Read Toraja-Sa'dan 1 SAMUEL 4 Bible Online

1 SAMUEL 4 - Toraja-Sa'dan bible

1 SAMUEL 4

¹Iatu kadanna Samuel landa’ lako mintu’ to Israel. Tassu’mi tu to Israel umpessitammui to Filistin la sirari, anna pabendanni tu tendana sikandappi’ Eben-Haezer, na iatu to Filistin umpabendan tendana sikandappi’ Afek.

²Iatu to Filistin ma’pampangan umpessitammui to Israel, anna sipakarua’ sirari, nataloi to Filistin tu to Israel, anna patei tu to Israel dio lu padang nanii sirari agi-agi patangsa’bu.

³Iatonna sangsuleammo tu tau lako to’ tendana nakuami mintu’ tu pekaamberan to Israel: Ma’apari te allo iate Napopa’elo’nariki’ PUANG natalo to Filistin? Maikomi tamale unnala patti basseNa PUANG dio mai Silo, anna dio kaleta kumua anna rampananki’ dio mai limanna ualinta.

⁴Disuami tu tau lako Silo, anna baai dio mai tu patti basseNa PUANGna mintu’ ma’dandan maritik, tu unnisung dao karubion; na iatu anakna Eli sola duai, iamotu Hofni na Pinehas dio sola tu patti basseNa Puang Matua.

⁵Iatonna rampomo tu patti basseNa PUANG lako to’ tenda surodadu, unnarrak-arrakmi tu mintu’ to Israel lendu’ mamakna, naurunganni parodo tu padang.

⁶Iatonna rangimi to Filistin tu arrak iato, nakuami: Arrak apara ia tu mamak kadake dio to’ tenda surodadunna to Ibrani? Attu iato narangimi kumua iatu pattinNa PUANG rampomo tama to’ tenda surodadu iato.

⁷Iamoto namataku’ tu to Filistin, belanna nakua: Saemo tu Puang Matua tama to’ tenda surodadu iato, sia nakuapa: A’a upu’mo allota, belanna tae’ bangpa nadadi tu iannate, la sangmai’, la duangbongi’.

⁸A’a mandasamoki’, belanna mindapara la urrampanangki’ dio mai limanna tu deata sumpu makuasa iato? Iamora te deata iate tu umparampoi to Mesir ma’rupa-rupa kamaparrisan dio padang pangallaran.

⁹La baranikomi sia la lalongkomi, e to Filistin, da napokaunankomi to Ibrani, susi tommi pokaunanni tu tau iato mai. Pa’pekitananni tu kapia muaneammi ammi parari tongan-tongan.

¹⁰Pararimi tu to Filistin, anna taloi tu to Israel, sisarambuammi mallai sola nasangi, pantan sule lako to’ tendana; nalendu’ ia budanna dipongko, naurunganni siapanammo mate tu to Israel tallungpulo sa’bu, iamotu surodadu ma’lingka.

¹¹Sia iatu pattinNa Puang Matua dirampa na iatu anakna Eli sola duai, iamo tu Hofni na Pinehas, matemo.

¹²Lussu’mi misa’ to Benyamin dio mai pa’telangan kasirarian anna rampo lako Silo allo ia dukato, titepu-tepu bangmo tu tamangkalena sia barra’-barra’ daomo ulunna.

¹³Tonna rampomo, iatu Eli unno’ko’ dao kadera dio biring lalan ma’peagi-agi, belanna selang tu penaanna ungkilalai pattinNa Puang Matua. Rampomi tinde tau umpakarebai tama kota, anna siurrukan tu mintu’ pa’tondokan.

¹⁴Narangimi Eli tu tau siurrukan, nakuami: Kamarukkan apara te? Madomi’mi tinde tau sae umpokadanni Eli tu kareba iato.

¹⁵Iatu Eli kaseramo pulona ngkarua taunna dadinna sia maraunmo tu matanna, tae’mo napatiro.

¹⁶Nakuami tu tau iato lako Eli: Iatu aku te lu diona’ mai pa’telangan kasirarian; allo ia duka te angku mallai dio mai pa’telangan kasirarian. Nakuami Eli: Apara dadi dio, e anakku?

¹⁷Mebalimi tu to umbaa kareba nakua: Iatu to Israel mallaimo naula’ to Filistin, ondongpi ditalo kapuamo tu tau iato mai, ia duka tu anakmi sola duai, Hofni na Pinehas mate dukamo sia iatu pattinNa Puang Matua dirampamo.

¹⁸Iatonna uleleanmi tu diona pattinNa Puang Matua, songkami tu Eli dao mai kaderana tungara dio sa’de babangan tondok, nalesok pasallona, anna mate, belanna matuamo, sia to malompo; patangpulo taunna urrengnge’ to Israel.

¹⁹Iatu minintunna, tu bainena Pinehas, attu iato mabanda’ ma’tambuk. Tonna rangimi tu kareba, kumua dirampamo tu pattinNa Puang Matua sia matemo tu matusanna sia muanena, mendemme’mi, anna kianak, belanna ta’pa naratui kapanguriasan.

²⁰Iatonna la matemo, nakuami tu mintu’ baine untikui: Da mumataku’, belanna undadian siako pia muane. Apa tae’ napebalii sia tae’ napalan penaai.

²¹Nasangaimi tu pia’-pia’ iato Ikabod, nakua: Iatu kamala’biranna Israel malemo dibaa, belanna iatu pattinNa Puang Matua dirampa sia iatu matusanna sia muanena matemo.

²²Iamoto nakuami: Iatu kamala’birana Israel malemo dibaa, belanna dirampamo tu pattinNa Puang Matua.