Read Toraja-Sa'dan 1 SAMUEL 31 Bible Online

1 SAMUEL 31 - Toraja-Sa'dan bible

1 SAMUEL 31

¹Sirarimi to Filistin tu to Israel, anna mallai tu to Israel, dio mai tingayona to Filistin sia mate tibambang dao buntu Gilboa.

²Naduttu’ bangmi to Filistin tu Saul sia iatu mai anakna, anna patei tu Yonatan sia Abinadab sia Malkisua, anakna tallu Saul.

³Maparrangmi tu rari umpatu Saul; iatonna tiromi to ma’pana tu Saul, ma’parondomi ungkataku’i tu to ma’pana.

⁴Ma’kadami Saul lako bentarana, nakua: Nonokki tu pa’dangmu, mutobokna’, ke da duka na iate to tang disunna’ sae untobokna’ sia unna’ga-a’gana’. Manokami tu bentarana, belanna lendu’ mataku’na la umpogau’i to, iamoto naala kalenai Saul tu pa’dang, anna songkanni tu kalena rokko.

⁵Iatonna tiromi bentarana tu Saul matemo, nasongkan dukaomi tu kalena rokko pa’dangna, anna mate sola datu.

⁶Pada matemi Saul tu anakna tallu sia bentarana sia surodadunna to allo ia dukato.

⁷Iatonna tiromi to Israel rampe lakona rante sia sambalinna lu Yordan kumua mallaimo tu to Israel sia matemo tu Saul sola anakna tallu, natampemi tu mintu’ tondok anna mallai. Saemi tu to Filistin anna torro lan.

⁸Iatonna masiangmo dio mai, tonna saemo tu to Filistin urrampa apanna mintu’ to dipatei, naappa’mi tu Saul sola tu anakna muane tallu sumpandan bangmo dao buntu Gilboa.

⁹Napoloi tu ulunna sia nalossokan tu mintu’ pa’bunona, nasuai tu tau male ullelei tu lili’na mintu’ tondok Filistin la umpatale’i tu kareba melo iato lan lu mintu’ banua dipa’deatainna sia lako mintu’ to buda.

¹⁰Mintu’ tu pa’bunona Saul napalan banua pa’deatan Astoret sia iatu batang rabukna natoke’ dio rinding tembo’ tondok Bet-Sean.

¹¹Iatonna rangimi to lan Yabes dio Gilead tu penggauranna to Filistin lako Saul,

¹²sangtiangkarammi tu mintu’ surodadu, anna lumingka tu’tu’ bongi, anna popengkalaoi tu batang rabukna Saul sia batang rabukna anakna tallu dao mai rinding tembo’ Bet-Sean. Iatonna rampomo lako Yabesy, natunumi tu batang rabuk inde to.

¹³Sia narampun tu mintu’ bukunna nalamunni diong garonto’ kayu tamarisa’ dio Yabesy; mangkato ma’puasami tu tau iato pitung allo.