Read tshiluba 1 Kulondolola 11 Bible Online

1 Kulondolola 11 - tshiluba bible

1 Kulondolola 11

¹Hashishe Bena Isalele bonso bakadisangisha kudi Davidi mu Hebelone bamba ne, Mona, tudi bu mifuba yebe ne misunyi yebe.

²Diambedi hakadi Shaula mukelenge mene, nguewe wakahatuka, wakahingana ne Bena Isalele; Yehowa, Nzambi webe, wakukuambila ne, Wewe newikale mulami wa bantu banyi Bena Isalele, ne wewe newikale mukelenge ku mutu kua bantu banyi Bena Isalele.

³Nunku bakulu bonso ba Bena Isalele bakatua kudi mukelenge mu Hebelone; Davidi wakahunga nʼabo tshihungidi mu Hebelone ku mpala kua Yehowa; bakela manyi ha mutu ha Davidi bua kuikaleye mukelenge ku mutu kua Bena Isalele, bu mu dî dia Yehowa diakambileye Samuele.

⁴Davidi ne Bena Isalele bonso Bakaya ku Yelushalema (udi Yebuse mene); Bena Yebuse, bena buloba bakadiku.

⁵Bena Yebuse bakambila Davidi ne, Wewe kuena ubuela kunoko. Kadi Davidi wakanyenga musoko wa Siona wakadi munyungulula ne ngumbu; eu udi musoko wa Davidi.

⁶Davidi wakamba ne. Wadianjila kushiha Bena Yebuse yeye neikale mukelenge ne kapitene. Yoaba, muana wa Seluya, wakadianjila kufikaku, wakayuishibua kapitene.

⁷Davidi wakashikama mu musoko eu wa lumbu, nunku bakabikila musoko eu ne, Musoko wa Davidi.

⁸Yeye wakasa musoko, wakanyunguluka tô ne ku Milo; ne Yoaba wakalongolola tshituha tshikuabo tshia musoko tshiakashala.

⁹Davidi wakadiundadiunda, wakalua muntu munene, bualu bua Yehowa wa misumba wakadi nʼandi.

¹⁰Aba mbantu banene bakadi ne Davidi, bakadi nʼandi ne bukole mu bukelenge buandi; bakadisangisha ne Bena Isalele bonso bua kubueshabo Davidi mu bukelenge, bu mu dî dia Yehowa diakambeye bua Bena Isalele.

¹¹Ebu mbungi bua bantu ba bukitu bakadi ne Davidi: Yashobeama, muana wa Muena Hakemoni, wakadi ha mutu ha bantu makumi asatu; yeye wakambula difuma diandi kudi bantu nkama isatu, wakabashiha diatshimue.

¹²Eleazâ, muana wa Dodo, Muena Ahoa, wakadi umue wa bena bukitu bandi basatu wakadi ku nyima kuandi.

¹³Yeye wakadi ne Davidi ku Pasa-damima kuakadisangisha Bena Peleshete bua kuluangana mu budimi bua orge; bantu bakanyema ku mpala kua Bena Peleshete.

¹⁴Bobo bakimana munkatshi mua budimi ebu, bakaluangana nʼabo, bakashiha Bena Peleshete; Yehowa wakabasungila ne luhandu lunene.

¹⁵Bantu basatu ba bantu aba banene makumi asatu bakaya kudi Davidi ku dibue dia mu lubuebue lua Adulama; bena nvita ba Bena Peleshete bakasa tshitudilu tshiabo mu tshibanda tshia Bena Lefa.

¹⁶Davidi wakadi mu musoko wakadi ne lumbu, ne bena nvita ba Bena Peleshete bakadi mu Beteleheme.

¹⁷Davidi wakamba ne, Nakadi kusua bua muntu ampe mai a kunua a mu dina dia mu Beteleheme didi hehi ne tshibuelelu tshia musoko.

¹⁸Bantu aba basatu bakahitshila munkatshi mua Bena Peleshete bakakoka mai a mu dina dia mu Beteleheme diakadi ha buihi ne tshibuelelu tshia musoko, bakatua nʼau kudi Davidi; kadi Davidi wakahidia kuanua, wakâhongolola kudi Yehowa,

¹⁹wakamba ne, Nzambi wanyi ampidishe bua meme tshienji nunku; nennue mashi a bantu aba bakuamba kufua bua bualu buanyi, anyi? Bualu bua bobo bakuamba kufila mioyo yabo hakuluabo nʼau. Nunku yeye wakahidia kuanua. Ebu bualu buakenza bantu aba banene basatu.

