Read tshiluba Genese 18 Bible Online

Genese 18 - tshiluba bible

Genese 18

¹Yehowa wakamueneka kudi Abalahama hehi ne mitshi ya telebinta ya Mamale hakadiye ushikama ku mbelu kua ntenta wandi munda munya.

²Yeye wakabandisha mesu andi, wakatangila balume basatu bimane ku mpala kuandi, hakabatangileye, wakabika ku mbelu kuandi, wakaya lubilu bua kubakidila, wakabakukuila,

³wakamba ne, Mukelenge wanyi, biwikala ne luse kundi, ndi nkutendekena ne, Kuhitshi muntu webe.

⁴Nuitabushe balue ne mai, nuvuwe makasa enu, nuikishe bienu mu diledi dia mutshi,

⁵nendue ne bintu bia kudia bikese, nukoleshe mitshima yenu hashishe nudi mua kuhita, bualu bua nuenu nuakulua kudi muntu wenu Bakamuambila ne, Enza biebe bu muwakuamba.

⁶Abalahama wakabuela mu ntenta lubilu kudi Sala wakamuambila ne Wangate bihiminu bisatu bia bukula lubilu, usangakashe, ulambe mikata.

⁷Abalahama wakaya lubilu ku tshisumbu tshia ngombe, wakangata lukungulu lua ngombe luakadi lutekete ne luimpe, wakalufila kudi muntu wandi, ne yeye wakaluhandulula lubilu.

⁸Yeye wakangata manteke ne mabele ne lukungulu lua ngombe luakalambabo, wakabiteka ku mpala kuabo. Yeye wakimana ha buihi nʼabo muinshi mua mutshi hakadibo badia.

⁹Bakamukonka ne, Sala, mukashi webe, wehi? Yeye wakamba ne, Udi mu ntenta.

¹⁰Yeye wakamba ne, Bulelela, hakumbana ngondo, nempingane kûdi, ne mona, Sala, mukashi webe, neakulelele muana mulume Sala wakunvua dî diandi hakadiye mu ntenta ku mpenge kua tshibi, wakadi ku nyima kua muanjelo.

¹¹Abalahama ne Sala bakadi ne bidimu bia bungi, bakadi bakoke, miloû ya bakashi yakashika kudi Sala.

¹²Sala wakadi useka munda munda, wamba ne, Meme nakulua mukoke ne mukelenge wanyi muikale mununu kabidi, nengikale ne disanka, anyi?

¹³Yehowa wakakonka Abalahama ne, Sala wakaseka bua tshinyi, wamba ne, Meme nendele muana, hankadi mukoke aha, anyi?

¹⁴Tshintu tshidi mua kuhita Yehowa bukole, anyi? Ku dituku dinakasungula nempingane kûdi, hakumbana ngondo yandi, Sala nealele muana mulume.

¹⁵Sala wakadia ne, Tshiakaseka, bualu bua yeye wakadi utshina. Kadi muanjelo wakamuambila ne, Bulelela, wewe wakaseka.

¹⁶Bantu aba bakabika, bakatangila ku Sodoma, ne Abalahama wakaya kubashindikila mu nshila.

¹⁷Yehowa wakamba ne, Nensokoke Abalahama bualu bundi ngenza, anyi?

¹⁸Bualu bua yeye nealue tshisamba tshinene, ne bisamba bionso bia ha buloba nebisanke bua bualu buandi.

¹⁹Nakamumanya bua yeye ayishe bana bandi ne ba mu nsubu wandi bimpe, bua bobo baye mu nshila wa Yehowa bua kuenza malu makane ne malulame, nunku Yehowa neamanye mua kuenzela Abalahama malu onso akamuambileye.

²⁰Yehowa wakamba ne, Bualu bua muadi wa Sodoma ne wa Amola udi munene, ne bualu bua malu mabi abo adi matambe bukole,

²¹nyaya katataka bua kubamona ne badi benza bu mudi muadi wabo wakufika kundi, ne bikalabo kabayi benze nunku, nemmanye bianyi.

²²Balume aba bakumuka, bakaya mu nshila wa ku Sodoma, kadi Abalahama wakatshidi muimane ku mpala kua Yehowa.

²³Abalahama wakasemena ha buihi, wakamukonka ne, Neushihe bantu bakane ne bantu babi hohamue, anyi?

²⁴Bikala bantu bakane makumi atanu mu musoko, wewe neûshihe, kuena usungila musoko bualu bua bantu bakane makumi atanu badimu, anyi?

²⁵Bualu ebu kabuikadi kudi bua wewe kuenza nunku bua kushiha bantu bakane ne bantu babi hohamue, biwenza nunku bantu bakane nebikale muomumue ne bantu babi, bualu ebu kabuikadi kûdi, Mulumbuluishi wa buloba buonso katu wenza bimpe, anyi?

²⁶Yehowa wakamba ne, Binasangana bantu bakane makumi atanu mu musoko wa Sodoma, nensungile musoko wonso bua bualu buabo.

²⁷Abalahama wakamba ne, Tangila, nakukuata bualu bua kusomba ne Yehowa, meme ndi bu luhuishi ne butue.

²⁸Bikalamu bantu bakane makumi atanu kakuiyi bantu batanu, neushihe musoko wonso bualu bua bantu batanu kabayiku, anyi? Wakamba ne, Tshiena nshiha musoko binasangana bantu bakane makumi anai ne batanu.

²⁹Yeye wakamba kabidi ne, Biwamona bantu bakane makumi anai? Yeye wakamba ne, Tshiena nshiha musoko bualu bua bantu makumi anai.

³⁰Yeye wakamba ne, Mukelenge, kukuatshi tshiji, nengakule bianyi, bikalamu bantu bakane makumi asatu Yeye wakamba ne, Tshiena nshiha musoko bualu bua bantu makumi asatu.

³¹Yeye wakamba ne, Nakukuata bualu bua kusomba ne Mukelenge, bikalamu bantu makumi abidi Yeye wakamba ne, Tshiena nshiha musoko bualu bua bantu makumi abidi.

³²Yeye wakamba ne, Mukelenge, kukuatshi tshiji, nengakule musangu eu, bikalamu bantu bakane dikumi Yeye wakamba ne, Tshiena nshiha musoko bualu bua bantu dikumi.

³³Hakashikisha Yehowa kusangana ne Abalahama yeye wakaya biandi ne Abalahama wakahingana kuandi.