Read tshiluba 2 Bakelenge 15 Bible Online

2 Bakelenge 15 - tshiluba bible

2 Bakelenge 15

¹Mu tshidimu tshia makumi abidi ne muanda mutekete tshia bukelenge bua Yalobama, mukelenge wa Isalele, Uziya, muana wa Amasaya, mukelenge wa Yuda, wakabanga kukokesha.

²Wakadi ne bidimu dikumi ne bisambombo hakabangeye kukokesha; wakakokesha mu Yelushalema tô bidimu makumi atanu ne bibidi; dina dia mamu wandi diakadi Yekoliya wa mu Yelushalema.

³Wakenza malu mimpe ku mesu kua Yehowa bu muakenza Amasaya, tatu wandi.

⁴Kadi kakumusha bitendelelu bia ku mikuna; bantu batshivua bafila milambu ya kuosha ha kahia ne musenga wa manananshi ha mutu ha mikuna.

⁵Yehowa wakasamisha mukelenge ne disama dia nsudi tô ne ku dituku dia lufu luandi; wakashikama mu nsubu ha buandi. Yotama, muana wa mukelenge, wakadi ku mutu kua nsubu wandi ulumbulula malu a bantu ba mu buloba.

⁶Bienzedi bia Uziya bikuabo ne malu onso biakenzeye kabiena bifunda mu mukanda wa kulondolola kua malu a bakelenge ha Yuda, anyi?

⁷Uziya wakalala tulu ne bankambua bandi, bakamujika hohamue ne bankambua bandi mu musoko wa Davidi. Yotama, muanʼandi, wakakokesha mu muaba wandi.

⁸Mu tshidimu tshia makumi asatu ne muanda mukulu tshia bukelenge bua Uziya, mukelenge wa Yuda, Zekâya, muana wa Yalobama, wakakokesha Bena Isalele mu Samalea anu ngondo isambombo.

⁹Wakenza malu mabi ku mesu kua Yehowa bu muakenza batatuʼandi; kakasesuka ku malu mabi a Yalobama, muana wa Nebata, akenzesheye Bena Isalele.

¹⁰Shaluma, muana wa Yabesha, wakamuelela tshifufu, wakamukuma ku mesu kua bantu, wakamushiha, wakakokesha mu muaba wandi.

¹¹Bienzedi bia Zekâya bikuabo bidi bifunda mu mukanda wa kulondolola kua malu a bakelenge ba Isalele.

¹²Edi ndi diakambila Yehowa Yehu ne, Bana bebe nebashikame ku nkuasa wa bukelenge wa Isalele tô ne ku tshikondo tshinai. Bualu ebu buakenjibua.

¹³Mu tshidimu tshia makumi asatu ne tshitema tshia bukelenge bua Uziya, mukelenge wa Yuda, Shaluma, muana wa Yabesha, wakabanga kukokesha; wakabakokesha mu Samalea ngondo umue.

¹⁴Menahema, muana wa Gadi, wakafuma ku Tîsa, wakaya ku Samalea, wakakuma Shaluma, muana wa Yabesha, mu Samalea, wakamushiha, wakakokesha mu muaba wandi.

¹⁵Bienzedi bia Shaluma bikuabo ne tshifufu tshiakeleye bidi bifunda mu mukanda wa kulondolola kua malu a bakelenge ba Isalele.

¹⁶Hashishe Menahema wakahaula musoko wa Tifesa, wakashiha bantu bakadiku tô ne ku Tîsa; bualu bua bobo kabakunzulula bibi ku mpala kuandi, yeye wakabashiha; bakashi bonso bakadi ne mafu, yeye wakabahanda.

¹⁷Mu tshidimu tshia makumi asatu ne tshitema tshia bukelenge bua Uziya, mukelenge wa Yuda, Menahema, muana wa Gadi, wakabanga kukokesha Bena Isalele; wakakokesha mu Samalea bidimu dikumi.

¹⁸Wakenza malu mabi ku mesu kua Yehowa; kakasesuka mu malu mabi a Yalobama, muana wa Nebata, akenzesheye Bena Isalele matuku andi onso.

¹⁹Pula, mukelenge wa Ashû, wakalua bua kuhaula buloba. Menahema wakaha Pula ntalanta[7] ya argent tshinunu, bua yeye amukuatshishe bua kujadikeye bukelenge mu tshianza tshiandi.