²⁰Abishai, muanʼabo ne Yoaba, wakadi ku mutu kua bantu basatu; yeye wakela difuma diandi kudi bantu nkama isatu, wakabashiha, wakadi ne dina dia butumbi munkatshi mua bantu aba basatu.

²¹Munkatshi mua bantu aba basatu yeye wakatamba babidi aba bakuabo bunene, bakamuvuisha kapitene kabo; kadi yeye kakalua munene bu bantu aba basatu bakadi ku mpala.

²²Benaya, muana wa Yehoyada, muana wa muena bukitu wa mu Kabesele, wakadi muenze malu manene, wakashiha bana babidi ba Aliele wa mu Moaba; yeye kabidi wakabuela mu lubuebue, wakashiha nyama wa ntambue hakadi neige hanshi ha buloba.

²³Wakashiha Muena Ejipitu, muntu munene wa nfiondo, bule buandi buakadi coudées[2] itanu; mu tshianza tshia Muena Ejipitu muakadi difuma bu mutshi udibo bakuma nʼau bilulu; yeye wakaya kudiye ne tshibonge mu tshianza tshiandi, wakahatula difuma mu tshianza tshia Muena Ejipitu, wakamushiha ne difuma diandi.

²⁴Au mmalu akenza Benaya, muana wa Yehoyada, wakadi ne dina dinene munkatshi mua bantu banene basatu;

²⁵yeye wakatamba bantu makumi asatu butumbi, kadi yeye kakalua munene bu bantu aba basatu bakadi ku mpala; Davidi wakamuteka ku mutu kua bena nvita bakadi ha buihi nʼandi.

²⁶Aba mbena bukitu ba munkatshi mua bena nvita: Asahele, muanʼabo ne Yoaba, Elehanana, muana wa Dodo wa mu Beteleheme,

²⁷Shamota, Muena Halola, Helese, Muena Pelona,

²⁸Ila, muana wa Ikishe, Muena Tekoa, Abiezê, Muena Anatota,

²⁹Sibekai, Muena Husha, Hai, Muena Ahoa,

³⁰Mahalai, Muena Netofa, Helede, muana wa Bâna, Muena Netofa,

³¹Itai, muana wa Libai wa mu Gibea, wa bana ba Benyamina, Benaya, Muena Pilatona,

³²Hulai, wa ku misulu ya Gâsha, Abiele, Muena Âba,

³³Azemaweta, Muena Bahaluma, Eliaba, Muena Shâlabona,

³⁴bana balume ba Hashema, Muena Gizona, Yonatana, muana wa Shage, Muena Halala,

³⁵Ahiama, muana wa Sakâ, Muena Halala, Elifala, muana wa Ula,

³⁶Hefê, Muena Mekelata, Ahiya, Muena Pelona,

³⁷Heselo, Muena Kâmele, Nâlai, muana wa Ezebai,

³⁸Yoele, muanʼabo ne Natana, Mibehâ, muana wa Hageli,

³⁹Seleke, Muena Amona, Nahalai, Muena Belota, muambudi wa ngabu wa Yoaba, muana wa Seluya,

⁴⁰Ila, Muena Yitela, Galeba, Muena Yitela,

⁴¹Uliya, Muena Hiti, Zabada, muana wa Ahalai,

⁴²Adina, muana wa Shiza, Muena Lubena, mukelenge wa mu Bena Lubena, ne bantu makumi asatu bakadi nʼandi,

⁴³Hanuna, muana wa Mâka, ne Yoshafata, Muena Mitena,

⁴⁴Uziya, Muena Ashetelata, Shama ne Yiyele, bana ba balume ba Hotama, Muena Aloê,

⁴⁵Yediele, muana wa Shimeli, ne Yoha muanʼabo, Muena Tiso,

⁴⁶Eliele, Muena Mahawa, ne Yelibai ne Yoshawia ne bana ba balume ba Elenâma, ne Yitema, Muena Moaba,

⁴⁷Eliele ne Obeda ne Yâsiele, Muena Mesobaya.