Read tshiluba Genese 49 Bible Online

Genese 49 - tshiluba bible

Genese 49

¹Yakoba Wakabikila bana bandi bonso, wakamba ne, Nudisangishe hamue bua meme kunuambila bua malu alualua kunudi mu matuku adi kayi manze kulua,

²Nuenu bana balume ba Yakoba, nudisangishe hamue, unvuai di telejai matshu kudi Isalele tatuʼenu.

³Lubena, wewe udi muanʼa bute wanyi, ntshibangidilu tshia bukole buanyi, udi wa kumudilu wa kanemu, ne wa kumudilu wa bukokeshi.

⁴Wewe udi bu mai adi asaba ha kalua, atutukila muiku, wewe kuena wikala ne bukokeshi ku mutu kua bantu, bualu bua wewe wakabanda ha bulalu bua tatuʼebe, wakenzahu bualu bubi wakabanda ha bulalu buanyi.

⁵Shimeona ne Lewi badi bana babo mene, miele yabo ya nvita idi mikole.

⁶Mutshima wanyi kaubuedi mu tshifufu tshiabo, ne butumbi buanyi kabubuelakanyi nʼabo mu disangisha diabo. Bualu bua bobo bakashiha bantu mu tshiji tshiabo, ne mu tshishiku tshiabo bakakosa ngombe mijilu ya bikono biai.

⁷Tshiji tshiabo tshidi tshiedibue mulau, bualu bua tshiakatamba bukole ne bualu bua lukina luabo kaluakadi ne luse, nembatahulule mu Yakoba, nembamuangalashe mu Isalele.

⁸Yuda, bana benu nebakutumbishe, tshianza tshiebe netshifiekele mu nshingu ya bantu badi nʼebe lukuna, bana ba tatu ebe nebakukukuile.

⁹Yuda udi bu muana wa nyama wa ntambue, wakalekela tshintu tshiandi tshia kudia, wakalamina ne binu biandi bu nyama wa ntambue udi bu mukashi wa nyama wa ntambue, mundi kai wamubisha ku tulu?

¹⁰Dikombo dia bukelenge kadiena diumuka kudi Yuda, tshibangu tshia bukokeshi katshiena tshiumuka hankatshi ha makasa andi to ne halua Shilo, ne bantu bonso nebakukukuile.

¹¹Udi usuika nyama wandi wa mpunda ku muonshi wa tumuma tukese, udi usuika lukungulu lua nyama wa mpunda ku muonshi udi utamba buimpe, wakuvuwa bilulu biandi mu nvinyo, wakuvuwa kazaku kandi mu mashi a tumuma tukese.

¹²Mesu andi neikale makunzekunzû ne manye, ne menu andi neikale matoke to ne mabele.

¹³Zebuluna neashikame kukala kua mai manene muaba wandi newikale muaba wa mabi manene, mukalu wandi neufike tô ne ku Sidona.

¹⁴Yisakâ udi bu nyama wa mpunda mukole, udi ulala hankatshi ha mpangu ya mikoko,

¹⁵wakatangila muaba wa kulala ne, Mmuimpe wakatangila buloba ne, Mbuimpe, wakahuekesha diaha diandi bua kumema bujitu, wakalua bu muhika wa mudimu mukole.

¹⁶Dana nealumbuluile bantu bilumbu biabo, bu tshimue tshia mu bisamba bia Bena Isalele.

¹⁷Dana neikale bu nyoka mu nshila, ne bu ntoka mu nshila udi usuma kabalu ku mijilu ya bikono, ne muntu udi ubanda ha nyima udi uhona hanshi bualame.

¹⁸Yehowa, nakuindila luhandu luebe.

¹⁹Gada, tshisumbu tshia bantu netshimunguile, kadi yeye neabakume ku bikankanyi biabo.

²⁰Ashe neikale ne bintu bia kudia bia bungi, neavudishe bintu bia kudia bidi bitambe bilengele.

²¹Nafatale udi bu ntole musulula, udi Wamba mei malengele.

²²Yosefe udi bu ditamba dia mutshi diakakuama mamuma a bungi, udi bu mutshi hehi ne mushimi wa mai, matamba andi adi asambuka ha mutu ha lumbu.

²³Bilembi bia m ta biakumunyingalasha bikole, biakumuela mikete, biakumutatshisha,

²⁴kadi buta buandi buakuikala bukole, maboko andi ne bianza biandi biakakoleshibua kudi bianza bia Nzambi wa Bukole wa Yakoba. (Mulami wa mikoko wakafumaku, ku dibue dia Isalele).

²⁵Nzambi wa tatuʼebe udi ukukuatshisha, Nzambi wa Bukole Buonso udi ukusankisha ne masanka adi afuma mu diulu, ne masanka adi afuma muinshi mua buloba, ne masanka adi afuma ku mabele ne mafu.

²⁶Masanka a tatu webe akuhita masanka a batatuʼanyi bunene tô ne ku mukalu wa mikuna minene idiku tshiendelele, masanka au neikale ha mutu ha Yosefe ne ha lubombo lua mutu wa yeye wakadi muhandulula kudi bana babo.

²⁷Benyamina udi bu nkashama udi ne luonji, udi udia bintu dinda, ne dilolo udi ubiabanya.

²⁸Bonso aba badi bisamba bia Bena Isalele dikumi ne bibidi, a mmei akabambila tatu wabo, hakabavudishileye disanka, muntu ne muntu wakadi ne disanka diakamuvudishileye nʼadi.

²⁹Yeye wakabadimusha, wakabambila ne, Nkadi ha kudisangisha ne bankambua banyi, nunjike mu muaba wakajikabo batatuʼanyi mu lubuebue ludi mu budimi bua Efelona, Muena Hiti,

³⁰mu lubuebue ludi mu budimi bua Makepela, ku mpala kua Mamale mu buloba bua Kanana, buakasumba Abalahama kudi Efelona, Muena Hiti, bu muaba wa kujikabo bantu bafue.

³¹Bakajikamu Abalahama ne Sala, mukashi wandi, ne Isaka ne Lebeka, mukashi wandi, nakajikamu Lea kabidi,

³²bakasumba budimi ne lubuebue ludimu kudi bana ba Hete.

³³Hakashikisha Yakoba kubadimusha nunku, wakateka makasa andi ha bulalu, wakahuola muoyo wandi, wakasangishibua kudi bankambua bandi.