Read tshiluba 1 Bakelenge 8 Bible Online

1 Bakelenge 8 - tshiluba bible

1 Bakelenge 8

¹Solomo wakasangisha bakulu bonso ba mu Isalele, ne bonso bakadi ku mutu kua bisamba biabo, ne tuhita tuakadi ku mutu kua nsubu ya Bena Isalele, kudi mukelenge Solomo mu Yelushalema, bua kuluabo ne mushete wa tshihungidi tshia mei a Yehowa mu musoko wa Davidi, Siona mene.

²Bena Isalele bonso bakadisangisha kudi mukelenge Solomo bua kudiabo bidia bia disanka mu ngondo wa Etanima udi ngondo wa muanda mutekete.

³Bakulu bonso ba mu Isalele bakalua ne bakuidi bakambula mushete.

⁴Bakalua ne mushete wa Yehowa ne ntenta wa kusambakena ne bintu bia tshijila bionso biakadi mu Ntenta; bakuidi ne Bena Lewi bakatuala bintu ebi bionso.

⁵Mukelenge Solomo ne Bena Isalele bonso bakadi badisangisha kudiye bakadi nʼandi ku mpala kua mushete, bakadi bashihela mikoko ne ngombe yakadibo kabayi mua kubala bungi buai.

⁶Bakuidi bakalua ne mushete wa tshihungidi tshia mei a Yehowa mu muaba wau wa tshijila wa mu nsubu, ku muaba mutambe wa tshijila muinshi mua mahuahua a bakeluba.

⁷Bualu bua bakeluba bakadi bolola mahuahua abo mu muaba muakadi mushete; bakeluba bakabuikila mushete ne mitshi yau.

⁸Mitshi ei yakatamba bule, nunku bakamanya mua kuntangila mu muaba wa tshijila; kadi kabakamanya mua kuntangila ha bule; idiku tô ne ku dituku edi.

⁹Nansha tshintu tshikuabo tshiakadi mu mushete eu anu mabue abidi akadi ne mikenji mifundahu akatekamu Mose ku Holeba kuakahunga Yehowa tshihungidi ne Bena Isalele hakumukabo mu buloba bua Ejipitu.

¹⁰Hakumuka bakuidi mu muaba wa tshijila, ditutu diakûsha nsubu wa Yehowa tente,

¹¹nunku bakuidi kabakamanya mua kuenza midimu yabo bualu bua ditutu edi; bualu bua butumbi bua Yehowa buakûsha nsubu wa Yehowa tente.

¹²Hashishe Solomo wakamba ne, Yehowa wakamba ne, Meme nenshikame mu mîdima mikole.

¹³Meme nakakuashila nsubu bua wewe wikale ne muaba wa kushikama tshiendelele.

¹⁴Mukelenge wakatshungulula mpala wandi, wakavudishila Bena Isalele bonso disanka; Bena Isalele bonso bakimana.

¹⁵Yeye wakamba ne, Yehowa, Nzambi wa Isalele, atumbishibue, wakambila tatu wanyi Davidi mukana muandi, bualu buakamana tshianza tshiandi lelu ne,

¹⁶Katshia ngumuka ne bantu banyi Bena Isalele mu Ejipitu, tshiakasungula musoko munkatshi mua bisamba bia Bena Isalele wa kuasamu nsubu, bua dina dianyi dikalemu; kadi nakasungula Davidi bua kuikaleye ku mutu kua bantu banyi Bena Isalele.

¹⁷Davidi tatu wanyi wakadi wela meji mu mutshima wandi bua kuashileye dina dia Yehowa, Nzambi wa Isalele, nsubu.

¹⁸Kadi Yehowa wakambila Davidi tatu wanyi ne, Wewe wakenza bimpe hawakela meji mu mutshima webe bua kuashila dina dianyi nsubu;

¹⁹kadi wewe kuena mua kungashila nsubu; kadi muana webe mulume udi uluhuka munda muebe, yeye neashale dina dianyi nsubu.

