Read tshiluba 2 Bakelenge 17 Bible Online

2 Bakelenge 17 - tshiluba bible

2 Bakelenge 17

¹Mu tshidimu tshia dikumi ne bibidi bia bukelenge bua Ahaza, mukelenge wa Yuda, Hoshea, muana wa Ela, wakabanga kukokesha Bena Isalele mu Samalea; wakabakokesha bidimu tshitema.

²Wakenza malu mabi ku mesu kua Yehowa; kadi kakenza bu muakenza bakelenge ba Isalele bakadi ku mpala kuandi.

³Shalamanese, mukelenge wa Ashû, wakaluangana nʼandi; Hoshea wakalua muntu wandi, wakamulambula milambu.

⁴Mukelenge wa Ashû wakamanya ne, Hoshea udi ungelela tshifufu; bualu bua yeye wakatuma ba-messager kudi So, mukelenge wa Ejipitu, kakafila milambu kudi mukelenge wa Ashû bu muakadiye wenza ku tshidimu ku tshidimu; nunku mukelenge wa Ashû wakamukuata, wakamusuika mu nsubu wa lukanu.

⁵Hashishe, mukelenge wa Ashû wakalua ku nseke yonso ya buloba, wakafika hehi ne musoko wa Samalea, wakautshintshimika tô bidimu bisatu.

⁶Mu tshidimu tshia tshitema tshia bukelenge bua Hoshea, mukelenge wa Ashû wakahaula Samalea, wakaya ne Bena Isalele ku Ashû, wakabashikika mu Halaha ne kukala kua musulu wa Habo wa mu Gozana ne mu misoko ya Bena Madai.

⁷Bualu bua Bena Isalele bakadi benza malu mabi ku mesu kua Yehowa, Nzambi wabo, wakabaluhula mu buloba bua Ejipitu mu bianza bia Palo, mukelenge wa Ejipitu, ne bakatshina nzambi mikuabo,

⁸bakenda mu mikenji ya bisamba bikuabo biakihata Yehowa ku mesu kua Bena Isalele, ne mu mikenji ya bakelenge ba Bena Isalele yakenzabo.

⁹Bena Isalele bakenza mu musokoko malu akadi kâyi mimpe ku mesu kua Yehowa, Nzambi wabo; bakadiashila bitendelelu mu misoko yabo yonso ku tshibumba tshia batentekedi tô ne ku misoko yakadi ne ngumbu;

¹⁰bakadijadikila makunshi ne Bashela ku mutu kua mikuna yonso ne muinshi mua mitshi mibishi yonso.

¹¹Bakosha musenga wa manananshi ku mutu kua mikuna, bu muakenza bisamba biakihata Yehowa ku mesu kuabo; bakenza malu mabi a kufuisha nʼau Yehowa tshiji.

¹²Bakakuatshila mpingu mudimu yakabambila Yehowa ne, Kanuenji bualu ebu.

¹³Kadi Yehowa wakadimusha Bena Isalele ne Bena Yuda mukana mua muprofete yonso ne mua mumonyi yonso ne, Kudimunai mitshima yenu ku malu mabi enu; nutumikile mikenji yanyi ne mikandu yanyi bu mudi mikenji makelela bankambua benu mukana mua bantu banyi baprofete.

¹⁴Kadi kabakunvua, bakakolesha mitshima yabo bu muakenza bankambua babo bakadi kabayi bitabusha Yehowa, Nzambi wabo.

¹⁵Bakabenga mikenji yandi ne tshihungidi tshiakahungeye ne bankambua babo ne mei andi akabambileye; bakalonda malu a hatuhu, bakalua bahote, bakalonda bisamba biakadi ha buihi nʼabo biakabambila Yehowa diambedi ne, Kanuenji bu mudibo benza.

¹⁶Bakabenga mikenji yonso yakabambila Yehowa, Nzambi wabo, bakadienzela mpingu ya tshiamu tshiakafulabo, tuana tua ngombe tubidi mene mene; bakadienzela Bashela, bakatendelela bintu bionso bia mu diulu, bakakuatshila Bâla mudimu kabidi.

¹⁷Bakahitshisha bana bakalelabo, balume ne bakashi, mu kahia, bakatempa mbuku, bakabandangana buloshi, bakadihanyisha bua kuenzabo malu mabi ku mesu kua Yehowa, bua kumufuisha nʼau tshiji.

¹⁸Nunku Yehowa wakadi ne Bena Isalele tshiji tshikole, wakabumusha ku mesu kuandi; anu tshisamba tshia Yuda nkayatshi tshiakashala.

¹⁹Bena Yuda kabidi kabakatumikila mikenji ya Yehowa, Nzambi wabo, kadi bakenda mu mikenji ya Bena Isalele yakenzabo.

