Read tshiluba 1 Bakelenge 18 Bible Online

1 Bakelenge 18 - tshiluba bible

1 Bakelenge 18

¹Hakahita matuku a bungi, dî dia Yehowa diakalua kudi Eliya mu tshidimu tshisatu ne, Ya, udimueneshe kudi Ahaba, ne meme nendokeshe nvula ha buloba.

²Eliya wakaya bua kudimuenesha kudi Ahaba. Tshiole tshiakatamba bukole mu Samalea.

³Ahaba wakabikila Obadaya, wakadi ku mutu kua nsubu wandi. Obadaya wakatamba kutshina Yehowa bikole,

⁴bualu bua hakakeba Izebele kushiha baprofete ba Yehowa, Obadaya wakangata lukama lua baprofete, wakasokoka makumi atanu mu nyongolo makumi atanu mu nyongolo, wakabadisha bidia, wakabanuisha mai.

⁵Ahaba wakambila Obadaya ne, Hitshila mu buloba buonso ku mishimi ya mai yonso ne ku tusulu tuonso, bumue neuheteku mashinde a kudisha nʼau tubalu ne nyama ya mpunda[11] katujimishi nyama yetu yonso nansha.

⁶Nunku bakatahulula buloba munkatshi muabo, bobo bakayamu. Ahaba wakaya mu nshila umue nkayandi ne Obadaya wakaya mu nshila mukuabo nkayandi.

⁷Hakadi Obadaya mu nshila, Eliya wakasangila nʼandi; yeye wakamumanya, wakatua mpala wandi hanshi, wakamba ne, Ka, wewe, mukelenge wanyi Eliya, anyi?

⁸Yeye wakamba ne, Ka meme eu; ya, wambile mukelenge webe ne, Eliya udiku.

⁹Yeye wakamuebesha ne, Nakuenza bualu bubi kai, bua wewe udi ukeba kufila muntu webe mu tshianza tshia Ahaba bua yeye anshihe?

¹⁰Bu mudi Yehowa, Nzambi webe, ne muoyo, kakuena tshisamba anyi bukelenge bidi mukelenge wanyi kayi utuma bantu bua kukukeba. Hakambabo ne, Yeye kena kunoko, yeye wakatshihisha ba mu bukelenge abu ne tshisamba atshi bua kuambabo ne, Katuena bamusangane.

¹¹Katataka wewe udi wamba ne, Ya, wambile mukelenge webe ne, Mona, Eliya udiku.

¹²Hashishe hangumuka kûdi, Nyuma wa Yehowa neaye nʼebe kukuabo kundi tshiyi mumanye: nunku hanafika kudi Ahaba bua kumuambila ne yeye kena mumanye mua kukusangana, yeye neanshihe; kadi meme, muntu webe, nakatshina Yehowa katshia ku buana buanyi.

¹³Kabakambila mukelenge wanyi bu munakenza hakashiha Izebele baprofete ba Yehowa, bu munakasokoka lukama lua baprofete ba Yehowa, makumi atanu mu nyongolo makumi atanu mu nyongolo mukuabo, bu munakabadisha, bumunakabanuisha, anyi?

¹⁴Katataka wewe udi wamba ne, Ya, wambile mukelenge webe ne, Eliya udiku, yeye neanshihe.

¹⁵Eliya wakamba ne, Bu mudi Yehowa wa misumba ne muoyo, undi ngimana ku mpala kuandi, bulelela, nendimueneshe kudiye lelu eu.

¹⁶Nunku Obadaya wakaya bua kusangileye ne Ahaba, wakamuambila dî edi. Ahaba wakaya bua kusangileye ne Eliya.

¹⁷Hakamona Ahaba Eliya, yeye wakamuambila ne, Ka wewe mutatshishi wa Bena Isalele, anyi?

¹⁸Yeye wakamukudimuna ne, Tshiakatatshisha Bena Isalele, kadi anu wewe ne ba mu nsubu wa tatu webe, bualu bua nuenu nuakahetula mikenji ya Yehowa, nuakalonda Bâla.

¹⁹Nunku utume dî dia kubikila Bena Isalele bonso kundi ha mutu ha mukuna wa Kâmele, ne baprofete ba Bâla nkama inai ne makumi atanu, ne baprofete ba Bashela nkama inai badi badia bidia ku mesa a Izebele.

²⁰Nunku Ahaba wakatuma dî dia kubikila Bena Isalele bonso ne baprofete bonso ku mukuna wa Kâmele.

²¹Eliya wakasemena ha buihi ne bantu bonso, wakabakonka ne, Nudi nuenda nuzobela hankatshi ha nseke ibidi musangu bule munyi? Bikala Yehowa Nzambi, numulonde; kadi bikala Bâla Nzambi, numulonde. Bantu kabakamukudimuna.

²²Hashishe Eliya wakambila bantu ne, Anu meme nkayanyi nakashala muprofete wa Yehowa, kadi baprofete ba Bala badi bantu nkama inai ne makumi atanu.

²³Nunku batuhe habo ngombe ibidi: bobo badisunguila ngombe umue, bamusaye, bamuteke ha nkunyi, kabateki kahia muinshi; meme nendongolole ngombe mukuabo, nemmuteke ha nkunyi, tshiena nteka kahia muinshi.