²⁰Yehowa wakamana kujadika dî diandi diakambeye: bualu bua meme nakahingana mu muaba wa tatu wanyi Davidi bua kushikama mu nkuasa wa bukelenge wa Isalele bu muakatulaya Yehowa; nakamana kuashila dina dia Yehowa, Nzambi wa Isalele, nsubu.

²¹Nakalongoluela mushete muaba, mudi tshihungidi tshia Yehowa tshiakahungeye ne bankambua betu hakumukeye nʼabo mu buloba bua Ejipitu.

²²Solomo wakimana ku mpala kua tshioshelu tshia Yehowa ku mesu kua Bena Isalele bonso, wakolola bianza biandi kulu,

²³wakamba ne, Yehowa, Nzambi wa Isalele, kakuena nzambi mukuabo bu wewe mu diulu anyi hanshi ha buloba: utu wamana bihungidi ne luse lujalame kudi bantu bebe badi benda ku mpala kuebe ne mitshima yabo yonso;

²⁴wakajadika ne muntu webe Davidi tatu wanyi mulayi uwakamulaya; bulelela, wewe udi wamba bualu mukana muebe, utu wabumana ne tshianza tshiebe, bu muwakuenza lelu eu.

²⁵Ka, Yehowa, Nzambi wa Isalele, ujadike ne muntu webe Davidi tatu wanyi mulayi uwakamuha ne, Wewe kuena uhanga muntu wa kushikameye ku mesu kuanyi mu nkuasa wa bukelenge wa Isalele; bikala bana bebe badimuke mu nshila yabo ku mpala kuanyi bua kuendabo bu muwakuenda ku mpala kuanyi.

²⁶Nunku Nzambi wa Isalele, ndi nkusengelela ne, Jadika dî diebe diwakambila muntu webe Davidi tatu wanyi.

²⁷Kadi Nzambi neitabushe bua kuikaleye ha buloba, anyi? Monai, diulu ne diulu ditamba mulu kaena makukumbane, ka nsubu eu unakukuashila neikale muhite bukese!

²⁸Kadi Yehowa, Nzambi wanyi, teleja matshu ebe ku mei ne ku kutendelela bia muntu webe bua kunvua kudila ne kutendekena kua muntu webe kudiye utendekena nʼaku lelu;

²⁹bua mesu ebe ikale matabale ku nsubu eu munya ne butuku ku muaba eu uwakamba ne, Dina dianyi nedikaleku; bua kunvua kulomba kua muntu webe kudiye ulomba mu muaba eu.

³⁰Unvua kutendekena kua muntu webe ne kua bantu bebe Bena Isalele hadibo balomba mu muaba eu; ubunvuile mu diulu mu muaba webe ûdi mushikame; ne hau-nvua, utubuikidile mibi yetu.

³¹Bienzela muntu mukuandi bibi, ne biamukuata bualu bua kuditshiheye nʼabu, biabueleye mu nsubu webe bua kuditshiheye ku tshioshelu tshiebe,

³²unvue biebe mu diulu bua kulumbuluila bantu bebe; uhishe muntu mubi bua kuhingisha bualu buandi ha mutu nʼandi; uhingishe muntu udi kayi ne bualu, bua kumuhita ku buimpe buandi.

³³Biahita bena lukuna bantu bebe Bena Isalele bukole bualu bua bobo bakukuenzela bibi, biakudimunabo mitshima yabo kûdi bua kuitabusha dina diebe ne bua kukutendelela ne bua kukutendekena mu nsubu eu,

³⁴ubunvuile mu diulu, ubuikidile bantu bebe Bena Isalele mibi yabo, ubahingishe kabidi mu buloba buwakuha bankambua babo.

