Read tshiluba 2 Bakelenge 9 Bible Online

2 Bakelenge 9 - tshiluba bible

2 Bakelenge 9

¹Elisha wakabikila umue wa bana ba baprofete, wakamuambila ne, Suika mukaba webe, wangate kalondo aka ka manyi mu tshianza tshiebe, ya biebe ku Lamota-gilada.

²Hawafikaku, ukebe Yehu, muana wa Yehoshafata, muana wa Nimishi; ubuele mu nsubu, umujule munkatshi mua bana babo, uye nʼandi mu nsubu wa munda.

³Hashishe hatula kalondo ka manyi, wahongoluela ha mutu handi, umuambile ne, Yehowa udi wamba ne, Nakukusungula mukelenge ku mutu kua Bena Isalele. Hashishe unzulula tshibi, ya lubilu, kujingakanyi.

⁴Nunku nsongalume eu, muprofete mene, wakaya ku Lamota-gilada.

⁵Hakafikeyeku, wakasangana tupitene tua masalayi tuonso tushikame hanshi. Wakambila kapitene kakuabo ne, Ndi nʼebe dî. Yehu wakamuebesha ne, Udi ne nganyi dî munkatshi muetu? Yeye wakamuitaba ne, Wewe, kapitene.

⁶Wakajuka, wakabuela nʼandi mu nsubu; wakahongolola manyi ha mutu handi, wakamuambila ne, Yehowa, Nzambi wa Isalele, udi Wamba ne, Nakukusungula mukelenge ku mutu kua bantu ba Yehowa, Bena Isalele mene.

⁷Bûdi nʼabu mbua kushiha ba mu nsubu wa Ahaba, mukelenge webe, bua kusombuela mashi a bantu banyi baprofete ne a bantu bonso ba Yehowa akamatshisha tshianza tshia Izebele hanshi.

⁸Bualu bua bonso ba mu nsubu wa Ahaba nebafue; nenshihe bana balume bonso ba mu nsubu wa Ahaba, ne badishikamine ne bahika, badi mu Isalele.

⁹Nenvuishe ba mu nsubu wa Ahaba bu nsubu wa Yalobama, muana wa Nebata, ne bu nsubu wa Bâsha, muana wa Ahiya.

¹⁰Mbua mene neyidie mubidi wa Izebele mu Yizelele, kabena bamujika nansha. Yeye wakunzulula tshibi, wakaya lubilu.

¹¹Hashishe Yehu wakahingana kudi bantu ba mukelenge wandi; umue wabo wakamuebesha ne, Malu kai? Muntu au muhote wakakufila bua tshinyi? Yeye wakabambila ne, Nuenu nudi bamanye muntu au ne mei akadiye wamba.

¹²Bobo bakamba ne, Yeye udi ushima, utuambile. Yeye wakamba ne, Yeye wakungambila nunku ne, Yehowa udi wamba ne, Nakukusungula mukelenge ku mutu kua Bena Isalele.

¹³Hashishe bakaya lubilu, muntu ne muntu, wakangata tshilulu tshiandi, bakabijingila muinshi mua makasa andi hanshi ha tshibandilu, bakela mpungi, bamba ne, Yehu udi mukelenge.

¹⁴Nunku Yehu, muana wa Yehoshafata, muana wa Nimishi, wakelela Yolama tshifufu. Yolama ne Bena Isalele bonso bakadi halama Lamota-gilada bualu bua Hazaele, mukelenge wa Sulia;

¹⁵kadi mukelenge Yolama wakahingana ku Yizelele bua kumuondahabo mputa wakamutahabo kudi Bena Sulia, hakuluanganeye ne Hazaele, mukelenge wa Sulia. Yehu wakamba ne, Bikala bualu ebu mu mitshima yenu, muntu kumuki mu musoko hua kuambeye bualu ebu mu Yizelele.

¹⁶Nunku Yehu wakabanda mu dikalu diandi, wakaya ku Yizelele. Ahazaya, mukelenge wa Yuda, wakamana kuyaku bua kutangileye Yolama.

¹⁷Mutentekedi wakadi wimana ha tshibumba tshia mu Yizelele, wakatangila Yehu ne bantu bandi hakadibo balua mu nshila, wakamba ne, Ndi mutangile tshisumbu tshia bantu. Yolama wakamba ne, Tuma muntu ha nyima ha kabalu bua kusangileye nʼabo, abebeshe ne, Nulualua talalâ, anyi?

¹⁸Nunku muntu wakaya ha nyima ha kabalu bua kusangakeneye nʼabo, wakamba ne, Mukelenge udi ukonka ne, nulualua talalâ, anyi? Yehu wakamukudimuna ne, Wewe udi ukeba ditalala bua tshinyi? Londa ku nyima kuanyi. Mutentekedi wakamba ne, Messager wetu wakafika kudibo, kadi kena uhingana.