²⁰Yehowa wakabenga bonso ba mu tshisamba tshia Bena Isalele, wakabakengesha, wakabafila mu bianza bia bahaudi, tô ne hakabumusheye ku mesu kuandi.

²¹Bualu bua yeye wakahandu tula Bena Isalele kudi nsubu wa Davidi; bakadisunguila Yalobama, muana wa Nebata, mukelenge wabo; Yalobama wakasesuisha Bena Isalele kudi Yehowa, wakabenzesha bualu bubi bunene.

²²Bena Isalele bakenda mu malu mabi onso a Yalobama akenzeye, kabakasesukaku nansha;

²³tô ne hakumusha Yehowa Bena Isalele ku mesu kuandi, bu muakabambileye kudi bantu bandi bonso baprofete. Nunku bakumusha Bena Isalele mu buloba buabo, bakaya nʼabo ku buloba bua Ashû tô ne ku dituku edi.

²⁴Mukelenge wa Ashû wakangata bantu ba mu Babulona ne ba mu Kuta ne ba mu Awa ne ba mu Hamata ne ba mu Sefâwayima, wakabateka mu misoko ya Samalea mu miaba ya Bena Isalele; bobo bakaheta misoko ya Samalea, bakashikamamu.

²⁵Ku tshibangidilu tshia dishikama diaboku kabakatshina Yehowa; nunku Yehowa wakatuma nyama ya ntambue munkatshi muabo, yakashiha bakuabo babo.

²⁶Nunku bakambila mukelenge wa Ashû ne, Ba bisamba biwakalua nʼabi bua kuteka mu misoko ya Samalea kabena bamanye mikenji ya nzambi wa mu buloba abu: nunku yeye wakatuma nyama ya ntambue munkatshi muabo, monai, idi ibashiha, bualu bua kabena bamanye mikenji ya nzambi wa buloba abu.

²⁷Hashishe mukelenge wa Ashû wakela mukenji ne, Hingisha umue wa bakuidi banuakumushaku, yeye aye, ashikame munkatshi muabo, abayishe mikenji ya nzambi wa buloba ahu.

²⁸Nunku umue wa bakuidi wakumushabo wakahingana, wakashikama mu Betele, wakabayisha mua kutshinabo Yehowa.

²⁹Kadi bantu ba mu tshisamba ne tshisamba bakadienzela nzambi yabo, bakayiteka mu nsubu yakibaka Bena Samalea ha mutu ha mikuna; bakenza nunku kudi tshisamba ne tshisamba mu misoko yonso yakadibo bashikama.

³⁰Nunku Bena Babulona bakenza Sukota-benota, ne Bena Kuta bakenza Nêgala ne Bena Hamata bakenza Ashima,

³¹Bena Awa bakenza Nibehaza ne Tâtaka; ne Bena Sefâwayima bakoshila Adelameleke ne Anameleke, nzambi ya Bena Sefâwayima, bana bakalelabo mu kahia.

³²Nunku bakatshina Yehowa, kadi bakadisunguila bakuidi ba munkatshi muabo, bakabafidila milambu mu nsubu yakadi ku mutu kua mikuna.

³³Bakatshina Yehowa, kadi bakakuatshila nzambi yabo mudimu, bu muakenza bantu ba mu bisamba biakabumusha.

³⁴Nunku tô ne ku dituku edi badi benza bu muakenzabo diambedi: Kabena batshina Yehowa, kabena batumikila mikandu ne mei ne mikenji biakambila Yehowa bana ba Yakoba bakidikeye ne, Bena Isalele.

³⁵Yehowa wakahunga nʼabo tshihungidi, wakabadimusha ne, Kanuena ne bualu bua kutshina nzambi mikuabo, kanuyinaminyi, kanuyikuatshidi mudimu, kanuyifididi milambu ya kuosha ha kahia.

³⁶Kadi Yehowa wakafuma nʼenu mu buloba bua Ejipitu ne bukole bua bungi ne tshianza tshiandi tshiolola, numutshine yeye, numuinamine, nufile milambu kudiye;

³⁷ne mikandu yandi ne mei andi ne mikenji yandi biakanufundileye, nubitumikile tô tshiendelele; kanutshinyi nzambi mikuabo.

³⁸Kanuhu tshihungidi tshinakahunga nʼenu muoyo; kanuena ne bualu bua kutshina nzambi mikuabo;

³⁹kadi bunudi nʼabu mbua kutshina Yehowa, Nzambi wenu; yeye neanusungile mu bianza bia bantu bonso badi nʼenu lukuna.

⁴⁰Kadi kabakamunvuila, bakenza bu mu bilele biabo bia diambedi.

⁴¹Nunku ba bisamba ebi bikuabo bakatshina Yehowa, bakatendelela mpingu yakasongabo; nunku bana bakalelabo ne bana bakadi bana babo balele badi benza bu muakenza batatu babo tô ne ku dituku edi.