³⁵Hawakanda diulu bua nvula kayimatshi, bualu bua bobo bakukuenzela bibi; biatendelelabo ku muaba eu, bitabushabo dina diebe, biakudimunabo mitshima yabo bua mibi yabo hawabakengesha,

³⁶ubunvuile mu diulu, ubuikidile bantu bebe, Bena Isalele, mibi yabo hawabalesha nshila muimpe udibo ne bualu bua kuendela; nunku umatshishe nvula ha buloba buebe buwakuha bantu bebe bu buhianyi buabo.

³⁷Bialua tshiole mu buloba, anyi disama dikole, anyi biakuata butu anyi bishi, anyi bialua mikumbi anyi meshi, anyi biabatshintshimika bena lukuna babo mu buloba bua misoko yabo, bikalabo ne dikenga kai anyi disama kai;

³⁸biakutendelela anyi biakutendekena muntu umue anyi Bena Isalele bonso, biamanya muntu yonso dikenga dia mutshima wandi, ne biolololeye bianza biandi ku nsubu eu;

³⁹ubunvuile mu diulu kûdi ushikama, ubabuikidile mibi yabo, ubenzele bu mûdi mumanye malu adi mu mitshima yabo (bualu bua anu wewe nkayebe ngudi mumanye mitshima ya bantu bonso);

⁴⁰bua bobo bakutshine matuku onso adibo bashikame mu buloba buwakaha bankambua babo.

⁴¹Bualu bua muntu wa kua bende udi kayi wa munkatshi mua bantu bebe Bena Isalele, hafumeye mu buloba bua kule bua dina diebe

⁴²(bualu bua bobo nebunvue lumu lua dina diebe dinene, ne lua tshianza tshiebe tshikole ne lua diboko diebe dilulame), halueye bua kukutendelela ku nsubu eu,

⁴³umunvuile mu diulu kûdi ushikama, wenzele muntu wa bende malu onso adiye ukulomba; bua bantu bonso ba ha buloba bamanye dina diebe, bua kukutshina bu mudi bantu bebe Bena Isalele benze; bamanye kabidi ne dina diebe didi dibikidibue ku nsubu eu unakukuashila.

⁴⁴Biaya bantu bebe bua kuluanganabo ne bena lukuna babo mu nshila yonso iudi ubatuma; hatangilabo mesu abo ku musoko eu uwakusungula ne ku nsubu eu unakuashila dina diebe bua kutendelelabo Yehowa,

⁴⁵unvua kulomba kuabo ne kutendekena kuabo mu diulu, ujadike bualu buabo.

⁴⁶Biakuenzelabo bibi (ne kakuena muntu udi kayi wenza malu mabi) ne wewe udi nʼabo tshiji, udi ubafila mu bianza bia bena lukuna babo bua kuyabo nʼabo bu bahika mu buloba bua bena lukuna, mu buloba budi kule anyi budi ha buihi;

⁴⁷kadi biabangabo kuelangana meji munda muabo mu buloba buwakabatuma bu bahika, ne biakudimunabo mitshima yabo, biakutendekenabo mu buloba buwakabatuma bu bahika, bamba ne, Tuakuenza bibi, tuakuenza bualu buhote, tuakahambuka;

⁴⁸biahinganabo kûdi ne mitshima yabo yonso ne mioyo yabo yonso, mu buloba bua bena lukuna babo bakababuesha mu buhika, biakutendelelabo ne mesu abo matangile ku buloba buabo buwakaha bankambua babo, ne ku musoko eu uwakusungula, ne ku nsubu eu unakuashila dina diebe;

⁴⁹unvue kulomba kuabo ne kutendekena kuabo mu diulu kûdi ushikama, ujadike bualu buabo.

⁵⁰Ulekelele bantu bebe mahanga abo, ubabuikidile mibi yabo yakukuenzelabo; ubafuishe luse kudi bakababuesha mu buhika, bua bobo babafuile luse;

⁵¹(bualu bua bobo badi bantu bebe ne buhianyi buebe buwakalua nʼabo mu buloba bua Ejipitu munkatshi mua tshikutu tshia biamu)

⁵²bua mesu ebe ikale matabale ku kutendekena kua muntu webe ne kua bantu bebe Bena Isalele bua kubunvuila misangu yonso hadilabo kûdi.

