Read Toraja-Sa'dan 1 SAMUEL 20 Bible Online

1 SAMUEL 20 - Toraja-Sa'dan bible

1 SAMUEL 20

¹Ta’kala mallaimi tu Daud dio mai Nayot sikandappi’ Rama, sae umpellambi’i Yonatan, nakua: Apara tu kupogau’ sia apara tu kakelokangku sia apara tu kasalangku dio olona ambe’mu, anna la ungka’turi tu sunga’ku?

²Mebalimi tu Yonatan nakua: La mambela ia tu iannato, manassa tae’ mula dipatei. Iatu ambe’ku tae’ nabelai umpogau’ misa’ apa, la kapua, la bitti’, ke tang napokadanna’ dolo. Ma’apari nala umbunianra’ ambe’ku tu iannato? Tae’ nasusito.

³Umpalaomi sumpa tu Daud nakua: Naissan tongan ambe’mu kumua muporai tonganna’. Iamoto nama’tangnga’ nakua: Tae’ nala dipaissanni Yonatan te iannate, da napomasussai. Apa la tilelukraka tuoNa PUANG sia tuomu, manassa sangpentengkanri alla’ku na kamatean.

⁴Nakuami Yonatan lako Daud: Iatu apa naala penaammu, manassa la kupogaurangko.

⁵Nakuami Daud lako Yonatan: Masiang bulan ba’ru; allo iato iatu biasanna manassa unno’ko’na’ kumande sola datu. Totemo la mupalalona’ angku male umpembunian kaleku dio lu padang sae lako duangbongi makaroen.

⁶Ianna tirona’ ambe’mu kumua tae’na’ dioren, la mukua ma’kada: Napalaku-laku tongan Daud lako kaleku madomi’ male lako Betlehem, tondokna, belanna la umpogau’ pemala’ tu mintu’ pa’rapuanna dio susito biasanna, ke taunoi.

⁷Ianna kua siai datu melo, la marampa’ sia tu taummu, apa ianna mandu liu re’dek ara’na, tandaimi to kumua manassa la umpogau’mo kakadakean.

⁸Pa’petiroanni tu kamarurusammu lako taummu, belanna mangkamoki’ sibasse dio oloNa PUANG. Iake denni kakelokangku, iko bangmo umpateina’. Da’iomito musolanna’ lako ambe’mu.

⁹Nakuami Yonatan: Tae’ nala urrampoiko tu iannato! Apa iangku issan tonganni, kumua iatu ambe’ku manassa la umpogau’ kadake lako kalemu, ma’apai angku tang la umparampoangko?

¹⁰Nakuami Daud lako Yonatan: Mindara la sae umparampoanna’ ke nakada layukkimoko ambe’mu?

¹¹Nakuami Yonatan lako Daud: Maiko tatassu’ lako padang. Malemi sola duai lako padang.

¹²Nakuami Yonatan lako Daud: Umpalaona’ sumpa tete dio sanganNa PUANG, Kapenombanna to Israel, manassa la kupekutanan lako ambe’ku masiang ba’tu duangbongi agi-agi attu susite; ianna pomelonai Daud, tang la ussua bunira’ka tau sae umparampoangko tu iannato?

¹³Nasanggangmira PUANG tu Yonatan sia la Narangngannipa, ianna pamanassami ambe’ku la ungkadakeiko, manassa la kupokadan buniko, angku rampanangko male, ammu ke’de’ marampa’. Na PUANGmora urrondongko susi tonna rondong ambe’ku dolona.

¹⁴Ke tuo siapa’ attu iato, tang la ikoraka umpa’petiroanni lako kaleku tu kamarurusan muallu’ dio oloNa PUANG, dikua da angku mate dipongko?

¹⁵Da duka mupasikalangkai kamarurusammu tu bati’ku, moi anna attu ia dukato, ke Namangsanni PUANG tu mintu’ ualinna Daud lan mai te lino.

¹⁶Susimoto tu kasibasseanna Yonatan na bati’na Daud, kumua: PUANG la umpapakkanni tu mintu’ penggauranna to unnuali Daud.

¹⁷Napalaku Yonatan, kumua naumpalao sumpa tu Daud umposumpa pa’kaboro’na Daud lako kalena, belanna lantuk tongan penaanna ungkamasei.

¹⁸Nakuami Yonatan lako: Masiangmo nabulan ba’ru; naissanmi tau kumua tang dioko ren, belanna iatu inan kao’korammu lo’bang.

¹⁹Apa duangbongi la madomi’ko sae ammu male lako to’ inan munii membuni tonna dadi tu iannato, mudio la’pek batu Haezel.

²⁰La umpa’pananna’ tallu anak pana inde to diomu lu, butungna’ umpemeloi passanda.

