Read tshiluba 1 Bakelenge 22 Bible Online

1 Bakelenge 22 - tshiluba bible

1 Bakelenge 22

¹Bena Sulia ne Bena Isalele kabakaluangana nvita tô bidimu bisatu.

²Kadi mu tshidimu tshisatu Yehoshafata, mukelenge wa Yuda wakaya kudi mukelenge wa Isalele.

³Mukelenge wa Isalele wakambila bantu bandi ne, Nudi bamanye ne, Lamota-gilada udi wetu ne tuetu tudi bashikame tshianana, katuena tûnyenga mu bianza bia mukelenge wa Sulia, anyi?

⁴Yeye wakebesha Yehoshafata ne, Wewe neuye nʼanyi bua kuluangana ne Bena Lamota-gilada, anyi? Yehoshafata wakambila mukelenge wa Isalele ne, Meme ndi bu wewe, bantu banyi badi bu bantu bebe, tubalu tuanyi tudi bu tubalu tuebe.

⁵Yehoshafata wakambila mukelenge wa Isalele ne, Ndi nkusengelela ne, Udianjile kukonka dî dia Yehowa.

⁶Hashishe mukelenge wa Isalele wakasangisha baprofete bu nkama inai, wakabebesha ne, Nye kuluangana ne Bena Lamota-gilada, anyi nshale? Bakamuambila ne, Uye biebe, bualu bua Yehowa neafile musoko mu bianza bia mukelenge.

⁷Kadi Yehoshafata wakakonka ne, Kakuena muprofete wa Yehowa mukuabo kunoko utudi mua kuebesha, anyi?

⁸Mukelenge wa Isalele wakambila Yehoshafata ne, Muntu mukuabo udiku utudi mua kuebesha Yehowa mukana muandi, dina diandi Mikaya, muana wa Yimela; kadi ndi nʼandi tshiji bualu bua yeye katu wangambila malu mimpe, utu wangambila anu malu mabi, Yehoshafata wakamba ne, Mukelenge kambi nunku nansha.

⁹Hashishe mukelenge wa Isalele wakabikila kahita, wakamuambila ne, Lua ne Mikaya, muana wa Yimela, lubilu.

¹⁰Mukelenge wa Isalele ne Yehoshafata, mukelenge wa Yuda, bakadi bashikame mu nkuasa yabo ya bukelenge, baluate bilulu bia bakelenge, ku mbelu kua tshibi tshia ku Samalea; baprofete bonso bakadi bamba mei ku mpala kuabo.

¹¹Sedekiya, muana wa Kenana, wakadienzela nsengu ya biamu, wakamba ne, Yehowa udi wamba ne, Wewe neusekile nʼai Bena Sulia tô ne hajiminabo.

¹²Baprofete bonso bakamba nunku ne, Ya biebe ku Lamota-gilada, wikale ne diakalengele; bualu bua Yehowa neafile musoko mu bianza bia mukelenge.

¹³Messager wakaya kubikila Mikaya, wakamuambila ne, Mona, baprofete bonso badi bambila mukelenge mei mimpe bu mukana mumue; nunku ndi nkusengelela ne, Dî diebe difuanangane ne mei abo, bua kumuambila mei mimpe kabidi.

¹⁴Mibi ya wakamba ne. Bu mudi Yehowa ne muoyo, meme nemmuambile anu mei adi Yehowa ungambila.

¹⁵Hakafikeye kudi mukelenge, yeye wakamuebesha ne, Mikaya, tuye kuluangana ne Bena Lamota-gilada, anyi tushale? Yeye wakamuambila ne, Ya biebe, wikale ne diakalengele, Yehowa neafile musoko mu bianza bia mukelenge.

¹⁶Mukelenge wakamuambila ne, Bundi nʼabu mbua kukutshihisha misangu dungi munyi bua wewe kungambila anu dî dilelela mu dina dia Yehowa?

