Read Toraja-Sa'dan 1 SAMUEL 18 Bible Online

1 SAMUEL 18 - Toraja-Sa'dan bible

1 SAMUEL 18

¹Iatonna mangkamo tu Daud ma’kada lako Saul, la’ka’mi penaanna Yonatan lako Daud sia nakamasei Yonatan susi kalena.

²Allo ia dukato natambaimi Saul, sia tae’mo natangga’i sule lako banuanna ambe’na.

³Sibassemi Yonatan tu Daud, belanna nakamasei susi kalena.

⁴Nalossokammi Yonatan tu bayu lamba’na nabenni Daud, susi dukato tu mintu’ pakeanna, sae lako pa’dangna sia panana sia salipi’na.

⁵Ianna tassu’ male tu Daud, ke nasuaoi Saul, tontong bang patalo; iamoto anna angka’i Saul pangulu surodadu. Na iatu iannato naala penaanna to buda sia mintu’ to naala parea Saul.

⁶Iatonna sulemo tu tau iato mai sola Daud, tonna mangka tu Daud untalo to Filistin iato, tassu’mi tu mintu’ baine lan mai mintu’ tondok to Israel, anna marran-marran menani untammui datu Saul, umpannoni ganda’-ganda’ sia ma’dandan sia unnarrak-arrak umpannoni giring-giring.

⁷Iatu mintu’ baine ma’dandan sisonda-sonda menani, nakua: Napatei Saul massa’bu-sa’bu! Apa Daud ma’lampa-lampa!

⁸Re’dekmi ara’na Saul sia tang naporai, anna tangnga’i lan penaanna: Daud naben tau iato mai ma’lampa-lampa, apa aku ma’sa’bu-sa’buri. Manassa ia duka tu kadatuan ia umpotaai undinna.

⁹Randuk allo iato mangimburu bang tu Saul untiroi tu Daud.

¹⁰Iatonna masiangmo dio mai ta’pa natamaimi penaa kadake lu dio mai Puang Matua tu Saul, naurunganni susito bomboan lan tongkonan layukna; nadedekmi Daud tu katapinna susi biasanna kiallo-kiallo. Iatu Saul untoe dokena.

¹¹Naayakammi Saul tu dokena anna ma’tangnga’ lan penaanna: Melo ke kurokki tu Daud natipentana’ lako rinding. Apa napasala Daud tu pangrokna sae lako ma’penduanna.

¹²Nakataku’mi Saul tu Daud, belanna Narondong ia PUANG, natoyangmo tu Puang dio mai Saul.

¹³Iamoto napatoyangi Saul tu Daud, naangka’i pangulunna to sangsa’bu, naurunganni lu tama lu lan mai dio tingayona surodadu iato mai.

¹⁴Iatu Daud maupa’ dio lu mintu’ lalanna, belanna Narondong PUANG.

¹⁵Iatonna tiromi Saul, kumua maupa’ tongan tu Daud, samataku’- taku’nami,

¹⁶apa mintu’ to Israel sia to Yehuda ungkamali’ Daud, belanna lu lako lu dio mai dio tingayona tau iato mai.

¹⁷Nakuami Saul lako Daud: Iatu anak pa’bunga’ku, disanga Merab, la kupasirampanangko kapa’, ke dadi dukako pia lalong dio kaleku sia ammu pogau’i tu rarinNa PUANG. Apa ma’tangnga’ Saul kumua: Da nalimangku umpata’pai, sangadinna limanna to Filistin.

¹⁸Nakuami Daud lako Saul: Mindaora’ aku te sia to apara tu sangdadiangku sia pa’rapuanna ambe’ku dio lu to Israel, angku la dadira manintunna datu?

¹⁹Tonna lambi’mi attunna tu Merab, anakna Saul, la diben Daud, nabenmi Adriel, to Meholati la napobaine.

²⁰Apa iatu Mikhal, anakna Saul ungkabudai Daud. Iatonna parampoi tau lako Saul tu iannato, nakalo’mi penaanna.

²¹Ma’tangnga’mi tu Saul, nakua: Melo ke kubenni nabutung ia umpoyai, anna limanna to Filistin umpata’pai. Ma’kadami Saul lako Daud, nakua: Attu iate ma’penduannamoko la kupomanintu, ke mupasiolai.

²²Ma’kadami Saul lako tu mai to mase’ponna, nakua: Pokadan bunii Daud, kumua: Nakalo’moko penaanna datu sia mintu’ to mase’ponna umporaiko; melo ke mupasituru’mi tu la napomanintu datu.

²³Nabisikkimi mintu’ to mase’ponna Saul tu Daud umparampoi tu mintu’ kada iato; apa mebali tu Daud nakua: Misangaraka maraa tu napomanintu datu, anna aku te to makario-rio sia to bitti’?

²⁴Naparampomi to mase’ponna tu kada iato lako kalena, nakua: Iatu kada susito napebaliimo Daud.

²⁵Ma’kadami Saul nakua: Pokadanni Daud te kada iate: Tae’ nakabarii bangi datu tu somba, podo ke kuli’ salepe’ kamuaneanna dukato Filistin saratu’ kumua anna papakkanni tu mai ualinna datu. Belanna natangnga’ Saul, kumua anna sanggangi to Filistin tu Daud.

²⁶Naparampomi to mase’ponna datu tu kada iate lako Daud; napasituru’mi Daud tu la napomanintu datu.

²⁷Iatonna tae’pa nalambi’i atunna, ke’de’mi tu Daud sola taunna, anna patei tu muane to Filistin dua ratu’, anna baai Daud tu mai kuli’ salepe’ kamuaneanna tau iato mai, namale tau umpennoloanni lako datu ganna’ bilanganna, kumua anna pomanintui datu. Naelorammi Saul tu Mikhal, anakna napobaine Daud.

²⁸Susimoto nanii Saul ungkanassai sia unnissanni, kumua Narondong PUANG tu Daud. Iatu Mikhal, anakna Saul ungkamali’ Daud.

²⁹Iamoto nasamataku’-taku’na pissan tu Saul lako Daud. Naurungan napouali Saul tu Daud lan mintu’ katuoanna.

³⁰Ianna tassu’ tu mintu’ datu to Filistin, ke tassu’oi tu tau iato mai, inang Daud tu mandu maupa’ na iatu mintu’ taunna Saul, naurungan mandu dipakala’bi’ tu sanganna.