Read tshiluba Genese 16 Bible Online

Genese 16 - tshiluba bible

Genese 16

¹Salai, mukashi wa Abalama, kakamulelela bana nansha, wakadi ne mukashi muena mudimu, Muena Ejipitu, dina diandi Haga.

²Salai wakambila Abalama ne, Mona, Yehowa wakumpidisha bua kulela, ndi nkutendekena ne, Uye biebe kudi mukashi, muena mudimu wanyi, binamanya mua kuheta bana kudiye Abalama wakitabusha di dia Salai.

³Hakashikama Abalama mu buloba bua Kanâna to bidimu dikumi, Salai, mukashi wa Abalama, wakangata Hagâ, Muena Ejipitu, muena mudimu wandi, wakamuha kudi Abalama, mulume wandi, amubake bu mukashi wandi.

⁴Wakaya kudi Haga ne yeye wakimita difu, hakatangileye ne, Nakuimita difu, yeye wakalengulula mukelenge wandi mukashi.

⁵Salai wakambila Abalama ne, Bubi buanyi buikale kûdi wewe nakafila mukashi muena mudimu wanyi mu tshiadi tshiebe, ne hakamoneye ne, Nakuimita difu, yeye wakundengulula, Yehowa alumbuluile tshilumbu tshidi hankatshi hetu nʼebe.

⁶Kadi Abalama wakambila Salai ne, Mona, muena mudimu webe udi mu tshianza tshiebe, umuenzele bu mûdi musue Salai wakamuenzela bibi ne yeye wakanyema ku mesu kuandi.

⁷Muanjelo wa Yehowa wakamusangana hehi ne mushimi wa mai wa mu tshihela, mushimi eu udi mu nshila wa ku Shû.

⁸Yeye wakebesha Hagâ, mukashi muena mudimu wa Salai, ne, Wakufuma kudi kunyi? Uyaya kudi kunyi? Yeye wakamuandamuna dî ne, Ndi munyeme ku mesu kua mukelenge wanyi mukashi Salai.

⁹Muanjelo wa Yehowa wakamuambila ne, Hingana kudi mukelenge webe mukashi, udikokeshe mu tshianza tshiandi.

¹⁰Muanjelo wa Yehowa wakamuambila ne, Nenkumbashile tunkanunuina biebe, tuikale bia bungi, kabena mua kutubala bua bungi bualu.

¹¹Muanjelo wa Yehowa wakamuambila ne, Tangila, wewe udi ne difu, neulele muana mulume, neumuidike dina ne, Yishemaele, bualu bua Yehowa wakunvua dikenga diebe.

¹²Yeye neikale bu nyama wa mpunda udi ne luonji munkatshi mua bantu, tshianza tshiandi netshiluishe muntu yonso, ne tshianza tshia muntu yonso netshimuluishe kabidi, yeye neikale mutangilangane ne bana babo bonso

¹³Yeye wakidika Yehowa wakamuambila malu au ne, Wewe udi Nzambi udi utangila, bualu bua yeye wakamba ne, Nakamana kumona Nzambi, munyi mundi nshala ne muoyo?

¹⁴Nunku yeye wakidika mushimi wa mai ne, Bê-laha-loi (kukudimuna kua muaku ne, Mushimi wa Nzambi wa muoyo utu wantangila) udi hankatshi ha Kadesha ne Belede.

¹⁵Hagâ wakalelela Abalama muana mulume Abalama wakidika dina dia muana wakamulelela Hagâ ne, Yishemaele.

¹⁶Abalama wakadi muikale ne bidimu makumi muanda mukulu ne bisambombo, hakamulelela Haga Yishemaele.