Read Toraja-Sa'dan 1 SAMUEL 6 Bible Online

1 SAMUEL 6 - Toraja-Sa'dan bible

1 SAMUEL 6

¹Iatonna ma’pitung bulanmo tu pattinNa PUANG dio tondok to Filistin,

²natambaimi to Filistin tu mintu’ to minaa sia to pakita-kita, nakua: La kipatumbai tu pattinNa PUANG? Pokadangkanni umba la kipakuanni umpasulei lako to’ inanna?

³Mebalimi tu tau iato mai, nakua: Iammi la umpasulei tu pattinNa Kapenombanna to Israel, da mipasule lo’bangi, sangadinna la mitongan-tonganni ussorongan pamengan la ullendokan kasalan; nasusito, ammi mondo sia mikanassai kumua apa bannangna na iatu limanNa tang soro’ dio mai kalemi.

⁴Mekutanami tu tau iato mai, nakua: Umbara la susitu pamengan ullendokan kasalan tu sipatu la kisoronganni? Mebalimi nakua: Limang batu kele bulaan sia lima balao bulaan, situru’ bilanganna mintu’ arung kota to Filistin, belanna sangrupari tu kasanggangan urrampoiki’, susi dukato tu mintu’ arung kotami.

⁵Iamoto garagaimi tu rapang-rapang kelemi sia rapang-rapang balao, tu ussanggangi pa’padangan sia pakala’bi’I tu Kapenombanna to Israel; Napamaringngan siai manii tu limanNa unti’tin kalemi sola nasang sia mintu’ deatammi sia tondokmi.

⁶Ma’apari ammi pamakarra’i tu penaammi susito Mesir sia Firaun? Tang naeloranraka male tu tau iato mai, tonna mangka umpa’pekitananni Puang tu kuasanNa, nake’de’ male tu to Israel?

⁷Garagami misa’ kareta ba’ru ammi ala indo’ sapi da’dua tu umpasusunnapa anakna, tu tae’ bangpa nadipapassanni ayoka; pariu’imi sapi tu kareta, ammi pasulei tu anakna dio mai boko’na tama bala.

⁸Mangkato mialai tu pattinNa PUANG, ammi palanganni kareta sia patamai misa’ patti bitti’ dio sa’dena tu mintu’ pareanan bulaan, tu la misorongannI, iamotu pamengan la ullendokan kasalan. Ammi popa’elo’nai male unturu’ pa’poraianna.

⁹Tiro meloi, ianna ma’palulako lili’ tondokna, iamotu Bet-Semes, manassamo kumua Puang umparampoi tu kasanggangan kapua iate lako kaleta. Apa iake tae’i nama’palulako, taissanmo kumua tangia limanNa umpandasaki’, sangadinna inang toto’tamo kita.

¹⁰Napogau’mi tau iato mai susito, naalai tu sapi da’dua, tu umpasusunnapa anakna, napariu’i kareta, anna pebalai tu anakna.

¹¹Napalanganmi kareta tu pattinNa PUANG sia iatu patti bitti’ nanii balao bulaan sia rapang-rapang bundangna.

¹²Tarru’ bangmi male tinde sapi ma’palulako Bet-Semes, urrundu’ bang batatta sia mukkun ma’ngoe’ lolanan, tang sumepang kanan ba’tu kairi, naundi bang tu mintu’ arung kota to Filistin unturu’i sae lako lili’na Bet-Semes.

¹³Attu iato iatu to Bet-Semes marassan megandung diong lombok; iatonna bangunan matanna, natiromi tu patti iato, anna parannu tu penaanna.

¹⁴Rampomi tu kareta iato lako pa’lakna Yosua, to Bet-Semes, anna torro dio; denmi dio tu misa’ batu kapua, napiakki tau tu pa’kayuan kareta anna pemalaranni tu sapi da’dua lako PUANG la dipopemala’ ditunu pu’pu’.

¹⁵Napopengkalaomi to Lewi tu pattinNa PUANG sia iatu patti bitti’ dio sa’dena nanii pareanan bulaan, anna patorroi dao batu kapua iato, na allo ia dukato napemalaranni mintu’ to Bet-Semes lako PUANG, tu pemala’ ditunu pu’pu’ sia pemala’ direre’.

¹⁶Iatonna tiromi arung kota to Filistin sola limai tu iannato, sulemi lako Ekron tonna allo ia dukato.

¹⁷Iamote tu mintu’ bundang bulaan, tu nasorong to Filistin lako PUANG la ullendokan kasalan, iamotu Asdod sangbatu, Gaza sangbatu, Askelon sangbatu, Gat sangbatu na Ekron sangbatu.

¹⁸Ia duka tu balao bulaan pada bilanganna tondok to Filistin tu naparenta lima arung kota, randuk dio mai tondok ma’tambakuku sae lako kampong. Iatu tanda kasa’bianna iamotu batu kapua, tu nanii tau umpatorro pattinNa PUANG dao, dio pa’lakna Yosua, to Bet-Semes.

¹⁹Nasanggangmi Puang tu to Bet-Semes, belanna napenunu tu pattinNa PUANG; iatu pa’tondokan Nasanggang pitungpulo. Attu iato ma’pote dibolongmi umbating tu tau iato mai, belanna Nasanggang tongan PUANG.

²⁰Nakuami tu to Bet-Semes: Mindara umbelai la bendan dio oloNa PUANG, tu kapenomban maindan susite? Namindamora la Nanii tilele dio mai kaleta?

²¹Nasuami tu pesua lako to Kiryat-Yearim umpokadai kumua: Nabaamo to Filistin sule tu pattinNa PUANG, malekomi rokko ammi baai diong mai.