Read tshiluba 1 Bakelenge 2 Bible Online

1 Bakelenge 2 - tshiluba bible

1 Bakelenge 2

¹Matuku a Davidi akasemena ha buihi bua yeye afue; yeye wakadimusha muanʼandi Solomo, wamba ne,

²Nyaya mu nshila udi ba ha buloba bonso baya: nunku wikale ne bukole, udivuishe mulume wa bushuwa.

³Utumikile mei a Yehowa, Nzambi webe, bua kuenda mu nshila yandi, ne bua kulamata mikenji yandi ne mei andi onso ne mikandu yandi ne mianda yandi yonso bu mudibi bifunda mu mikanda ya Mose, bua wewe wikale ne diakalengele mu malu onso audi wenza, ne mu nshila yonso ludi wenda;

⁴bua Yehowa kujadikeye di diandi diakangambileye ne, Bikala bana bebe badimuke mu nshila yabo, benda ku mpala kuanyi mu bulelela ne mitshima yabo yonso ne mioyo yabo yonso, hashishe, wewe kuena uhanga muntu wa kushikama mu nkuasa wa bukelenge wa Isalele tshiendelele.

⁵Bualu bukuabo kabidi, udi mumanye buakangenzela Yoaba, muana wa Seluya, ne bu muakenzeleye tupitene tubidi tua masalayi a Isalele, Abinê, muana wa Nê, ne Amasa, muana wa Yetê, bakashiheye: nunku wakamatshisha mashi a nvita hatuakadi ne ditalala, wakalaba mashi a nvita ku mukaba wakadi mu tshifuka tshiandi ne ku bisabata biakadi ku makasa andi.

⁶Wenze bu mudi lungenyi luebe; kuitabushi bua mutu wandi udi ne nsuki mitoke tô ubuele mu Muaba wa Bafue ne ditalala.

⁷Kadi uleshe bana balume ba Bâzilai, Muena Gilada, luse: bobo bikale munkatshi mua badi badia ku mesa ebe; bualu bua bobo bakankuatshisha hanakanyema ku mpala kua muanʼenu Abashaloma.

⁸Bualu bukuabo, Shimei, muana wa Gela, udi nʼebe kabidi, Muena Benyamina wa mu Bahulima, wakampenda ne bihendu bibi mu dituku dinakafuma ku Mahanayima, udi nʼebe; yeye wakalua kusangakena nʼanyi ku Yadene; nakaditshiha kudiye ku mesu kua Yehowa ne, Tshiena nkushiha ne muele wa nvita.

⁹Kadi kumubadi bu muntu udi kayi ne bualu, bualu bua wewe udi muena lungenyi; neumanye bualu bûdi nʼabu mbua kumuenzela: wewe neutume mutu wandi udi ne nsuki mitoke tô mu Muaba wa Bafue ne mashi.

¹⁰Davidi wakalala tulu ne bankambua bandi, bakamujika mu musoko wa Davidi.

¹¹Matuku onso akakokesha Davidi Bena Isalele akadi bidimu makumi anai: wakakokesha mu Hebelone bidimu muanda mutekete; wakakokesha mu Yelushalema bidimu makumi asatu ne bisatu.

¹²Solomo wakashikama mu nkuasa wa bukelenge wa Davidi, tatu wandi; bukelenge buandi buakajadikibua bikole.

¹³Hashishe Adoniya, muana wa Hagita, wakalua kudi Betasheba, mamu wa Solomo. Yeye wakamuebesha ne, Wewe ulualua ne ditalala, anyi? Yeye wakamukudimuna ne, Ditalala didiku.

¹⁴Yeye wakamba kabidi ne, Ndi ne bualu bua kukuambila. Wakamuambila ne, Ambaku.

¹⁵Yeye wakamuambila ne, Wewe udi mumanye ne, Bukelenge ebu buakadi buanyi, ne Bena Isalele bonso bakateka mesu abo kundi bua meme kubakokesha; kadi bukelenge buakukudimuka mpindiu buakulua bua muanʼetu, bualu bua Yehowa wakamuhabu.