⁵³Bualu bua wewe, Mukelenge Yehowa, nguakabasungula munkatshi mua bisamba bionso bia ha buloba bua kuikalabo buhianyi buebe, bu muakamuambila muntu webe Mose hawakafuma ne bankambua betu mu Ejipitu.

⁵⁴Hakashikisha Solomo kulomba kuandi ne kutendekena kuandi kudi Yehowa, wakajuka ku mpala kua tshioshelu tshia Yehowa kuakatueye binu biandi hanshi ne bianza biandi biolola mulu.

⁵⁵Wakimana, wakavudishila Bena Isalele bonso disanka, muele dî dikole ne,

⁵⁶Yehowa wakaha bantu bandi Bena Isalele dikisha bu muakabalayeye atumbishibue; nansha dî dimue dia milayi yandi mimpe yonso yakalayeye muntu wandi Mose kadiakahona hanshi hatuhu.

⁵⁷Yehowa, Nzambi wetu, ikale nʼetu bu muakikaleye ne bankambua betu; kumuki munkatshi muetu, katulekedi;

⁵⁸bua yeye akudimushe mitshima yetu kudiye bua tuetu tuende mu nshila yandi yonso, bua kutumikila mikenji yandi ne mei andi ne mikandu yandi biakambileye bankambua betu.

⁵⁹Mei anyi au anakatendekena nʼau Yehowa ikale ha buihi ne Yehowa, Nzambi wetu, munya ne butuku, bua yeye ajadike bualu bua muntu wandi ne bua bantu bandi Bena Isalele bu mudi difuku dionso didi ne bualu buadi;

⁶⁰bua bantu bonso ba ha buloba bamanye ne, Yehowa udi Nzambi; kakuena mukuabo.

⁶¹Mitshima yenu ikale miakanangane ne Yehowa, Nzambi wetu, bua nuenu nuende mu nshila yandi bua kutumikila mikenji yandi, bu mudibi lelu.

⁶²Mukelenge ne Bena Isalele bonso bakadi nʼandi bakafila milambu kudi Yehowa.

⁶³Solomo wakahia milambu kudi Yehowa ya kuvuisha nʼai bantu ditalala, ngombe binunu makumi abidi ne bibidi ne mikoko binunu lukama ne makumi abidi. Nunku mukelenge ne Bena Isalele bonso bakajidila nsubu wa Yehowa.

⁶⁴Mu dituku adi mene mukelenge wakajidila muaba wa tshiendedi wakadi ku mpala kua nsubu wa Yehowa, bualu bua yeye wakafilaku milambu ya kuosha ha kahia ne milambu ya bukula ne manyi a milambu ya kuvuisha nʼai ditalala; bualu bua tshioshelu tshia tshiamu tshia mitaku tshiakadi ku mesu kua Yehowa tshiakatamba bukese bua kukumbana milambu ya kuosha ha kahia ne ya bukula ne ya manyi a milambu ya kuvuisha nʼai ditalala.

⁶⁵Nunku Solomo wakalambishila Bena Isalele bonso bakadiye nʼabo tshisumbu tshinene bidia bia disanka ku tshibi tshia ku Hamata tô ne ku kasulu kadi ku mukalu wa buloba bua Ejipitu; bakadia ku mesu kua Yehowa tô mbingu ibidi bu matuku dikumi ne anai.

⁶⁶Mu dituku dia muanda mukulu yeye wakatuma bantu kuabo; bobo bakavudishila mukelenge disanka; bakaya ku nsubu yabo ne disanka dinene mu mitshima yabo hua malu mimpe onso akenzela Yehowa muntu wandi Davidi ne bantu bandi Bena Isalele.