Read tshiluba 1 Kulondolola 16 Bible Online

1 Kulondolola 16 - tshiluba bible

1 Kulondolola 16

¹Bakalua ne mushete wa Nzambi, bakauteka munkatshi mua ntenta wakadi Davidi mûshimikile; bakafila milambu ya kuosha ne ya kutuisha nʼai ditalala ku mpala kua Nzambi.

²Hakashikisha Davidi kufila milambu ya kuosha ne ya kuvuisha nʼai ditalala, yeye wakavudishila bantu disanka mu dina dia Yehowa.

³Yeye wakaha muntu yonso wa mu Isalele ne balume ne bakashi mutanda wa bidia ne tshihesa tshia munyinyi ne tshisumbu tshia tumuma tûme.

⁴Yeye wakasungula Bena Lewi bakuabo bua kuenzelabo mudimu ku mpala kua mushete wa Yehowa, ne bua kutendekenabo ne bua kusakidilabo ne bua kutumbishabo Yehowa, Nzambi wa Isalele;

⁵Asafa wakadi ku mutu kuabo, ne ku nyima kuandi kuakadi Zekâya ne Yiele ne Shemilamota ne Yehiele ne Matitiya ne Eliaba ne Benaya ne Obeda-edome ne Yiele, bakadi ne nzenze ne bisanji; Asafa wakimba biamu bia kukumakasha bikole;

⁶Benaya ne Yahaziele bakuidi bakela mpungi misangu yonso ku mpala kua mushete wa tshihungidi tshia mei a Yehowa.

⁷Dituku adi Davidi wakadianjila kuela mukenji bua kusakidilabo Yehowa kudi Asafa ne bana babo ne musambu eu, ne,

⁸Nusakidile[4] bienu Yehowa, nubikile dina diandi, numanyishe bienzedi biandi munkatshi mua bukua bantu.

⁹Numuimbile misambu, numuimbile misambu ya kumutumbisha nʼai, nuyikilangane bua malu andi onso a kukema.

¹⁰Nutumbile mu dina diandi dia tshijila; mitshima ya badi bakeba Yehowa isanke.

¹¹Kebai bienu Yehowa ne bukole buandi, kebai mpala wandi matuku onso.

¹²Nuvuluke bienu bienzedi bia kukema biakuenzeye, malu andi a kukema, ne dilumbulula dia mukana muandi,

¹³nuenu tunkanunuma tua Isalele muntu wandi, nuenu bana ba Yakoba, bantu bakasunguleye.

¹⁴Yeye udi Yehowa Nzambi wetu; dilumbulula diandi diakenjibua mu buloba buonso.

¹⁵Udi uvuluka tshihungidi tshiandi kashidi, ndî mene diakajadikeye tô ne ku bikondo tshinunu,

¹⁶tshihungidi tshiakahungeye ne Abalahama, mmutshihu wandi wakaditshiheye kudi Isaka.

¹⁷Wakaujadika kudi Yakoba bu mukenji ne kudi Isalele bu tshihungidi tshia tshiendelele.

¹⁸Wakamba ne, Nenkuhe buloba bua Kanâna, bua kuikalabu tshituha tshia nuenu kuhiana.

¹⁹Hakadibo anu bantu banya-banya bua bungi buabo, e, hakadibo bantu banya-banya be, ne hakashikamabo mu buloba bu benyi;

²⁰hakendakanabo ku tshisamba ne ku tshisamba, ne ku bukelenge bumue tô ne kudi bantu bakuabo ba bende,

²¹kakitabusha bua muntu umue kubenzela bibi. E, wakabela bakelenge bualu buabo.

²²Wakamba ne, Kanulengi bantu banyi bedibue manyi ha mutu tshianga, kanuenzedi baprofete banyi bibi.

²³Nuimbile[5] Yehowa musambu, nuenu bonso ba ha buloba! Nuambile bantu lumu lua luhandu luandi ku dituku ku dituku.

