to Amalek, belanna napatuo mintu’ to buda tu domba sia sapi me’lok, la napemalaran lako PUANG, Kapenombammi, apa iatu senga’na mangkamo kisabu’i butung pepayu.

¹⁶Nakuami Samuel lako Saul: Kappakomi, angku pokadangkomi tu kadanNa PUANG, tu rampo lako kaleku sangmai’ bongi. Mebalimi Saul lako, nakua: Pokadami.

¹⁷Nakuami Samuel: Tang susiraka to, kumua moi mibitti’ dio pentiromi, apa dipadadikomi pangulunna mintu’ to Israel sia Natokkokomi PUANG dadi datunna to Israel?

¹⁸Nasuamokomi PUANG umpogau’i te pepasan iate, Nakua: Maleko, musabu’i butung pepayu tu to kadake gau’na, iamotu mintu’ to Amalek; rarii tu tau iato mai sae lako pisanna.

¹⁹Ma’apai natae’ miperangii tu kadanNa PUANG sangadinna mibarakki tu pangrampa sia umpogau’komi apa kadake dio pentiroNa PUANG?

²⁰Nakuami Saul lako Samuel: Kuturu’ sia tu kadanNa PUANG sia kuolai tu lalan Nasuanna’ PUANG sia Agag, datu to Amalek kusolan, apa iatu mintu’ to Amalek mangkamo kusabu’i butung pepayu.

²¹Iari naalai mintu’ tau tu domba sia sapi tu me’lokna lan to apa la disabu’i, iamotu belanna la napemalaran lako PUANG, Kapenombammi, dio Gilgal.

²²Nakuami Samuel: Naalaraka penaanNa PUANG tu pemala’ ditunu pu’pu’ sia pemala’ susi kanaalanna penaanNa, ke dituru’i tu kadanNa? Tonganna mandu melo ia tu menturu’ na iatu pemala’ sia iatu ma’perangi mandu melo na lompo domba laki.

²³Belanna iatu mengkailing pada bangsia kasalan ma’doti sia kamatampoan pada bangsia mekapuang lako deata sia kamenomban lako balo’ tau. Belanna mitumpumo tu kadanNa PUANG, iamoto Natumpu dukakomi Puang, kumua damo midadi datu.

²⁴Nakuami Saul lako Samuel: Kasalammo’, belanna kutengkaimo tu parentaNa PUANG sia ia duka tu kadammi, apa mataku’na’i lako mintu’ tau, iamoto angku turu’i tu palakunna tau iato mai.

²⁵Totemo pagarri’mi dikka’ tu kasalangku sia tasule sola, angku menomba lako PUANG.

²⁶Apa mebali tu Samuel lako Saul nakua: Tae’ kula sule ussolangkomi, belanna mangkamo mitumpu tu kadanNa PUANG; anna tumpu dukakomi PUANG, kumua damo midatui to Israel.

²⁷Iatonna memboko’mo tu Samuel la male, natoemi Saul tu biring bayu lamba’na, anna serek.

²⁸Nakuami Samuel lako: Allo ia dukate, anNa alai PUANG tu kadatuan Israel dio mai kalemi, Nakamaseanni to senga’ tu melo anna kamu.

²⁹Ondongpi iatu Puangna Israel, Puang tang membali-bali, tae’ Nabiasa tu ma’kada tang tongan sia tae’ duka Namenassan; belanna tangia to lino Naurunganni menassan.

³⁰Nakuami Saul: Tonganna, kasalammo’, apa totemo kasiri’pa’ dikka’ dio olona mintu’ pekaamberanna bangsaku sia dio tingayona mintu’ to Israel. Maikomi, tasule sola. Angku menomba lako PUANG, Kapenombammi.

³¹Sulemi tu Samuel undi unturu’ Saul, anna menomba tu Saul lako PUANG.

³²Nakuami Samuel: Benna’ mai tu Agag, datu to Amalek. Sendemi penaanna tu Agag sae lako kalena, anna ma’kada, nakua: Lendu’mo tu kamapairanna kamatean.

³³Nakuami Samuel: Susitu pa’dangmu umpasisayuran anak ba’tu pira-pira baine, susi dukamoto tu indo’mu la dipasisayuran anak dio lu mintu’na baine. Napateimi Samuel tu Agag, nata’tak-ta’takki dio oloNa PUANG dio Gilgal.

³⁴Mangkato malemi tu Samuel lako Rama, nasule tu Saul lako banuanna dio Gibea-Saul.

³⁵Tae’ bangmo nabelai Samuel sitiro tu Saul sae lako kamateanna, apa masse penaanna Samuel ungkilalai Saul. Sia menassanmo tu PUANG, belanna Naangka’ datunna to Israel tu Saul.