²⁰Menahema wakalambuisha Bena Isalele, bantu babanji bonso, nshekele[8] ya argent makumi atanu kudi muntu ne muntu, bua kulambuleye mukelenge wa Ashû. Nunku mukelenge wa Ashû wakahingana kuabo, kakashikama mu buloba bua Isalele.

²¹Bienzedi bikuabo bia Menahema ne malu onso akenzeye kabiena bifunda mu mukanda wa kulondolola kua malu a bakelenge ba Isalele, anyi?

²²Menahema wakalala tulu ne bankambua bandi; Pekaya, muanʼandi, wakakokesha mu muaba wandi.

²³Mu tshidimu tshia makumi atanu tshia bukelenge bua Uziya, mukelenge wa Yuda, Pekaya, muana wa Menahema, wakabanga kukokesha Bena Isalele mu Samalea; wakabakokesha bidimu bibidi.

²⁴Wakenza malu mabi ku mesu kua Yehowa; kakasesuka mu malu mabi a Yalobama, muana wa Nebata, akenzesheye Bena Isalele.

²⁵Peka, muana mulume wa Lemalaya, kapitene ka masalayi andi wakamuelela tshifufu, wakamukuma mu Samalea mu nsubu wa mukelenge; Âgoba ne Aliye ne Bena Gilada makumi atanu bakadi nʼandi; yeye wakamushiha, wakakokesha mu muaba wandi.

²⁶Bienzedi bikuabo bia Pekaya ne malu onso akenzeye bidi bifunda mu mukanda wa kulondolola kua malu a bakelenge ba Isalele.

²⁷Mu tshidimu tshia makumi atanu ne bibidi tshia bukelenge bua Uziya, mukelenge wa Yuda, Peka, muana wa Lemalaya, wakabanga kukokesha Bena Isalele mu Samalea; wakabakokesha bidimu makumi abidi.

²⁸Wakenza malu mabi ku mesu kua Yehowa; kakasesuka mu malu mabi a Yalobama, muana wa Nebata, akenzesheye Bena Isalele.

²⁹Mu matuku a Peka, mukelenge wa Isalele, Tigelata-pilesê, mukelenge wa Ashû, wakalua, wakahaula Iyona ne Abele-bete-mâka ne Yanoa ne Kedeshe ne Hasô ne Gilada ne Galela ne buloba buonso bua Nafatale, wakaya nʼabo ku Ashû mu buhika.

³⁰Hoshea, muana wa Ela, wakelela Peka, muana wa Lemalaya, tshifufu, wakamukuma, wakamushiha, wakakokesha mu muaba wandi mu tshidimu tshia makumi abidi tshia bukelenge bua Yotama, muana wa Uziya.

³¹Bienzedi bikuabo bia Peka ne malu onso akenzeye bidi bifunda mu mukanda wa kulondolola kua malu a bakelenge ba Isalele.

³²Mu tshidimu tshibidi tshia bukelenge bua Peka, muana wa Lemalaya, mukelenge wa Isalele, Yotama, muana wa Uziya, mukelenge wa Yuda, wakabanga kukokesha.

³³Wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu dikumi ne bisambombo; dina dia mamu wandi diakadi Yelusha, muana wa Sadoka.

³⁴Wakenza malu mimpe ku mesu kua Yehowa, bu muakenza Uziya, tatu wandi.

³⁵Kadi kakumusha bitendelelu bia ku mutu kua mikuna; bantu batshivua bafila milambu ya kuosha ha kahia ne musenga wa manananshi ha mutu ha mikuna. Yeye wakalongolola tshibi tshia ku nsubu wa Yehowa.

³⁶Bienzedi bikuabo bia Yotama ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi?

³⁷Mu matuku au Yehowa wakabanga kutuma Lesinyi, mukelenge wa Sulia, ne Peka, muana wa Lemalaya, bua kuluanganabo ne Bena Yuda.

³⁸Yotama wakalala tulu ne bankambua bandi, bakamujika hohamue ne bankambua bandi mu musoko wa Davidi, tatu wandi; Ahaza, muanʼandi, wakakokesha mu muaba wandi.