Read Toraja-Sa'dan 1 SAMUEL 27 Bible Online

1 SAMUEL 27 - Toraja-Sa'dan bible

1 SAMUEL 27

¹Undinnato ma’tangnga’mi Daud, nakua: Ba’tu umbami allo anna sanggangina’ Saul. Tae’ senga’na tu la kupomelo, sangadinna la malena’ umpentilindungan kaleku lako to Filistin; iake susito, manassa natoreimo Saul undaka’na’ lan mintu’ lili’na tana Israel sia tilendokmo’ dio mai limanna.

²Ke’de’mi tu Daud anna male sola tu tau annanratu’ nasolan, umpelambi’i Akhis, anakna Maokh, datu tondok Gat.

³Torromi tu Daud sola Akhis dio Gat sia iatu mai to nasolan, pada pantan sisola tau lan banuanna, sia Daud sola tu da’dua bainena, iamotu Ahinoam, to Yizreel na Abigail, pura bainena Nabal, to Karmel.

⁴Iatonna pokadami tau lako Saul tu diona Daud male lako Gat, natoreimi undaka’i.

⁵Nakuami Daud lako Akhis: Iake den siai mamasemi lako kaleku, mibenna’ inan sala umbanna misa’ lan kota iate, angku nii ma’tondok, belanna ma’apai angku la torro sola puang lan te kota kadatuan?

⁶Allo iato nabenmi Akhis tu tondok Ziklag; susimo bannangna to tu tondok Ziklag napomana’i mintu’ datu Yehuda sae lako allo iate.

⁷Iatu masainna Daud umpa’tondokki tondok to Filistin sangtaun patang bulan.

⁸Ke’de’mi tu Daud sola mintu’ taunna ullaoi tu to Gesur sia to Girzi sia to Amalek; belanna tau iato mai umpa’tondokki tondok ma’palusau’ Syur sae lako Mesir pirambongi’.

⁹Ianna taloomi Daud to tondok iato, tae’ napatuoi tu muane ba’tu baine sia narampa tu mintu’ domba sia sapi sia keledai sia unta sia tamangkale, anna sule mennolo lako Akhis.

¹⁰Iatonna kutanai Akhis kumua: Umbara munii palaoan allo iate? Mebalimi tu Daud, nakua: Rampe lu sau’na Yehuda sia rampe lu sau’na to Yerahmeel sia rampe lu sau’na to Keni.

¹¹Tae’ napatuoi Daud tu muane sia baine kumua da nadibaa lako Gat, belanna natangnga’, nakua: Da naparampoi tu apa tapogau’ sia napokadan tau, kumua susito sia susite tu napogau’ Daud. Susimoto tu kedona Daud temponna torro lan tondok to Filistin.

¹²Nakatappa’imi Akhis tu Daud anna ma’tangnga’, nakua: Umpakadake lelemo kalena dio lu bangsana, dio lu to Israel, iamoto la tontong kupotau sae lakona.