¹⁷Yeye wakamuambila ne, Nakatangila Bena Isalele bonso bamuangalashibue ha mutu ha mikuna bu mikoko idi kayiyi ne mulami; Yehowa wakamba ne, Bobo kabena ne mulami, mbimpe bua buonso buabo bahingane ku nsubu yabo talalâ.

¹⁸Mukelenge wa Isalele wakambila Yehoshafata ne, Tshiakukuambila ne, Yeye kena ungambila malu mimpe, kadi anu malu mabi, anyi?

¹⁹Mikaya wakamba ne, Unvuai dî dia Yehowa: Nakatangila Yehowa mushikame mu nkuasa wandi wa butumbi, ne bisumbu bia bonso badi mu diulu bakadi bimane ha buihi nʼandi ku tshianza tshiandi tshia balume ne ku tshianza tshiandi tshia bakashi.

²⁰Yehowa wakakonka ne, Nganyi neadinge Ahaba bua kuyeye kuluangana ne Bena Lamota-gilada ne kuhoneyeku? Mukuabo wakamba mei kampanda ne mukuabo wakamba mei kansanga.

²¹Hashishe nyuma mukuabo wakimana ku mesu kua Yehowa, wakamba ne, Meme nemmudinge.

²²Yehowa wakamuebesha ne, Bishi? Wakamba ne, Nenye, nengikale bu nyuma wa kudinga mukana mua baprofete bandi bonso. Yeye wakamuambila ne, Wewe neumudinge, neumuhite bukole; ya, wenze nunku.

²³Nunku Yehowa wakateka nyuma wa kudinga mukana mua baprofete bebe bonso; Yehowa wakamba malu mabi bualu buebe.

²⁴Hashishe Sedekiya, muana wa Kenana, wakasemena ha buihi, wakataha Mikaya dilu ku ditama diandi, wakamuebesha ne, Nyuma wa Yehowa wakaya mu nshila kai hakafumeye kundi bua kukuambila dî?

²⁵Mikaya wakamuambila ne, Wewe neumone dituku diudi ubuela mu tshisokomenu tshiebe bua kusokoma.

²⁶Mukelenge wakamba ne, Kuatai Mikaya, nuye nʼandi kudi Amona, nfumu wa musoko, ne kudi Yoasha, muana wa makelenge;

²⁷nubambile ne, Mukelenge udi wamba ne, Nubueshe muntu eu mu nsubu wa lukanu, numudishe bia kudia bia badi mu dikenga, numunuishe mai a badi mu dikenga tô ne hanahingana talalâ.

²⁸Mikaya wakamuambila ne, Biwahingana talalâ, bulelela, Yehowa kena mungambile bualu. Yeye wakamba ne, Nuenu bantu bonso, unvuai.

²⁹Nunku mukelenge wa Isalele, ne Yehoshafata, mukelenge wa Yuda, bakaya kuluangana ne Bena Lamota-gilada.

³⁰Mukelenge wa Isalele wakambila Yehoshafata ne, Meme nendifuanyikishe bu muntu mukuabo hanaya mu nvita, kadi wewe uluate bilulu bia mukelenge. Mukelenge wa Isalele wakadifuanyisha bu muntu mukuabo, wakaya mu nvita.

³¹Mukelenge wa Sulia wakadianjila kuambila tupitene tua makalu andi makumi asatu ne tubidi ne, Kanuluanganyi ne bantu bakese anyi banene anu ne mukelenge wa Isalele mene.

³²Nunku hakatangila tupitene tua makalu Yehoshafata, bakambilangana ne, Bulelela, yeye udi mukelenge wa Isalele, tuakasesuka bua kuluangana nʼandi; Yehoshafata wakela dî diandi.

³³Hakatangila tupitene tua makalu ne, Yeye kena mukelenge wa Isalele; bakalukila, bakalekela kumuihata.

³⁴Kadi muntu mukuabo wakela buta buandi ku mpukahuka, wakasa mukelenge wa Isalele hakadi biamu bia nvita bituilangane. Yeye wakambila muendeshi wa dikalu diandi ne, Wahuke, umuke nʼanyi munkatshi mua masalayi bualu bua ndi mutaha mputa mukole.

