Read tshiluba Genese 20 Bible Online

Genese 20 - tshiluba bible

Genese 20

¹Abalahama wakumuka ku muaba au, wakaya ku Sude, wakashikama hankatshi ha Kadesha ne Shû, wakashikama ku Gelâ.

²Abalahama wakamba bua Sala, mukashi wandi, ne, Yeye udi muanʼetu mukashi, ne Abimeleke, mukelenge wa Gelâ, wakatuma bantu, bakangata Sala.

³Kadi Nzambi wakamueneka kudi Abimeleke mu tshilota butuku, wakamuambila ne, Wewe udi anu muntu mufue, bualu bua mukashi uwakuangata udi mukashi wa munga muntu.

⁴Abimeleke kakadi muanze kulua kudiye, ne yeye wakakonka ne, Mukelenge, wewe neushihe tshisamba tshiakane, anyi?

⁵Yeye kakungambila ne, Yeye udi muanʼetu mukashi, anyi? Mukashi mene wakamba ne, Yeye udi muanʼetu mulume Nakuenza bualu ebu mu buakane bua mu mutshima ne kutoka kua bianza bianyi.

⁶Nzambi wakamuambila mu tshiota ne, Bulelela, ndi mumanye ne wewe wakuenza bualu ebu mu buakane bua mu mutshima webe, nakakuhidisha kabidi bua kuenza bualu bubi ku mesu kuanyi, nunku tshiakuitabusha bua wewe kumulenga tshianza.

⁷Nunku uhingashe mukashi kudi mulume wandi, bualu bua yeye udi muprofete, neakulombele Nzambi bua wewe wikale ne muoyo, kadi biwahidia kumuhingasha, umanye biebe ne wewe ne bantu bonso baudi nʼabo nenufue bulelela.

⁸Abimeleke wakabika ne dinda dionso, Wakabikila bantu bandi bonso, wakabambila malu au onso ku matshu abo; ne bantu bandi bakatamba kutshina.

⁹Hashishe Abimeleke Wakabikila Abalahama, wakamukonka ne, Bualu ebu buwakungenzela budi tshinyi? Nakukuenzela bualu bubi kai, bua wewe wakunvuisha ne bantu banyi mu bualu bubi bunene nunku? Wewe wakungenzela bualu bubi, budi kabuyi buimpe bua kuenza.

¹⁰Abimeleke wakakonka Abalahama ne, Meji kai akadi munda muebe a kukuenzesha bualu ebu?

¹¹Abalahama wakamuambila ne, Bualu bua nakuelangana meji ne, Bushuwa, ditshina dia Nzambi kadiena mu muaba eu, ne bobo nebanshihe bualu bua mukashi wanyi.

¹²Bulelela, yeye udi muakunyi wanyi, udi muana wa tatu wanyi, kadi kena muana wa mamu wanyi, ne yeye wakalua mukashi wanyi.

¹³Hashishe hakambikila Nzambi, wakangumusha ku nsubu wa tatu wanyi, meme nakamuambila ne, Elu nduse lundi musue wewe kundesha, ku miaba yonso itudi tuya nʼebe ubambile bua bualu buanyi ne, Yeye udi mukulu wanyi wa balume.

¹⁴Abimeleke wakangata mikoko ne ngombe ne bahika balume ne bahika bakashi, wakabifila kudi Abalahama, wakahingasha Sala mukashi wandi kudiye kabidi.

¹⁵Abimeleke wakamuambila ne, Mona, buloba buanyi budi ku mpala kuebe, ushikame kudi musue.

¹⁶Yeye wakambila Sala ne, Mona, nakuha mukulu webe bituha bia argent tshinunu, ntshintu tshiebe tshia kutokesha nʼatshi munda ne bantu bonso badi nʼebe, wewe wakubingishibua ku mesu kua bantu bonso.

¹⁷Abalahama wakalomba Nzambi, ne yeye wakakolesha Abimeleke ne mukashi wandi ne bena mudimu bandi ba bakashi, ne bobo bakalela bana.

¹⁸Bualu bua Yehowa wakakumbamisha bantu bonso ba mu nsubu wa Abimeleke, bualu bua Sala, mukashi wa Abalahama.