¹⁹Hashishe bakatuma muntu muibidi ha nyima ha kabalu; hakafikeye kudibo, wakamba ne, Mukelenge udi ukonka ne, Nulualua talalâ, anyi? Yehu wakamuebesha ne, Udi ukeba ditalala bua tshinyi? Londa ku nyima kuanyi.

²⁰Mutentekedi wakamba ne, Yeye wakafika kudibo, kadi kena uhingana; tshiendeshilu tshia dikalu tshidi tshifuanangana ne tshiendeshilu tshia Yehu, muana wa Nimishi, bualu bua yeye udi wendesha dikalu lukasa lukasa.

²¹Yolama wakamba ne, Balongolole dikalu. Bakalongolola dikalu diandi. Yolama, mukelenge wa Isalele, ne Ahazaya, mukelenge wa Yuda, bakaluhuka, muntu mu dikalu diandi muntu mu dikalu diandi, bua kusangakenabo ne Yehu. Bakamusangana mu budimi bua Nabota, Muena Yizelele.

²²Hakatangila Yolama Yehu, yeye wakamuebesha ne, Yehu, ulualua talalâ, anyi? Yeye wakamukudimuna ne, Tudi ne ditalala kudi kunyi hatshidi malu a masandi a mamu webe ne mbuku yandi bikumbane bia bungi?

²³Yolama wakamuela nyima, wakanyema, wakambila Ahazaya ne, Ahazaya, kusonguela kudiku!

²⁴Yehu wakanana buta buandi ne bukole buandi buonso, wakasa Yolama ha masangu a nyima, mukete wakasompoka ha dimuma diandi dia muoyo, yeye wakadishinda hanshi mu dikalu diandi.

²⁵Hashishe Yehu wakambila Bidikâ, kapitene kandi, ne, Umuamhule, umuele mu budimi bua Nabota, Muena Yizelele; uvuluke ne, Hatuakadi meme ne wewe tulonda Ahaba, tatu wandi, Yehowa wakanunemeshila bujitu ebu.

²⁶Yehowa wakamba ne, Bulelela, makelela nakatangila mashi a Nabota ne a bana bandi balume, nunku nenkusombuele mu muaba eu mene kabidi. Nunku umuambule, umuele mu muaba eu, bu mu dî dia Yehowa.

²⁷Hakatangila Ahazaya, mukelenge wa Yuda, bualu ebu, yeye wakanyema mu nshila wa ku nsubu wa mu budimi ebu. Yehu wakamulonda, wakamba ne, Mushihelai kabidi mu dikalu diandi. Bakamuasa mukete hakadiye ubanda mukuna wa Gû hehi ne Yibelama. Yeye wakanyema ku Megido, wakafuilaku.

²⁸Bantu bandi bakamuambula mu dikalu bua kuya ku Yelushalema, bakamujika mu lukita lua bankambua bandi mu musoko wa Davidi.

²⁹Mu tshidimu tshia dikumi ne tshimue tshia bukelenge bua Yolama, muana wa Ahaba, Ahazaya wakabanga kukokesha mu Yuda.

³⁰Hakafika Yehu ku Yizelele, Izebele wakunvua lumu elu; wakalaba mukubu ku mesu, wakasuika tshitambala ku mutu, wakatangila ha disoso dia nsubu.

³¹Hakabuela Yehu ku tshibi tshia musoko, yeye wakamuebesha ne, Wewe Zimeli, mushihi wa mukelenge webe, ulualua talalâ, anyi?

³²Yeye wakambula mpala wandi bua kutangila ha disoso, wakakonka ne, Udi ku luseke luanyi nganyi? Bantu batungula nansha babidi nansha basatu bakamutangila ha mbelu.

³³Yehu wakabambila ne, Numuele hanshi. Nunku hakamuela hanshi, ne mashi andi makuabo akamatshila ha lumbu ne ha tubalu; tuakamudiata muinshi mua bikono.

³⁴Wakabuela mu nsubu, wakadia, wakanua. Yeye wakamba ne, Batangile mukashi eu wakedibua mulau, bamujike bualu bua yeye wakadi muana wa mukelenge.

³⁵Bakaya bua kumujika. Kadi bakasangana anu kabalubalu ka mutu wandi ne makasa ne munda mua bianza.

³⁶Nunku bakahingana, bakamuambila. Yeye wakamba ne, Edi ndî dia Yehowa diakambeye kudi muntu wandi Eliya, Muena Tishebe, ne, Mbua neyidie Izebele mu muaba wa Yizelele;

³⁷ne mubidi wa Izebele newikale bu tunvi ha mutu ha buloba bua Yizelele nunku kabena mua kuamba ne, Eu udi Izebele kabidi.