³⁵Bakaluangana nvita mikole dituku adi; bakajadika mukelenge mu dikalu ku mpala kua Bena Sulia, yeye wakafua dilolo; mashi andi akahatuka mu mputa akahueka hanshi tô ne ha dikalu.

³⁶Hakamba diba kubuela, bakelangana mei ne, Bantu bonso baye ku misoko yabo ne ku buloba buabo.

³⁷Nunku mukelenge wakafua, bakaya nʼandi mu Samalea; bakajika mukelenge mu Samalea.

³⁸Hakadibo buvuwa dikalu ku mushimi wa mai wa mu Samalea, mbua yakalaka mashi andi (bakashi ba masandi bakadi bowelaku mai), bu mu dî diakamba Yehowa.

³⁹Bienzedi bia Ahaba bikuabo biakenzeye ne nsubu wa mibanga wakaseye ne misoko yonso yakaseye kabiena bifunda mu mukanda wa kulondolola kua malu a hakelenge ba Isalele, anyi?

⁴⁰Ahaba wakalala tulu ne bankambua bandi. Ahazaya, muanʼandi, wakakokesha mu muaba wandi.

⁴¹Yehoshafata, muana wa Asa, wakabanga kukokesha mu Yuda mu tshidimu tshinai tshia bukelenge bua Ahaba, mukelenge wa Isalele.

⁴²Yehoshafata wakadi ne bidimu makumi asatu ne bitanu hakabangeye kukokesha; wakakokesha mu Yelushalema bidimu makumi abidi ne bitanu. Dina dia mamu wandi diakadi Azuba, muana wa Shilihi.

⁴³Yeye wakenda mu nshila yonso ya tatu wandi Asa; yeye kakasesuka mu nshila yandi, Wakenza malu mimpe ku mesu kua Yehowa; kadi yeye kakumusha bitendelelu bia ku mikuna; bantu bakatshidi bafila milambu ne musenga wa manananshi ha mutu ha mikuna.

⁴⁴Yehoshafata wakavuisha ditalala ne mukelenge wa Isalele.

⁴⁵Bienzedi bia Yehoshafata bikuabo ne bukole buakadiye nʼabu ne nvita yandi kabiena bifunda mu mukanda wa kulondolola kua malu a bakelenge ba Yuda, anyi?

⁴⁶Yeye wakumusha tshituha tshia bena sodoma bakadi bashala mu buloba mu matuku a tatu wandi Asa.

⁴⁷Kakuakadi mukelenge mu Edome; anu muloho wakadi mukelenge.

⁴⁸Yehoshafata wakenza matu a Tâshishi a kuya nʼau ku Ofî bua kuangata or; kadi kakafikaku, akafuila anu ku Esione-gebê.

⁴⁹Hashishe Ahazaya, muana wa Ahaba, wakambila Yehoshafata ne, Mbimpe bua bantu banyi baye ne bantu bebe mu matu. Yehoshafata wakabenga.

⁵⁰Yehoshafata wakalala tulu ne bankambua bandi, bakamujika ne bankambua bandi mu musoko wa Davidi, tatu wandi. Yeholama, muanʼandi, wakakokesha mu muaba wandi.

⁵¹Ahazaya, muana wa Ahaba, wakabanga kukokesha Bena Isalele mu Samalea mu tshidimu tshia dikumi ne muanda mutekete tshia bukelenge bua Yehoshafata mukelenge wa Yuda; wakakokesha Bena Isalele bidimu bibidi.

⁵²Wakenza malu mabi ku mesu kua Yehowa, wakenda mu nshila ya tatu wandi ne ya mamu wandi ne ya Yalobama, muana wa Nebata, wakenzesha Bena Isalele malu mabi.

⁵³Wakakuatshila Bala mudimu, wakamutendelela bua kufuisha Yehowa, Nzambi wa Isalele, tshiji bu muakenza tatu wandi.