Read tshiluba 2 Samuele 12 Bible Online

2 Samuele 12 - tshiluba bible

2 Samuele 12

¹Yehowa wakatuma Natana kudi Davidi. Yeye wakafika kudiye, wakamuambila ne, Bantu babidi bakadi mu musoko umue, umue wakadi mubanji, mukuabo wakadi muhele.

²Muntu mubanji wakadi ne bisumbu bia mikoko ne bia ngombe bia bungi;

³kadi muntu muhele kakadi ne tshintu, anu kana ka mukoko kamue, kakasumbeye, kakadisheye; bakadiunda kudiye ne bana bandi; kakadia bidia biandi, kakanua mai a mu luhanza luandi mene, kakalala mu tshiadi tshiandi, kakadi bu muana mukashi mulela kudiye.

⁴Hashishe muena luendu wakalua kudi muntu mubanji; yeye kakitabusha bua kushihela muena luendu wakadi mulue umue wa mu mikoko yandi anyi umue wa mu ngombe yandi, kadi wakangata kana ka mukoko wa muntu muhele, wakamushihela muenyi wakadi mulue ku mbelu kuandi.

⁵Tshiji tshikole tshiakakuata Davidi bua muntu au; yeye wakambila Natana ne, Bu mudi Yehowa ne muoyo, muntu wakenza bualu ebu udi ne bua kufua;

⁶budiye nʼabu mbua kumuhingishila mikoko mai bua bualu ebu buakenzeye, bualu bua yeye kakadi ne luse.

⁷Hashishe Natana wakambila Davidi ne, Wewe mene udi muntu eu. Yehowa, Nzambi wa Isalele, udi wamba ne, Nakakuela manyi bua wewe wikale mukelenge ku mutu kua Bena Isalele, nakanusungila mu bianza bia Shaula;

⁸nakakuha nsubu wa mukelenge webe, nakafila bakashi ba mukelenge webe mu tshiadi tshiebe; nakakuha Bena Isalele ne Bena Yuda kabidi; bikala bintu ebi bitambe bukese, nakadi kukuvudishilabi ha mutu.

⁹Wewe wakalengulula dî dia Yehowa bua kuenza bualu ebu bubi ku mesu kuandi bua tshinyi? Wewe wakashiha Uliya, Muena Hiti, ku muele wa nvita, wakangata mukashi wandi bu mukashi webe, wakamushiha ku muele wa nvita wa bana ba Amona.

¹⁰Nunku muele wa mata kawena umuka ku nsubu kuebe tshiendelele bualu bua wewe wakandengulula, wakangata mukashi wa Uliya, Muena Hiti, bu mukashi webe.

¹¹Yehowa udi Wamba kabidi ne, Mona, nenkubishile bualu bubi mu nsubu webe mene; nenunyenge bakashi bebe ku mesu kuebe, nembafile kudi muena mutumba nʼebe, nealale ne bakashi bebe mu munya.

¹²Wewe wakenza bualu ebu mu musokoko, kadi nengenzeshe bualu ebu ku mesu kua Bena Isalele bonso anu hatoke tô.

¹³Hashishe Davidi wakambila Natana ne, Nakenzela Yehowa bibi. Natana wakambila Davidi ne, Yehowa wakukubuikidila bubi buebe, wewe kuena ufila.

¹⁴Kadi bua bualu ebu bubi buwakenza wewe wakavuishila bena lukuna ba Yehowa tshikondo tshia kumuhendabo, nunku muana uwakalela neafue biandi bulelela.

¹⁵Natana wakumuka ne wakaya ku nsubu kuandi. Yehowa wakasamisha muana wakalelela mukashi wa Uliya Davidi disama dikole.

¹⁶Nunku Davidi wakalombela muana eu Nzambi. Davidi wakajila bia kudia, wakabuela mu nsubu, wakalala hanshi ha buloba butuku bujima.

¹⁷Bakulu ba mu nsubu muandi bakabika, bakimana ha buihi nʼandi bua kumubishabo ba buloba, kadi yeye kakitabusha, wakahidia kudia nʼabo.

¹⁸Hakahita matuku muanda mutekete muana wakafua. Bantu ba Davidi bakatshina kumuambila ne, Muana udi mufue; bualu bua bakamba ne, Monai, hakatshidi muana ne muoyo tuakayikila nʼandi ne yeye kakunyua dî dietu; monai, udi mua kutamba kunyingalala bituamuambila ne, Muana udi mufue!

¹⁹Kadi hakatangila Davidi bantu bandi banungane, Davidi wakamanya ne muana udi mufue; Davidi wakebesha bantu bandi ne, Muana wakulua, anyi? Bakamba ne, Wakufua.

²⁰Hashishe Davidi wakajuka ha buloba, wakowa mai, wakataha manyi hamʼbidi, wakaluata bilulu bikuabo; wakabuela mu nsubu wa Yehowa, wakamutendelela; nunku wakahingana ku nsubu kuandi; hakambeye dî, bakamuha bia kudia, yeye wakadia.

²¹Hashishe bantu bandi bakamukonka ne, Bualu ebu bûdi wenza budi tshinyi? Hakadi muana ne muoyo, wewe wakadila, wakajila bia kudia; kadi hakafua muana, wewe wakajuka, wakadia bia kudia.

²²Yeye wakamba ne, Hakadi muana ne muoyo, nakajila bia kudia, nakadila, nakadikonka munda ne, Udi mumanye ne, Yehowa kena unfuila luse, bua muana ikale ne muoyo nganyi?

²³Kadi muana wakamana kufua, bundi nʼabu mbua kujila bia kudia bua tshinyi? Ndi mumanye mua kumufululula kabidi, anyi? Nenye kudiye, kadi yeye kena mua kuhingana kundi.

²⁴Davidi wakasamba Beta-sheba mukashi wandi; wakabuela kudiye, wakalala nʼandi; yeye wakamulelela muana mulume, wakamuidika dina diandi ne, Solomo. Yehowa wakamunanga;

²⁵wakatuma Natana muprofete kudiye, wakamuidika dina ne, Munangibue kudi Yehowa,[1] bualu bua Yehowa.

²⁶Yoaba wakaluangana ne Laba, musoko wa Bena Amona, wakanyenga musoko eu wa bukelenge.

²⁷Yoaba wakatuma ba-messager kudi Davidi, bamba ne, Nakaluangana ne Laba, nakanyenga musoko udi ne mishimi ya mai ya bungi.

²⁸Nunku usangishe bantu badi bashala, utshintshimike musoko, ûnyenga; binanyenga musoko, nebawidike dina dianyi.

²⁹Davidi wakasangisha bantu bonso, wakaya nʼabo ku Laba, wakaluangana ne musoko eu, wakaunyenga.

³⁰Wakangata tshifulu tshia butumbi tshia mukelenge tshiakadi ku mutu kuandi; bujitu buatshi buakadi bua ntalanta wa or,[2] tshiakadi tshilengeshibue ne mabue, a mushinga mukole; bakatshiasa ku mutu kua Davidi. Wakanyenga bintu bia bungi bia mu musoko.

³¹Yeye wakangata bantu bakadimu, wakabenzesha mudimu wa kuhandabo mabaya ne scie ne bua kuenzabo biamu bia kuihila nʼabi ne bisui, ne bua kuenzabo tushola; wakenzela Bena Amona ba mu misoko yabo yonso nunku. Davidi ne bantu bandi bonso bakahingana ku Yelushalema.