Read tshiluba Genese 21 Bible Online

Genese 21 - tshiluba bible

Genese 21

¹Yehowa wakahingana kudi Sala bu muakambeye, ne wakenzela Sala bu muakambeye.

²Sala wakimita difu, wakalelela Abalahama muana mulume mu bununu buandi mu tshikondo tshiakamuambila Nzambi.

³Abalahama wakabika muana wandi mulume wakamulelela Sala ne, Isaka

⁴Abalahama wakatengula muana wandi mulume Isaka hakahita matuku muanda mukulu, bu muakamuambila Nzambi.

⁵Abalahama wakadi ne bidimu lukama hakamulelabo muana wandi mulume Isaka.

⁶Sala wakamba ne, Nzambi wakansekesha ne bantu bonso badi bunvua lumu elu nebaseke nʼanyi.

⁷Yeye wakamba ne, Muntu kai wakadi kuambila Abalahama ne, Sala neamushe bana mabele? Bualu bua meme nakamulelela muana mu bununu buandi.

⁸Muana wakadiunda, wakalekela mabele, mu dituku diakalekeleye mabele Abalahama wakalambishila Isaka bidia bia bungi.

⁹Sala wakamona muana mulume wa Haga, muena Ejipitu, wakadi muledibue kudi Abalahama, wakadi useka biandi.

¹⁰Nunku yeye wakambila Abalahama ne, Wihate muhika eu ne muana wandi mulume bualu bua muana wa muhika eu kena mua kuhiana buhianyi muomumue ne muana wanyi Isaka mene.

¹¹Bualu ebu buakadi bujitu bukole kudi Abalahama bualu bua muana wandi mulume.

¹²Nzambi wakambila Abalahama ne, Bualu ebu kabuikadi bujitu ku mesu kuebe, bualu bua nsongalume ne bua muhika webe, witabusha mei onso akukuambila Sala, unvua dî diandi, bualu bua tunkanunuina tuebe netubikidibue mu Isaka.

¹³Nenvuishe muana wa muhika webe tshisabata tshinene bualu bua yeye udi muana webe.

¹⁴Abalahama wakabika ne dinda dionso, wakangata bidia ne mulondo wa mai, wakabika kudi Haga, wakabiteka ha diaha diandi, wakamuha muana, wakabatuma ha bule, wakaya biandi, wakendakana mu tshihela tshia Bê-sheba.

¹⁵Mai akadi mu mulondo akashika, ne yeye wakaladika muana muinshi mua katshi kasase.

¹⁶Yeye wakaya ha bule buludiludi buakadi muana bu mudi muntu wamba kuela mikete, bualu bua wakamba ne, Tshitangidi lufu lua muana Yeye wakashikama buludiludi buakadi muana, wakaula muadi, wakadila.

¹⁷Nzambi wakunvua di dia nsongalume, ne muanjelo wa Nzambi wakela dî kudi Hagâ difume mu diulu, wakamukonka ne, Hagâ, bualu kai budi bukutonda? Kutshinyi, bualu bua Nzambi wakamana kunvua di dia nsongalume mudiye mulale.

¹⁸Bika biebe, ubishe nsongalume, umukuate ku tshianza, bualu bua meme nemmuvuishe tshisamba tshinene.

¹⁹Nzambi wakatabasha mesu andi, yeye wakamona mushimi wa mai, yeye wakaya, wakasuna mai mulondo tente, wakanuisha nsongalume mai.

²⁰Nzambi wakadi ne nsongalume, yeye wakadiunda, yeye wakashikama mu tshihela wakalua tshilembi tshidi ne ndudi.

²¹Wakashikama mu tshihela tshia Palana, mamu wandi wakamuangatshila mukashi wa mu buloba bua Ejipitu.

²²Mu tshikondo atshi Abimeleke ne Pikola, kamanda ka masalayi andi, bakambila Abalahama ne, Nzambi udi nʼebe mu malu onso audi wenza.

²³Nunku uditshihe nʼanyi kudi Nzambi bua wewe kundingi, nansha muanʼanyi mulume, nansha muana wa muanʼanyi, kadi ungenzele malu ne luse bu munakakuenzela wewe ne buloba bûdi mushikame.

²⁴Abalahama wakamba ne, Nenditshihe nunku.

²⁵Abalahama wakabela Abimeleke bualu bua dina dia mai diakanyengabo kudi bahika ba Abimeleke ku bukole.

²⁶Abimeleke wakamba ne, Tshiena mumanye bantu bakuenza bualu ebu, wewe kuakungambila diambedi, tshiakunvua lumu lua bualu ebu, anu lelu.

²⁷Abalahama wakangata mikoko ne ngombe, wakabika kudi Abimeleke, bubidi buabo bakafua ndondo.

²⁸Abalahama wakateka bana ba mikoko ba mashina muanda mutekete ha buabo.

²⁹Abimeleke wakebesha Abalahama ne, Wakuteka bana aba ba mikoko muanda mutekete ha buabo bua tshinyi?

³⁰Yeye wakamba ne, Bana aba ba mikoko muanda mutekete, wewe neubangate ku tshianza tshinyi, nebikale bu bamanyi ba bualu buanyi ne, Meme nakumbula dina edi dia mai.

³¹Nunku bakabikila muaba au ne, Besheba bualu bua bubidi buabo bakaditshihilaku.

³²Nunku bakahungakasha tshihungidi ku Bê-sheba, ne Abimeleke ne Pikola, kamanda ka masalayi andi, bakabika, bakahingana ku buloba bua Bena Peleshete.

³³Abalahama wakakuna mutshi ku Be-sheba, wakabikilaku dina dia Yehowa, Nzambi wa Kashidi.

³⁴Abalahama wakashikama mu buloba bua Bena Peleshete matuku a bungi.