Read Toraja-Sa'dan 1 SAMUEL 28 Bible Online

1 SAMUEL 28 - Toraja-Sa'dan bible

1 SAMUEL 28

¹Attu iato narampunmi to Filistin tu mintu’ surodadunna la parari ullaoi to Israel. Nakuami Akhis lako Daud: La muissan kumua inang la tassu’ki’ sola surodadu iato la iko, la iatu taummu.

²Mebalimi Daud lako Akhis, nakua: Nanassa la mitiro sia tu apa la kupogau’. Nakuami Akhis lako Daud: Iamoto angku angka’ko ammu tontong umpenniroi kaleku.

³Iatu Samuel matemo namintu’ to Israel ma’pote dibolong, anna lamunni dio Rama, tondokna. Naali’mi Saul lan mai tondok tu mintu’ to sola-sola bombo sia mintu’ to pakita-kita.

⁴Saemi tu to Filistin sirampun anna pabendanni tu tendana dio Sunem. Narampunmi Saul tu mintu’ to Israel, anna pabendanni tu tendana dao Gilboa.

⁵Iatonna tiromi Saul tu surodadu to Filistin, mataku’mi sia lendu’ ma’parondona penaanna.

⁶Mekutanami tu Saul lako PUANG, apa tang Napebalii PUANG, la tete dio pangimpi, ba’tu Urim, ba’tu nabi.

⁷Ma’kadami Saul lako taunna, nakua: Dakaranna’ misa’ baine pakita bombo, angku nii lao umpalaku pa’timbangan. Nakuami tu taunna lako: Dio En-Dor den misa’ baine pakita bombo.

⁸Umbalilimi kalena tu Saul sia nasondai tu pakeanna, anna male sola tau da’dua, anna rampo sola tallui lako baine iato tonna bongi; anna ma’kada Saul, nakua: Tiro-tiroanna’ lalan tete dio bombo to mate, sia pamalimbangunanna’ tu to kupokadangko.

⁹Mebalimi tu baine iato lako, nakua: Inang miissanmo tu penggauranna Saul, umba nakua ussabu’i tu to pakita bombo sia to pakita-kita lan tondok iate. Totemo ma’apai ammi tananni poya tu penaangku la umpateina’?

¹⁰Umpalaomi sumpa tu Saul lako tete dio sanganNa PUANG, nakua: La lelukraka tuoNa PUANG, nala urrampoiko kamasussan belanna apa iate.

¹¹Ma’kadami tu baine iato nakua: Mindara tu la kupamalimbangunangkomi? Mebalimi nakua: Pamalimbangunanna’ Samuel.

¹²Iatonna tiromi baine iato tu Samuel, melallakmi umpekapuai gamaranna, nakua lako Saul: Ma’apai ammi pakenana’, belanna kamu te Saul bangsiamo.

¹³Ma’kadami datu lako, nakua: Da mumataku’. Apa tu mutiro? Ma’kadami tu baine lako Saul, nakua: Kutiro den tu apa susi deata kendek diong mai padang.

¹⁴Nakuami lako: Matumbai rupanna? Mebalimi tu baine iato: Iatu to kendek diong mai, misa’ to matua muane umpennammu’ paramba’. Iatonna issanmi Saul kumua iamo Samuel to, tukkumi sae rokko padang anna menomba.

¹⁵Nakuami Samuel lako Saul: Ma’apai mirosona’ sia mipamalimbangunna’? Nakuami Saul: Pussak maro’mo’, belanna sirarimo’ to Filistin na iatu Puang Matua toyangmo dio mai kaleku, tae’mo Napebaliina’, la tete dio pudukna nabi ba’tu tindo; iamoto angku tambaikomi, ammi pokadanna’ apa tu sipatu la kupogau’.

¹⁶Nakuami Samuel: Ma’apai mikutanaina’, Natoyangmo tu PUANG dio mai kalemi sia siualimokomi?

¹⁷Napogau’mo PUANG tu apa Napokada tete dio pudukku pirambongi’, anNa sintakki tu kadatuan dio mai kalemi, Nasoronganni to mase’ponmi, iamotu Daud.

¹⁸Belanna tae’ mituru’i tu kadanNa PUANG sia tae’ mipalaloi tu kasengkean maparrangna lako to Amalek, iamoto Naparampoikomi PUANG allo totemo, te iannate.

¹⁹Sia PUANG la ussorongkomi sola to Israel lako to Filistin sia masiang iatu kamu sola tu mai anakmi muane la indemo te inan kunii, sia la Nasorong PUANG tu surodadu to Israel lako to Filistin.

²⁰Pakalan songkami tu Saul sumpandan diong padang, belanna iatu kadanna Samuel napotiramban tongan. Sia tae’mo tu kamatotoranna, belanna sangallo sangbongimo tae’ apa nakande.

²¹Saemi tu baine iato urreke’ Saul; tonna tiroi tu datu lendu’ tirambanna, nakuami: Aku te, kaunanmi, kuturu’mo tu kadanna puangku; kupopa’elo’na tu penaangku, angku turu’i tu kadammi tu mipokadanna’.

²²Melo duka ke naturu’i puangku tu kadanna kaunanmi; iamoto la kupalennarangkomi roti sidi’; la mikande ammi matoto’ sule lumingka.

²³Apa manoka, nakuami: Tae’ angku la kumande. Nanaran-naranmi taunna sola baine iato tu datu, pakalan naturu’mi, anna malimbangun diong mai padang anna unno’ko’ dao inan mamma’.

²⁴Denmi dio to’ banuanna tu baine iato misa’ anak sapi malompo madomi’mi narere’ sia naala tu ta’pung; nalemun-lemun anna tunui dadi pa’ranggina tang diragii.

²⁵Napalennaranni Saul sola taunna; kumandemi tu tau iato. Mangkato ke’de’mi sola tallui anna male to bongi ia dukato.