¹⁶Katataka ndi nkulomba anu bualu bumue, kumbengi nansha. Yeye wakamuambila ne, Ambaku.

¹⁷Yeye wakamuambila ne, Ndi nkusengelela ne, Ungakuile kudi mukelenge Solomo (bualu bua yeye kena ubenga dî diebe) bua yeye ampe Abishaga, Muena Shunema, ikale mukashi wanyi.

¹⁸Betasheba wakamuambila ne, Kakuena bualu, ne nku akuhe kudi mukelenge.

¹⁹Nunku Betasheba wakaya kudi mukelenge Solomo bua kumuambila bualu bua Adoniya. Mukelenge wakajuka bua kusangakeneye nʼandi, wakatua mpala wandi hanshi ku mesu kuandi, wakashikama mu nkuasa wa bukelenge kabidi; wakamba dî bua kutekelabo mamu wa mukelenge nkuasa wa bukelenge mukuabo, wakashikama ku tshianza tshiandi tshia balume.

²⁰Hashishe yeye wakamba ne, Ndi ne bualu bukese bua kukukonka, kububengi nansha. Mukelenge wakamuambila ne, Ambaku, mamu wanyi, tshiena mbenga dî diebe nansha.

²¹Yeye wakamuambila ne, Fila Abishaga, Muena Shunama, kudi Adoniya muanʼenu bu mukashi wandi.

²²Mukelenge Solomo wakakudimuna mamu wandi ne, Udi ulombela Adoniya Abishaga, Muena Shunama, bua tshinyi? Biakane umulombele bukelenge kabidi, bualu bua yeye udi mukulu wanyi: umulombele ne Ebeyatâ muakuidi, ne Yoaba, muana wa Seluya.

²³Hashishe mukelenge Solomo wakaditshiha kudi Yehowa Wamba ne, Nzambi angenzele malu adiye musue, bikala Adoniya kayi muambe dî edi bua kuhisha nʼadi muoyo wandi.

²⁴Nunku bu mudi Yehowa ne muoyo, wakunjadika, wakunshikika mu nkuasa wa bukelenge wa tatu wanyi Davidi, wakungenzela nsubu wanyi bu muakandayeye, bulelela, Adoniya neafue biandi lelu.

²⁵Mukelenge Solomo wakatuma Benaya, muana wa Yehoyada, wakamuhonesha ne yeye wakafua.

²⁶Mukelenge wakambila Ebeyatâ muakuidi ne, Hingane ku Anatota ku madimi ebe bualu bua udi ne bualu bua kufua: tshiena nkushiha katataka, bualu bua wewe waka tua la mushete wa Mukelenge Yehowa ku mpala kua Davidi, tatu wanyi, ne bualu bua wewe wakakenga ne tatu wanyi mu makenga onso akadiye nʼau.

²⁷Nunku Solomo wakumusha Ebeyatâ mu buakuidi bua Yehowa, bua kushikisheye dî diakamba Yehowa bua nsubu wa Eli mu Shilo.

²⁸Lumu luakafika kudi Yoaba; bualu bua Yoaba wakalonda Adoniya, kadi yeye kakalonda Abashaloma. Yoaba wakanyemena mu Ntenta wa Yehowa, wakakuata ku nsengu ya tshishihelu.

²⁹Bakambila mukelenge Solomo ne, Yoaba udi munyemene mu Ntenta wa Yehowa, udi wimana ku tshishihelu. Hashishe Solomo wakatuma Benaya, muana wa Yehoyada, ne, Ya umushihe.

³⁰Benaya wakafika ku Ntenta wa Yehowa, wakamuambila ne, Mukelenge udi wamba ne, Hatuka. Yeye wakamba ne, Nansha, nenfuile kunoko. Benaya wakahingana kudi mukelenge, wakamuambila ne, Yoaba wakungambila mei nunku.

