Read tshiluba Genese 43 Bible Online

Genese 43 - tshiluba bible

Genese 43

¹Tshiole tshiakatamba bukole mu buloba.

²Hakashikishabo kudia bintu bionso biakaluabo nʼabi ku Ejipitu, tatu wabo wakabambila ne, Yai bienu tshiakabidi nutusumbileku ba kudia tukese.

³Yuda wakamuambila ne, Mulume au wakabambila bikole ne, Kanuena nu ntangila ku mesu, binuikala kanuyi nulua ne muakunyʼenu kundi.

⁴Biwatutuma ne muanʼetu, netuye, ne tukusumbile bia kudia,

⁵kadi biwahidia kututuma nʼandi, katuena tuyaku, bualu bua mulume au waka tuambila ne, Kanuena nuntangila ku mesu, binuikala kanuyi nulua ne muakunyiʼenu kundi.

⁶Isalele wakamba ne, Nuakungenzela bibi nunku, hanuakuambila mulume au ne, Tudi ne muakunyʼetu, munyi?

⁷Bakamba ne, Mulume au wakatukonka bua malu etu mene, ne bua bana betu ne, Tatu wenu utshidi ne muoyo, anyi? Nudi ne muanʼenu mukuabo wa balume, anyi? Tuetu bakamukudimuna anu bu muakatukonkeye, tuakadianjila kumanya ne, Yeye wakadi mua kutuambila ne, Luai ne muanʼenu wa balume kunoko, anyi?

⁸Yuda wakambila Isalele tatuʼandi ne, Utume nsongalume nʼanyi, netubike, netuye, bua betu ne wewe ne bana hetu bakese bikale ne muoyo, katufu

⁹Meme nendieyeke kudiye bu tshieya mu muaba wandi, udi mua kumusombuela ku tshianza tshianyi binahanga kuhingana nʼandi kudi ne kumuteka ku mpala kuebe hashishe nendibadile bujitu ebu tshiendelele;

¹⁰bu tuetu katuyi bajanguluke nunku, tuakadi mua kuhingana kunoko tshiakabidi.

¹¹Tatu wabo Isalele wakabambila ne, Bikala bualu butukuate, enzai bienu nunku nuangate bintu biakakuamibua mu buloba buetu, nubiteke mu bisaka bienu, nuye nʼabi bu matabisha kudi mulume au Nuangate bintu bia muhuya muimpe, baume ne buitshi ne mula ne pistaches ne amandes,

¹²nuye ne argent muhite misangu ibidi mu bianza bienu, argent yakahingashabo munda mua bibombi bienu, nuye nʼai mu bianza bienu kabidi, bumue bakenza bualu abu ku mpukahuka

¹³nuangate muakunyiʼenu kabidi, bikai bienu, nuye kudi mulume au.

¹⁴Nzambi wa Bukole Buonso anufue luse ku mesu kua mulume au, bua yeye ahingashe muanʼenu mukuabo ne Benyamina kabidi mu bianza bienu Bianjimishilabo bana banyi, nembajimishe

¹⁵Bobo bakangata matabisha au, ne argent misangisha misangu ibidi, ne Benyamina mu bianza biabo, bakabika, bakaya mu Ejipitu, bakimana ku mpala kua Yosefe.

¹⁶Hakatangila Yosefe Benyamina nʼabo, wakambila mulami wa nsubu wandi ne, Ulue ne balume aba mu nsubu, ubashihele nyama, ulongolole bintu bia kudia, bualu bua bantu aba nebadie nʼanyi bidia diba hankatshi.

¹⁷Mulami Wakenza bu muakamba Yosefe, wakalua nʼabo mu nsubu wa Yosefe.

¹⁸Bobo bakatshina hakaluabo nʼabo mu nsubu wa Yosefe, bakambilangana ne, Bakatubuesha mu nsubu nunku bualu bua argent yakahingashabo mu bibombi bietu diambedi badi basue kutubanda ne bubi, nebatukuate ne mpunda yetu, nebatubueshe mu buhika.

¹⁹Bakasemena ha buihi ne mulami wa nsubu wa Yosefe, bakayikila nʼandi ku tshibi tshia nsubu,

²⁰bakamba ne, Mukelenge wetu, tuakalua kunoko diambedi bua kusumba bia kudia,

²¹ne hatuakafika ku nsubu wa tshilala benyi, tuakasulula bibombi bietu, tuakamona argent yetu yonso munda mua tshibombi tshia muntu ne muntu, tuakulua nʼai kabidi mu tshianza tshietu.

²²Tuakulua kabidi ne argent mikuabo bua kusumba bia kudia, katuena bamanye muntu wakahingasha argent ei mu bibombi bietu.

²³Yeye wakabambila ne, Nuikale talala, kanutshinyi Nzambi, Nzambi wa tatu wenu, wakanuha bintu mu bibombi bienu, meme nakadi ne argent yenu. Yeye wakalua ne Shimeona kudibo.

²⁴Muntu eu wakalua nʼabo mu nsubu wa Yosefe, wakabaha mai, ne bobo bakuvuwa makasa abo, ne yeye wakadisha mpunda yabo kabidi.

²⁵Bobo bakalongolola matabisha diambedi Yosefe kayi muanze kulua diba hankatshi, bualu bua bakunvua lumu ne, Netudieku nʼandi bidia.

²⁶Hakalua Yosefe ku nsubu kuandi, bakalua ne matabisha mu bianza biabo, bakamukukuila hanshi.

²⁷Yeye wakabakonka bua malu abo ne, Tatu wenu, muntu au mununu unuakungambila, udi mukole, anyi? Utshidi ne muoyo, anyi?

²⁸Bobo bakamukudimuna ne, Muntu webe tatu wetu, udi mukole, utshidi ne muoyo Bobo bakatua mpala yabo hanshi, bakamukukuila.

²⁹Yeye wakakenzakana, wakamona Benyamina, muakunyʼandi, muana wa mamu wandi, wakabakonka ne, Eu udi muakunyʼenu unuakungambila, anyi? Yeye wakamuambila ne, Nzambi akufute luse, muanʼanyi.

³⁰Yosefe wakumuka lubilu, bualu bua mutshima wandi wakajinga bua muakunyiʼandi, wakakeba muaba wa kudidileye, wakabuela mu nsubu wandi wa bulalu, wakadidilamu.

³¹Yeye wakuvuwa mai ku mpala kuandi, wakahingana kudibo, wakadikanda, wakamba ne, Lua ne bidia.

³²Bakamuha bidia ha buandi, bakabaka bidia ha buabo, ne bakaha Bena Ejipitu bakadi badia nʼandi ha buabo, bualu bua Bena Ejipitu kabatu badia bidia ne Bena Ebelu, bualu ebu budi bufuisha Bena Ejipitu bundu.

³³Bakashikama ku mpala kuandi, muntu ku mulongo wandi muntu ku mulongo wandi, wakatuadishila ku muanʼa bute to ne ku muanʼa mukala, balume aba bakakemangana.

³⁴Yeye wakababanyina bidia biakadi ku mpala kuandi, kadi tshituha tshia Benyamina tshiakahita tshituha tshiabo misangu itanu. Bakanua, bakasanka nʼandi.