Read tshiluba 1 Kulondolola 17 Bible Online

1 Kulondolola 17 - tshiluba bible

1 Kulondolola 17

¹Hakadi Davidi mushikame mu nsubu muandi, Davidi wakambila Natana, muprofete ne, Mona, meme ndi mushikame mu nsubu wa mitshi ya cèdre, kadi mushete wa tshihungidi tshia mei a Yehowa udi mushale mu ntenta.

²Natana wakambila Davidi ne, Wenze malu onso adi mu mutshima webe; bualu bua Nzambi udi nʼebe.

³Butuku abu mene dî dia Nzambi diakalua kudi Natana diamba ne,

⁴Ya, Wambile Davidi muntu wanyi ne, Yehowa udi Wamba ne, Wewe kuena ungibakile nsubu bua meme kushikamamu nansha;

⁵bualu bua meme tshiena muanji kushikama mu nsubu katshia nahatuka ne Bena Isalele tô ne ku dituku edi, kadi nakendakana ku ntenta ne ntenta ne ku tshisombelu ne tshisombelu.

⁶Mu miaba yonso inakendakana ne Bena Isalele bonso nakambila umue wa balumbuluishi bonso ba Bena Isalele unaka mbila bua kulameye bantu banyi ne, Wewe kuakungibakila nsubu wa cèdre bualu kai, anyi?

⁷Nunku newambile muntu wanyi Davidi ne, Yehowa wa mu diulu udi wamba ne, Nakakubikila mu mpangu ya mikoko hawakadi ulama mikoko, nakakuvuisha mukelenge ku mutu kua bantu banyi Bena Isalele;

⁸nakadi nʼebe kuonso kuwakaya, nakashiha bena lukuna bebe bonso ku mpala kuebe; nenkuvuishe dina dinene bu mena a badi ne butumbi hanshi ha buloba.

⁹Nensunguile bantu banyi Bena Isalele muaba, nembajadike bimpe, bua bobo bashikame mu muaba wabo, kabena bumushibue kabidi; bena tshimbambila kabena babahaula kabidi bu muakenzabo diambedi;

¹⁰bu munakenza ku dituku dinakela mukenji wanyi bua balumbuluishi bikale ku mutu kua bantu banyi Bena Isalele, ne nempite bantu bonso bakadi nʼebe lukuna bukole. Ndi nkuambila kabidi ne, Yehowa neakuibakile nsubu.

¹¹Hakumbana matuku ebe bua wewe kuya kudi bankambua bebe, nenjadike umue wa bana bebe balume badi bakulonda ku nyima; nenjadike bukelenge buandi.

¹²Yeye neangibakile nsubu, nenjadike nkuasa wandi wa bukelenge tshiendelele.

¹³Meme nengikale tatu wandi, yeye neikale muana wanyi; tshiena ngumusha luse luanyi lujalame kudiye bu munakalûmusha kudi wakadi ku mpala kuebe;

¹⁴luidi nemmujadike mu nsubu muanyi ne mu bukelenge buanyi tshiendelele; nkuasa wandi wa bukelenge neajadikibue tshiendelele.

¹⁵Nunku Natana wakambila Davidi mei â onso, wakamuawila tshikena kumona etshi tshionso.

¹⁶Hashishe mukelenge Davidi wakabuela mu nsubu, wakashikama ku mpala kua Yehowa, wakamba ne, Yehowa Nzambi, meme nganyi ne ba mu nsubu muanyi mbanganyi bua wewe wakulua nʼanyi tô ne ku dituku edi?

¹⁷Nzambi, bualu ebu buakadi bukese ku mpala kuebe; kadi wewe wakuamba bua nsubu wa mundi webe musangu mule, wewe wakuntumbisha bu muntu munene, wewe Yehowa Nzambi.

¹⁸Davidi udi mumanye mua kukuambila mei kai makuabo bua butumbi buwakuvuisha muntu webe? Bualu bua wewe udi mumanye muntu webe.

¹⁹Yehowa, bua muntu webe, ne bua malu adi mu mutshima webe, wewe wakuenza malu â onso manene bua kumumanyisha malu â onso.

²⁰Yehowa, kakuena mukuabo bu wewe, kakuena Nzambi mukuabo ku mpala kuebe, bu mudi malu onso atuakunvua ku matshu etu.

²¹Tshisamba kai tshikuabo tshia hanshi ha buloba tshidi bu bantu bebe Bena Isalele, tshiakaya Nzambi kudihikula bu bantu bandi mene, bua kubavuisha dina dinene ku malu manene ne a kukema hawakihata bisamba bikuabo ku mpala kua bantu bebe bawakahikula mu Ejipitu?

²²Bualu bua wewe wakasungula bantu bebe Bena Isalele bua kubavuisha bantu bebe tshiendelele; ne wewe, Yehowa, wakalua Nzambi wabo.

²³Yehowa, dî diwakamba bua mundi webe ne bua nsubu wandi, dijadikibue tshiendelele; wenze bu muwakuamba.

²⁴Dina diebe dijadikibue, ditumbishibue tshiendelele, ne, Yehowa wa misumba udi Nzambi wa Isalele, Nzambi mene kudi Bena Isalele; ne nsubu wa Davidi muntu webe udi mujadikibue ku mpala kuebe tshiendelele.

²⁵Bualu bua wewe, Nzambi wanyi, wakumanyisha muntu webe ne, Nenkuibakile nsubu; nunku muntu webe wakadi ne dianyisha bua kutendeleleye ku mpala kuebe.

²⁶Katataka, Yehowa, wewe udi Nzambi ne wakalaya muntu webe bualu ebu buimpe;

²⁷katataka uvudishile nsubu wa muntu webe disanka, bua kushaleye ku mpala kuebe tshiendelele; bualu bua tshiudi uvudishile disanka, Yehowa, netshikale ne disanka tshiendelele.