²⁴Bobo babikila dina dia nzambi wabo, meme nembikile dina dia Yehowa: ne Nzambi udi witaba ne kahia ikale Nzambi malelela. Bantu bonso bakitaba ne, Wakuamba biakane.

²⁵Eliya wakambila baprofete ba Bâla ne, Nudisunguile ngombe umue, numulongolole diambedi, bualu bua nuenu nudi ba bungi; nubikile dina dia nzambi wenu, kadi kanuteki kahia muinshi.

²⁶Bakangata ngombe wakabahabo, bakamulongolola, bakabikila dina dia Bâla ku dinda tô ne ku munda munya, bamba ne, O, Bâla, utunvuile. Kadi kakuakadi dî, nansha muntu wakitaba. Nunku bakatuhika ha mutu ha tshioshelu tshiakenzabo.

²⁷Hakafika munda munya, Eliya wakabaseka ne, Elai dî dikole, bualu bua yeye udi nzambi: yeye udi welangana meji, anyi wakuya kuntu, anyi wakuya ku luendu, anyi yeye udi ulala tulu ne bunudi nʼabu mbua kumuhisha.

²⁸Bakela mei makole, bakaditaha ne tuele ne miele ya nvita bu mudi tshilele tshiabo tô ne hakahueka mashi abo hamʼbidi habo.

²⁹Hakahita munda munya, bakela mei abo tô ne ku dilolo ha diba diakafilabo mulambu wa kuosha; kadi kakuakadi dî, nansha muntu wakitaba.

³⁰Eliya wakambila bantu bonso ne, Nusemene ha buihi nʼanyi; bantu bonso bakasemena ha buihi nʼandi. Yeye wakalongolola tshioshelu tshia Yehowa tshiakadi tshitonkodibua hanshi.

³¹Eliya wakangata mabue dikumi ne abidi, bu bungi bua bisamba bia bana ba Yakoba, wakalelabo kudi Yehowa ne, Isalele ndina diebe.

³²Yeye wakenza tshioshelu ne mabue au mu dina dia Yehowa; wakumbula mutuhu munyunguluke tshioshelu, wakamanya mua kûla tente ne bihiminu bihidi bia ntete.

³³Wakalongolola nkunyi, wakasaya ngombe, wakamuteka ha mutu ha nkunyi. Wakamba ne, Bûshe milondo inai ne mai tente, bâhongolole ha mulambu wa kuosha ne ha nkunyi.

³⁴Wakamba ne, Benze nunku tshiakabidi; bakenza nunku tshiakabidi. Wakamba ne, Benze nunku tshiakasatu; bakenza nunku tshiakasatu.

³⁵Mai akahueka hanshi ha tshioshelu, akûsha mutubu tente.

³⁶Hakafika diba dia dilolo diakafilabo milambu ya kuosha, Eliya muprofete wakasemena ha buihi, wakamba ne, Yehowa, Nzambi wa Abalahama ne wa Isaka ne wa Isalele, bantu bamanye ne, Wewe udi Nzambi wa mu Isalele, ne meme muntu webe nakuenza malu â onso anu ku dî diebe.

³⁷Ungunvuile, Yehowa, ungunvuile bua bantu aba bamanye ne, Wewe, Yehowa, udi Nzambi, ne wewe wakakudimusha mitshima yabo kabidi.

³⁸Hashishe kahia ka Yehowa kakahona hanshi, kakosha mulambu ne nkunyi ne mabue ne dinfuenkenya ne kakakamisha mai akadi mu mutuhu.

³⁹Hakatangila bantu bualu ebu, bakatua mpala yabo hanshi, bamba ne, Yehowa, yeye udi Nzambi; Yehowa, yeye udi Nzambi.

⁴⁰Eliya wakabambila ne, Kuatai baprofete ba Bâla, nansha umue wabo kanyemi. Bakabakuata; Eliya wakaya nʼabo ku kasulu ha Kishona, wakabashihelaku.

⁴¹Eliya wakambila Ahaba ne, Juka biebe, udie, unue; bualu bua tshiona tshia nvula ya bungi tshidiku.

⁴²Nunku Ahaba wakaya bua kudia ne kunua. Eliya wakabanda ha mutu ha Kâmele; wakinama hanshi, wakateka mpala wandi hankatshi ha binu biandi.

⁴³Wakambila muntu wandi ne, Ya, utangile ku luseke lua ku mai manene. Wakaya, wakatangila, wakamba ne, Kakuena tshintu. Yeye wakamba ne, Ya kabidi misangu muanda mutekete.

⁴⁴Hakayeye musangu wa muanda mutekete, yeye wakamba ne, Mona, ditutu dikese bu bunene bua tshianza tshia muntu didi dibanda ku mai manene. Eliya wakamba ne, Ya, wambile Ahaba ne, Longolola dikalu diebe, uhueke biebe bua nvula kakukandi.

⁴⁵Anu tshituha tshihi diulu diakafika ne matutu, tshitelele tshiakatuta, nvula ya bungi yakaloka. Ahaba wakaya mu dikalu mu nshila wa ku Yizelele;

⁴⁶tshianza tshia Yehowa tshiakadi kudi Eliya; wakasuika mukaba mu tshimona tshiandi, wakanyema ku mpala kua Ahaba tô ne ku tshibi tshia ku Yizelele.