Read tshiluba 2 Samuele 10 Bible Online

2 Samuele 10 - tshiluba bible

2 Samuele 10

¹Ku nyima kua bualu ebu mukelenge wa Bena Amona wakafua; Hanuna, muana wandi, wakakokesha mu muaba wandi.

²Davidi wakamba ne, Meme nenfuile Hanuna, muana wa Nahasha, luse, bu muakanfuila tatu wandi luse. Nunku Davidi wakamutumina bantu bua kumusambabo bua tatu wandi. Bantu ba Davidi bakafika ku buloba bua Bena Amona.

³Kadi baminyampala ba Bena Amona bakambila Hanuna, mukelenge wabo, ne, Udi welangana meji ne, Davidi udi utumbisha tatu webe bualu bua yeye wakakutumina bakusambi, anyi? Davidi kakakutumina bantu bandi bua kutangilabo musoko ne bua kûtentekela ne bua kûhaula, anyi?

⁴Nunku Hanuna wakakuata bantu ba Davidi, wakababeya miedi ku ditama dimue dia luseke lumue, wakabakosa bilulu biabo munkatshi ku matuku abo, wakabatuma kuabo.

⁵Hakambilabo Davidi bualu ebu, yeye wakatuma bantu kusambakenabo nʼabo, bualu bua balume aba bakadi ne bundu bua bungi. Mukelenge wakamba ne, Nushale mu Yeleko tô ne hamena miedi yenu kabidi, hashishe nenuhingane.

⁶Hakatangila Bena Amona ne, Davidi wakalengulula, Bena Amona bakabikila Bena Sulia ba mu Bete-lehoba ne ba mu Soha, binunu makumi abidi bakadi benda hanshi; mukelenge wa Mâka wakafila tshinunu tshia bantu; bantu ba Tobo bakadi binunu dikumi ne bibidi.

⁷Hakunvua Davidi lumu elu, yeye wakatuma Yoaba ne masalayi andi onso a bukitu.

⁸Bena Amona bakaluhuka, bakela mualu wa nvita ku tshibi tshia musoko; Bena Sulia ba mu Soba ne ba mu Lehoba ne ba mu Tobo ne ba mu Mâka bakadi ha buabo mu madimi.

⁹Hakatangila Yoaba ne, Bakela malu ya nvita ku mpala ne ku nyima banjike, yeye wakasungula bena bukitu bonso ba mu Isalele, wakabatahulula, wakela mualu wa nvita kudi Bena Sulia;

¹⁰wakafila bantu bakuabo mu bianza bia Abishai muakunyʼandi, wakela mualu wa nvita kudi Bena Amona.

¹¹Yeye wakamba ne, Biamba Bena Sulia kutuhita bukole, ulue biebe kutukuatshisha; kadi biamba Bena Amona kukuata bukole, nendue kukukuatshisha.

¹²Nuikale ne dikima; tuikale bu balume mene mene bualu bua bantu betu ne bua misoko ya Nzambi wetu; Yehowa enze biandi malu adi mimpe ku mesu kuandi.

¹³Nunku Yoaba ne bantu bakadiye nʼabo bakasemena ha buihi ne Bena Sulia bua kuluangana nʼabo; bobo bakanyema ku mpala kuandi.

¹⁴Hakatangila Bena Amona ne, Bena Sulia bakanyema, bobo kabidi bakanyema ku mpala kua Abishai, bakabuela mu musoko. Hashishe Yoaba wakalekela kulonda Bena Amona, wakahingana ku Yelushalema.

¹⁵Hakamanya Bena Sulia ne, Bena Isalele bakatuhita bukole, bakadisangisha hamue.

¹⁶Hadadezê wakatuma dî, wakabikila Bena Sulia bakadi dishiya dia musulu wa Pelata; bakalua ku Helama, ne Shobaka, kapitene ka masalayi a Hadadezê, wakadi ku mutu kuabo.

¹⁷Bakambila Davidi bualu ebu; yeye wakasangisha Bena Isalele bonso hohamue, bakasabuka musulu wa Yadene, bakafika ku Helama. Bena Sulia bakela mualu wa nvita kudi Davidi, bakaluangana nʼandi.

¹⁸Bena Sulia bakanyema ku mpala kua Bena Isalele; Davidi wakashiha bantu ba Bena Sulia bakadi benda mu makalu nkama muanda mutekete, ne bantu bakadi benda ha tubalu binunu makumi anai; wakashiha Shobaka, kapitene ka masalayi abo, wakafuaku.

¹⁹Hakatangila bakelenge bonso bakadi balamata Hadadezê ne, Bena Isalele bakatuhita bukole, bakalekela kuluangana ne Bena Isalele, bakabakuatshila mudimu. Nunku Bena Sulia bakatshina kukuatshisha Bena Amona kabidi.