Read tshiluba 1 Kulondolola 13 Bible Online

1 Kulondolola 13 - tshiluba bible

1 Kulondolola 13

¹Davidi wakahunga dî ne tupitene tua bantu tshinunu ne tua bantu lukama ne muntu yonso wakadi ku mutu kua bantu bakuabo.

²Davidi wakambila Bena Isalele bonso ne, Binuelangana meji ne mbimpe, ne biasua Yehowa Nzambi wetu nunku, tubikile bana betu bonso badi bashala mu nseke yonso ya buloba bua Isalele ne bakuidi ne Bena Lewi badi mu misoko yabo ne ku mpenge ya misoko yabo, badisangishe kutudi;

³tuye bietu, tuangate mushete wa Nzambi wetu, tulue nʼau munkatshi muetu; bualu bua tuetu katuakûkeba mu matuku a Shaula.

⁴Bantu bonso bakamba ne, Netuenze nunku; bua bualu ebu buakadi buimpe ku mesu kuabo.

⁵Nunku Davidi wakabikila Bena Isalele bonso hamue ku Shihô, kasulu kakese ka ku luseke lua Ejipitu tô ne ku tshibuelelu tshia Hamata, bua kuangatabo mushete wa Nzambi ku Kîyata-yalima.

⁶Davidi ne Bena Isalele bakaya ku Bâla, udi Kîyata-yalima mene, ku luseke lua Yuda, bua kuangatabo mushete wa Nzambi, udi mushikame ku mutu kua bakeluba kudibo babikila Dina dia Yehowa.

⁷Bakateka mushete wa Nzambi ha dikalu dihia-dihia, bakafuma nʼau mu nsubu wa Abinadaba; Uza ne Ahio bakendesha dikalu.

⁸Davidi ne Bena Isalele bonso bakimba misambu ne bisanji ne nzenze ne nkumbi ne makasa ne mpungi ne bukole buabo buonso.

⁹Hakafikabo ku tshihehuidi tshia Kidona, Uza wakolola tshianza tshiandi bua kukuateye mushete; bualu bua ngombe yakadishinda hanshi.

¹⁰Tshiji tshia Yehowa tshiakatema kudiye, yeye wakamushiha bualu bua yeye wakolola tshianza tshiandi bua kulengeye mushete; yeye wakafuilaku ku mpala kua Yehowa.

¹¹Davidi wakafua tshiji bualu bua Yehowa wakenzela Uza nunku; yeye wakabikila muaba au ne, Pelese-uza tô ne ku dituku edi.

¹²Davidi wakatshina Nzambi dituku adi, wakamba ne, Nenye ne mushete wa Nzambi kuanyi bishi?

¹³Nunku Davidi kakaya ne mushete wa Nzambi ku musoko wa Davidi, kadi wakasesuka, wakaya nʼau ku nsubu wa Obeda-edome, Muena Giti.

¹⁴Mushete wakashala kudi ba mu nsubu wa Obeda-edome ngondo isatu; Yehowa wakavudishila ba mu nsubu wa Obeda-edome ne bintu biabo bionso disanka.