Read Toraja-Sa'dan 1 SAMUEL 8 Bible Online

1 SAMUEL 8 - Toraja-Sa'dan bible

1 SAMUEL 8

¹Iatonna matuamo tu Samuel, naangka’mi tu anakna muane da’dua la dadi to parengnge’na to Israel.

²Iatu anak pa’bunga’na disanga Yoël na iatu ma’penduanna disanga Abia, ullembangan toean to parengnge’ sola duai dio Bersyeba.

³Apa iatu anakna tae’ naturu’ bate lalanna ambe’na, sangadinna ungkabudai kamanengkengan, ungkande pappe’ sia ulleko’ katonganan.

⁴Iamoto anna sirampun tu mintu’ pekaamberan to Israel, anna male nasang mennolo lako Samuel dio Rama.

⁵Anna ma’kada lako nakua: Matuamokomi sia iatu anakmi tae’ naturu’ bate lalanmi, iamoto la miangkarangkan misa’ datu, anna rengnge’kan susi ada’na bangsa senga’.

⁶Kadakemi nasa’ding Samuel te kada iate, tonna kuai tu tau iato mai: Benkanni misa’ datu la urrengnge’kanni. Massambayangmi tu Samuel lako PUANG.

⁷Ma’kadami tu PUANG lako Samuel Nakua: Tarimai tu apa napalaku te bangsa iate lako kalemu, belanna tae’ na iko tu natumpu, sangadinna Aku, kumua da’mo angKu datui.

⁸Susitu mintu’ penggauranna tau iato mai randuk dio mai allo Kunii ussolanni tassu’ lan mai tondok Mesir sae lako allo iate, iamotu naboko’iNa’ anna turu’ kapenomban senga’, susi dukamo penggauranna tau iato mai lako kalemu.

⁹Totemo tarimai tu palakunna, apa pakainga’ tonganni tu tau iato mai sia pokadanni tu ada’ datu, tu la umparentai.

¹⁰Naparampomi Samuel tu mintu’ kadanNa PUANG lako tau iato mai, tu umpalaku misa’ datu lako kalena,

¹¹sia nakua: La susite tu ada’na datu la umparentakomi; la naala tu mai anakmi muane napotomengkarangi dio to’ karetana sia napotomangkambi’ darang, sia to napopa’dondo-dondo dolo dio tingayo karetana.

¹²Sia la napopendadi kamandang lako sangsa’bu tau sia kamandang lako limangpulo tau sia la untengkoanni pa’lakna sia la umpegandunganni dio lu bela’na sia la unggaragai pa’bunona sia mintu’ parea karetana.

¹³Iatu anakmi baine la naala, napotomanggaraga minna’ busarungngu’ sia to ma’nasu sia to ma’deppa.

¹⁴Sia mintu’ bela’mi sia mintu’ pa’lak anggoro’mi sia mintu’ pa’lak saitunmi tu mandunna melo la naala, nabenni taunna.

¹⁵Sia dio mai mintu’ bura padangmi sia mintu’ bua anggoro’mi la naala taa sangpulona, la naben mintu’ to mase’ponna sia mintu’ taunna.

¹⁶Ondong pissanpi iatu mintu’ kaunanmi muane sia mintu’ kaunanmi baine sia to mangurammi tu mandunna melo sia ia duka tu keledaimmi la naala, la napake lako pengkaranganna.

¹⁷Sia dio mai mintu’ dombami sia bembe’mi la naala taa sangpulona sia la napokaunankomi sola nasang.

¹⁸Tonganna allo ia dukato, ammi la melallak sia sumarro diona datummi tu mipilei, apa tae’ duka anNa la umperangiikomi PUANG to allo iato.

¹⁹Apa manoka tu tau umperangii tu kadanna Samuel, sangadinna nakua: Moi umba nakua, inang la den tu datungki.

²⁰Iake susimito, la padamokan tu bangsa senga’; la narengnge’kan tu datungki, la nadoloangkan sia la napana’ta’ tu mintu’ raringki.

²¹Iatonna rangimi Samuel tu kadanna tau iato mai napalanda’mi lako PUANG.

²²Ma’kadami PUANG lako Samuel: Turu’i tu kadanna sia tokkoanni misa’ datu. Mangkato nakuami Samuel lako mintu’ to Israel: Pada sulemokomi lako kotami.