²¹La ussuanna’ pia muane angku kuai: Maleko undaka’i tu anak pana iato. Iangku pemandui ma’kada lako pia iato: Tiroi, mainde mai tu anak pana iato, alai!, melo ke saeko lako kaleku, belanna den sia kamarampasan lako kalemu, la lelukraka tuoNa PUANG, moi misa’ tae’ kadakena.

²²Apa iangku kuai lako tu pia susite, kumua: Tiroi, mambela lako sidi’ tu anak pana, — melo ke maleko, belanna PUANG ussuako.

²³Iatu apa mangka tasibassei sola duaki’, manassa PUANG tu lan alla’ta tontong sae lakona.

²⁴Membunimi tu Daud dio lu padang. Na iatonna bulan ba’ru unno’ko’mi tu datu la kumande.

²⁵Unno’ko’mi tu datu dao kaderana susi biasanna sirondong rinding. Ke’demi tu Yonatan, na iatu Abner unno’ko’ dio sa’dena Saul, apa iatu inanna Daud lo’bang.

²⁶Iato allo iato tae’ bang apa napokada Saul, belanna nasanga: Umbai den sakkalanganna; tae’ namasero, manassa tae’ namasero.

²⁷Iatonna masiang, iamo allo ma’penduanna bulan, tonna lo’bangomo tu inanna Daud, ma’kadami Saul lako Yonatan, anakna, nakua: Apara bannangna natae’ra nasae tama pa’maruasan tu anakna Isai, sangmai’ sia allo iate?

²⁸Mebalimi Yonatan lako Saul, nakua: Mengkamoya tongan tu Daud umpalakui lako kaleku la male lako Betlehem.

²⁹Nakua: Eloranna’ dikka’ male, belanna den pemala’ lan tondok napogau’ pa’rapuangki sia kakangku kalena umpasanna’, iamoto ke naala siana’ penaammi, eloranna’ angku male sitiro siulu’ku. Iamoto anna tae’ nama’dio ren lan te pa’maruasanna datu.

³⁰Attu iato re’dekmi ara’na Saul lako Yonatan, anna ma’kada lako, nakua: E anak to tang massipa’ sia pabali-bali! Musangaraka tang kuissan kumua mupileimo tu anakna Isai, la umpakasiri’ko sia mupakasiri’ tu muninna sun dio indo’mu.

³¹Belanna lan mintu’ allo katuoanna anakna Isai dao kuli’na padang, manassa iko sia katuoammu tang marendeng. Iamoto suai tau lao unnalai, anna baai lako kaleku, belanna manassa la dipatei.

³²Apa mebali tu Yonatan lako Saul, ambe’na, nakua: Ma’apai anna la dipatei? Apara napogau’?

³³Naayakammi Saul tu dokena la urrokki. Anna tandai Yonatan, kumua kalebumo penaanna ambe’na la umpatei tu Daud.

³⁴Ke’de’mi tu Yonatan dio mai to’ meda, re’dek ara’na sia allo ma’penduanna bulan iato tae’ nakumande, belanna masussa penaanna ungkilalai Daud, saba’ nakabillan ambe’na.

³⁵Iatonna melambi’ dio mai, tassu’mi tu Yonatan namale lako padang, susitu mangka naallu’ lako Daud, sia ussolan pia misa’.

³⁶Nakuami lako tu pia: Maleko daka’i tu anak pana, tu la kupa’panan. Ma’dondomi tu pia iato, anna pa’pananni Yonatan tu misa’ anak pana ullendu’i.

³⁷Tonna rampo tu pia iato lako to’ inan anak pana, tu mangka napa’panan Yonatan, metambami tu Yonatan dio mai boko’ lako pia iato, nakua: Mambelapa lako sidi’ tu anak pana iato.

³⁸Metamba pole’omi tu Yonatan dio mai boko’ lako pia iato, nakua: Madoi’ko lako, da mutorro! Naalami tinde pia tu tinaran iato, anna sule lako puangna.

³⁹Moi misa’ tae’ natandai te pia tu iannato, sangadinna Yonatan manna sola Daud unnissanni.

⁴⁰Nabenmi Yonatan tinde pia tu pa’bunona lako, anna ma’kada nakua: Malemoko, baai te pa’buno iate tama tondok.

⁴¹Iatonna malemo tu pia iato, to’long lu lo’mi mai tu Daud, anna tukku rokko padang menomba pentallun; siudungmi sia sitangiran sola duai, naurunganni unni’duk-i’duk tumangi’ tu Daud.

⁴²Nakuami tu Yonatan lako Daud: Male marampa’moko, belanna manassa mangka tasibassei tete dio sanganNa PUANG, kumua: Na PUANGmora lan alla’na bati’ku sia bati’mu tontong sae lakona.

⁴³Mangkato ke’de’mi anna male; na iatu Yonatan sule tama tondok.