Read Toraja-Sa'dan 1 SAMUEL 16 Bible Online

1 SAMUEL 16 - Toraja-Sa'dan bible

1 SAMUEL 16

¹Ma’kadami tu PUANG lako Samuel, Nakua: Sangapapoko la masse penaammu ungkilalai Saul, tu mangkamo Kutumpu, kumua damo nadatui tu to Israel? Issiimi minna’ tu tandukmu, ammu male, belanna la Kusuako male lako Isai, to Betlehem, belanna dio mai mintu’ tu anakna muane Kutonnoran Kaleku misa’ datu.

²Apa nakua Samuel: Umba la kukua male? Iake narangii Saul, manassa napateina’. Nakuami PUANG: Baako misa’ anak sapi, ammu kuai: iate aku sae la memala’ lako PUANG.

³Sia la mutambai tu Isai lako to’ pemala’ iato, na Aku la umpokadangko tu apa sipatu la mupogau’ sia la mutokkoanNa’ minda-minda tu Kupokada lako kalemu.

⁴Napogau’mi Samuel susitu kadanNa PUANG, anna male lako Betlehem. Pada saemi sipa’parondoan tu mintu’ pangulunna tondok iato, anna ma’kada nakua: Melo siaraka tu misaean?

⁵Mebalimi nakua: Melo sia! Iatu kasaeangku te la memala’ lako PUANG. Seroimi tu kalemi anta male sola memala’. Napamaseromi tu Isai sola tu mintu’ anakna muane, natambai memala’ sola.

⁶Iatonna tamamo tu tau iato mai, natiroi Samuel tu Eliab, saemi lan penaanna: Manassa iamote bendan tu to Natokko PUANG dio oloNa.

⁷Apa sae tu kadanNa PUANG lako Samuel, nakua: Da narupanna bang mutiro ba’tu kakalandoanna kalena, belanna tae’ naalai penaangKu. Belanna iatu natirona tolino, tae’ na ia bang tongan; belanna iatu tolino ia manna tu apa dio tingayona natiro, apa PUANG untiroi tarru’ tama ba’teng.

⁸Mangkato natambaimi Isai tu Abinadab, nasuai lendu’ dio olona Samuel, apa nakua Samuel: Tangia dukate tu Natonno’ PUANG.

⁹Nasuaomi Isai tu Syama lendu’, apa nakua Samuel: Tangia dukate tu Natonno’ PUANG.

¹⁰Nasuamo Isai tu anakna muane pitu lendu’ dio olona Samuel, apa nakua Samuel lako Isai: Mintu’nate tangia to Natonno’ PUANG.

¹¹Sia nakuapa Samuel lako Isai: Ia nasangmorakate tu mintu’ pia muane? Mebalimi nakua: Ia mannamo tu tampakna, marassan ungkambi’i domba. Ma’kadami Samuel lako Isai, nakua: Suai tau untambai, belanna tae’pa tala unno’ko’ ma’talimbungan kumande, ke tae’pi nasae.

¹²Nasuami tu tau untambai tama. Iatu pia muane iato mariri api beluakna sia me’lok matanna sia maballo rupanna. Ma’kadami tu PUANG, Nakua: Bendanko mubolloi, belanna iamote.

¹³Naalami Samuel tu tanduk nanii minna’, anna bolloi lan tangngana mintu’ siulu’na. Natamaimi PenaanNa PUANG tu Daud randuk allo iato anNa tontong dio kalena. Mangkato ke’de’mi tu Samuel anna sule lako Rama.

¹⁴Toyangmi tu PenaanNa PUANG dio mai Saul sia misa’ penaa kadake lu dio mai PUANG umpatigiang-giangi.

¹⁵Ma’kadami tu mintu’ to mase’ponna lako, nakua: Tonganna den misa’ penaa kadake lu dio mai Puang Matua umpatigiang-giangkomi.

¹⁶Melo ke mipa’parentanni lako taummi, tu mase’ponna dio kalemi, undaka’ misa’ to manarang ma’katapi. Na iake saei tu penaa kadake lu dio mai Puang Matua urrampoikomi, ma’din napannoni to, ammi matana.

¹⁷Ma’kadami tu Saul lako mintu’ to mase’ponna: Melo ke midakaranna’ misa’ to manarang ma’katapi, ammi baai lako kaleku.

¹⁸Attu iato mebalimi misa’ to mase’ponna datu, nakua: Kutiro den misa’ anakna Isai, to Betlehem manarang ma’katapi, ondongpi ia misa’ pa’barani lalong sia malinta’ sia malute ma’kada, misa’ to melo pati’na sia Narondong PUANG.

¹⁹Nasuami Saul tu ba’tu pira-pira pesua lako Isai, nakua: Suai tu anakmu lako kaleku, iamotu Daud, tu mangkambi’ domba.

²⁰Naalami Isai tu keledai misa’ napatteke’i roti sia misa’ kiriba’ anggoro’ sia bembe’ laki mangura misa’ napa’peanni Saul nabaa Daud, anakna.

²¹Susimoto tu diona kasaeanna Daud lako Saul, anna dadi to mase’ponna datu; nakamasei liumi datu, naurunganni dadi bentarana tu Daud.

²²Nasuami Saul tu tau male umpokadanni Isai: Melo ke torro bangmi tu Daud to mase’ponku, belanna kuporai.

²³Na iake narampoimi penaa kadake lu dio mai Puang Matua tu Saul naalaomi Daud tu katapinna, anna pannoni, anna maringngan nasa’ding tu Saul; matanami anna toyang dio mai kalena tu penaa kadake.