³¹Mukelenge wakamuambila ne, Umuenzele bu muakuambeye, umushihe, umujike: bua wewe kumusha mashi akamatshisha Yoaba hanshi hatuhu kundi ne ku nsubu wa tatu wanyi.

³²Yehowa neahingishe mashi andi ha mutu nʼandi, bualu bua yeye wakashiha bantu babidi bakadi bamuhita yeye buakane; yeye wakabashiha ne muele wa nvita; tatu wanyi Davidi kakamanya bualu ebu; mena abo akadi Abinê, muana wa Nê, kapitene ka masalayi a Bena Isalele, ne Amasa, muana wa Yetê, kapitene ka masalayi a Bena Yuda.

³³Nunku mashi abo ikale ha mutu ha Yoaba ne ha mitu ha bana bandi tshiendelele; kadi ditalala didi difuma kudi Yehowa dikale kudi Davidi ne kudi bana bandi ne ku nsubu wandi ne ku nkuasa wandi wa bukelenge tshiendelele.

³⁴Hashishe Benaya, muana wa Yehoyada, wakaya, wakamuhonesha, wakamushiha; wakajikibua mu nsubu muandi wa mu tshihela.

³⁵Mukelenge wakahingisha Benaya, muana wa Yehoyada, mu muaba wa Yoaba ha mutu ha masalayi; mukelenge wakahingisha Sadoka muakuidi mu muaba wa Ebeyatâ kabidi.

³⁶Mukelenge wakatuma dî bua kubikila Shimei, wakamuambila ne, Asa nsubu webe mu Yelushalema, ushikamemu, kuhatuki bua kuya kuntu nansha.

³⁷Bualu bua dituku diudi uhatuka usabuka kasulu ka Kidelona, umanye biebe ne, Wewe neufue bulelela: mashi ebe neikale ha mutu hebe.

³⁸Shimei wakambila mukelenge ne, Dî diwakuamba ndimpe: muntu webe nênze bu muakamba mukelenge wandi. Shimei wakashikama mu Yelushalema matuku a bungi.

³⁹Hakahita bidimu bisatu, bantu babidi ba Shimei bakanyemena kudi Akisha, muana wa Mâka, mukelenge wa mu Gata. Bakambila Shimei ne, Mona, bantu bebe badi mu Gata.

⁴⁰Shimei wakajuka, wakela tshiseba ha nyima ha mpunda, wakaya kudi Akisha mu Gata bua kukebeye bantu bandi; Shimei wakaya ku Gata, wakahingana ne bantu bandi.

⁴¹Bakambila Solomo ne, Shimei wakumuka mu Yelushalema, wakaya ku Gata, wakahingana kabidi.

⁴²Mukelenge wakatuma dî bua kubikila Shimei, wakamuambila ne, Tshiakakutshihisha kudi Yehowa, tshiakakuambila dî dikole ne, Dituku diudi Umuka bua kuendakana ha bule, wewe neufue bulelela, anyi? Wewe wakitaba ne, Dî dinakunvua ndimpe.

⁴³Nunku wewe wakashiha kuditshiha kua kudi Yehowa, ne mukandu unakakuambila bua tshinyi?

⁴⁴Mukelenge wakambila Shimei kabidi ne, Wewe udi mumanye malu mabi onso adi masokome mu mutshima webe awakenzela Davidi, tatu wanyi: nunku Yehowa neakudimune bubi buebe ha mutu hebe.

⁴⁵Kadi mukelenge Solomo neavudishibue disanka, ne nkuasa wa bukelenge wa Davidi neajadikibue ku mesu kua Yehowa tshiendelele.

⁴⁶Nunku mukelenge wakela dî kudi Benaya, muana wa Yehoyada; yeye wakaya, wakamushiha, wakafua. Nunku bukelenge buakajadikibua mu bianza bia Solomo.