Read Toraja-Sa'dan 1 SAMUEL 30 Bible Online

1 SAMUEL 30 - Toraja-Sa'dan bible

1 SAMUEL 30

¹Iatonna allo ma’pentallun rampomi tu Daud sola mintu’ taunna lako Ziklag, naappa’mi puramo nalaoi to Amalek tu padang ma’palusau’ sia tondok Ziklag; iatu tondok Ziklag natalo sia pura naballa.

²Narampami tu mintu’ baine lan tondok iato, randuk dio mai bitti’na sae lako kapuana, moi misa’ tae’ napatei, sangadinna nabaa nasang anna sule lako tondokna.

³Iatonna rampomo tu Daud sia mintu’ taunna lako tondok iato, natiromi tu tondok puramo nakande api sia mintu’ bainena sia anakna muane sia anakna baine dirampa nasangmo.

⁴Ma’urrukammi tu Daud sola mintu’ to nasolan unnangle-angle tongan, naurungan tang nabelamo tumangi’.

⁵Ia duka tu bainena Daud sola duai dirampa, iamotu Ahinoam, to Yizreel sia Abigail pura bainena Nabal, to Karmel.

⁶Kapussakan tongan tu Daud, belanna iatu to buda sipa’kada-kada la untumbui batu, belanna kamapallanna penaanna tu to buda, tu diona anakna muane sia diona anakna baine, apa iatu Daud umpabatta’ penaanna urrannuan PUANG, Kapenombanna.

⁷Ma’kadami Daud lako to minaa Abyatar, anakna Ahimelekh: Baanna’ mai tu epo’. Nabaami Abyatar tu epo’ lako Daud.

⁸Mekutanami tu Daud lako PUANG, nakua: Ma’dinraka kuula’i tu kaponan iato? La kulambi’ siaparaka? Nabalimi Puang nakua: Ula’imi, belanna la mulambi’pa sia manassa la murampanan nasang.

⁹Attu iato malemi tu Daud sola tu tau annanratu’ nasolan, rampomi lako salu Besor. Denmi ba’tu pira-pira tau torro dio.

¹⁰Apa iatu Daud tarru’ mangula’ sola tu taunna a’pa’ratu’, na iatu duaratu’na torro, belanna mandumo bo’yo’, naurungan tae’mo nakullei ullambanni tu salu Besor.

¹¹Denmi to Mesir naappa’ tau iato mai dio lu padang, anna baai lako Daud sia naben roti anna kandei sia napairu’ uai;

¹²sia naben dukapa sangrere’ tu bua ara sanglemun sia da’dua deppa bua anggoro’ dirangkei, nakandei namane malapu’ sule, belanna tallung allo tallung bongimo tang kumande sia tang unniru’ uai.

¹³Mangkato nakuami Daud lako: Mindarako tau te sia umbara munii sae? Mebalimi tu to Mesir: Aku te to Mesir, to mangurana’, kaunanna misa’ to Amalek. Natampena’ puangku, belanna tallungallomo’ masaki.

¹⁴Mangkamokan ullaoi Padang to Kereti rampe lo’na lu, na padang lili’na Yehuda sia padang to Kaleb rampe lo’na lu, sia tondok Ziklag pura kiballa.

¹⁵Nakuami Daud lako: Ma’dinrakannika musolan rokko kaponan iato? Mebalimi: Iake umpalaokomi sumpa lako kaleku tete dio Puang Matua, kumua tae’ sia mila umpateina’ sia tae’ duka mila ussorongna’ lako puangku, ma’dinkomi kusolan lako kaponan iato.

¹⁶Nasolammi rokko. Sangtiamparammi tu tau iato mai dio padang iato marasan kumande sia mangiru’ sia ma’marua’-rua’ belanna mintu’ pangrampa kapua tu narampa dio mai tondok to Filistin sia tondok to Yehuda.

¹⁷Napepami la’bo’ Daud tu tau iato mai randuk dio mai masiangna sae lako makaroenna tu allo ma’penduanna, na moi misa’ tau tae’ lussu’ sangadinna a’pa’ratu’ pia muane tu mallai ma’unta.

¹⁸Naala nasangmi Daud sule tu apa narampa to Amalek sia naala dukamo sule tu bainena sola duai.

¹⁹Moi misa’ tae’ su’pik la bitti’na la kapuana, la pia muane la pia baine, la pangrampa, la iatu mintu’ narampana uali; napasule nasangmo Daud.

²⁰Sia naala Daud tu mintu’ domba sia sapi; narambai tau napadolo dio mintu’ patuoan senga’, anna ma’kada nakua: Iamote tu pangrampana Daud.

²¹Iatonna rampomo Daud lako to duaratu’ tu tarru’ bo’yokmo, naurungan tang nabelamo unturu’ Daud, anna tampei dio salu Besor, saemi tu tau iato mai untammui Daud sola mintu’ to nasolan. Iatonna rampomo Daud lako tau iato mai, napekutanammi tu kamalaga’-lagaranna.

²²Mebalimi tu mintu’ to kadake sia to kelok dio lu tu to buda, tu unturu’ Daud ma’kada nakua: Belanna tae’ tamale sola tu tau iato mai, da tabenni tu pangrampa, sangadinna ia manna tu mai bainena sia anakna, elo’namo napantan male umbaai.

²³Apa nakua Daud: Da mima’pasusi to, e siulu’ku, tu apa Nakamaseangki’ PUANG; mangkamoki’ Nakaritutui Puang sia Nasorongmo lako kaleta tu uali, tu sae ullaoiki’.

²⁴Mindara la unturu’i tu kadammi lan kara-kara iate? Sangadinna susi taana to male parari, susi duka taana to torro ungkampai parea; la nataa pada tau iato mai.

²⁵Tontongmi susito randuk allo iato sia undinna, belanna napadadimo Daud misa’ ada’ sia atoran dio lu to Israel sae lako allo iate.

²⁶Iatonna rampomo Daud lako Ziklag, napakatumi pira tu pangrampa iato lako mintu’ pekaamberanna to Yehuda, tu naposangmane, nakua: Iamote tu pangrampa dio mai ualinNa PUANG, dipa’kamasean pira lako kalemi.

²⁷Iamotu lako mintu’ pekaamberan dio Betel sia dio Ramot, dio lu padang rampe lu sau’, sia dio Yatir;

²⁸sia lako pekaamberan dio Aroër, sia dio Sifmot sia dio Estemoa,

²⁹sia lako pekaamberan dio Rakhal sia dio lu mintu’ tondok to Yerahmeel sia dio lu tondok to Keni,

³⁰sia lako pekaamberan dio Horma, sia dio Bor-Asan sia dio Atakh,

³¹sia lako pekaamberan dio Hebron, sia lako mintu’ inan tu nanii Daud salamba-salao sola mintu’ taunna.