²⁴Nuambile ba munkatshi mua bantu ba bende butumbi buandi, numanyishe ba munkatshi mua bantu bonso malu a kukema akenzeye!

²⁵Bualu bua Yehowa udi munene, budiye nʼabu mbua kutumbishibua bikole; budiye nʼabu mbua kunemeshibua ha mutu ha nzambi yonso ya hatuhu.

²⁶Bualu bua nzambi yonso ya bantu ba bende idi mpingu; kadi Yehowa wakafuka bia mu diulu.

²⁷Butumbi ne buneme bidi ku mpala kuandi; bukole ne disanka bidi mu tshitendelelu tshiandi.

²⁸Nuenu ba mu biota bia bantu, nuambike Yehowa malu andi, nuambike Yehowa butumbi ne bukole.

²⁹Nuambike Yehowa butumbi budi buakanangane ne dina diandi. Luai ne mulambu kudiye, luai ku mpala kuandi! Tendelelai Yehowa baluate bivualu bia tshijila.

³⁰Zakalai ku mpala kuandi, nuenu bonso ba ha buloba. E, buloba budi bujadikibue, kabuena mua kunyungishibua.

³¹Diulu dikale ne disanka, buloba busanke kabidi. Bambe munkatshi mua bisamba ne, Yehowa udi ukokesha!

³²Mai manene enze tshiona, ne bionso bidimu bibile; budimi bua mu mpata busanke, ne bionso bidimu bisanke kabidi!

³³Hashishe mitshi yonso ya muitu neyimbe misambu bua disanka ku mpala kua Yehowa, bualu bua yeye udi ulua kulumbuluisheye buloba.

³⁴Nusakidile[6] Yehowa, bualu bua yeye udi muimpe; bua luse luandi ludi lujalame tshiendelele!

³⁵Nuambe ne, Utusungile,[7] wewe Nzambi wa luhandu luetu, utûmushe munkatshi mua bisamba bia bende bua kutusangisha hamue, bua tuetu tusakidile dina diebe dia tshijila, ne bua tutumbile mu butumbi buebe.

³⁶Yehowa, Nzambi wa Isalele, avudishibue disanka, ku tshibangidilu tô ne kunshikidilu! Bantu bonso bakamba ne, Amen; bakatumbisha Yehowa.

³⁷Yeye wakashiya Asafa ne bana babo ku mpala kua mushete wa tshihungidi tshia mei a Yehowa, bua kuenzelabo mudimu ku mpala kua mushete bikondo bionso bu muakadi mudimu wa buatshia-buatshia,

³⁸ne Obeda-edome ne bana babo makumi asambombo ne muanda mukulu, ne Obeda-edome, muana wa Yedutuna, ne Hosa bua kuikalabo balami ba bibi.

³⁹Wakashiya Sadoka muakuidi ne bana babo bakuabo bakuidi ku mpala kua nsubu wa Yehowa ku mutu kua mukuna wa Gibeona,

⁴⁰bua kufilabo milambu ya kuosha ha tshioshelu ku dituku ku dituku dinda ne dilolo, bu muakafundabo mikenji ya Yehowa yakeleleye Bena Isalele.

⁴¹Hemana ne Yedutuna bakadi nʼabo ne bakuabo bakadi basungudibue bakadi ne mena abo mafunda bua kusakidilabo Yehowa bualu bua luse luandi ludi lujalame tshiendelele;

⁴²Hemana ne Yedutuna bakadi nʼabo ne mpungi ne biamu bia kukumakasha bua kulombolabo misambu ne bua kuimbabo nʼabi misambu ya Nzambi; bana balume ba Yedutuna bakadi ku bibi.

⁴³Bantu bonso bakamuangalaka muntu ne muntu ku nsubu wandi; Davidi wakahingana bua kuvudishileye ba mu nsubu wandi disanka.