Read tshiluba 1 Kulondolola 22 Bible Online

1 Kulondolola 22 - tshiluba bible

1 Kulondolola 22

¹Hashishe Davidi wakamba ne, Eu udi nsubu wa Yehowa Nzambi, etshi ntshioshelu tshia Bena Isalele.

²Davidi wakela mukenji wandi bua kusangishabo bantu bakadi bashikama mu buloba bua Isalele diambedi; wakasungula bahandi ba mabue bua kusongabo mabue a kuibaka nʼau ntempelo wa Nzambi.

³Davidi wakalongolola biamu bifike bia bungi bua kufulabo nʼabi misamadi ya kuenzabo nʼai bibi ne mabaya makuabo; wakasangisha biamu bia mitaku biakadibo kabayi bamanye mua kubala bujitu buabi;

⁴ne mitshi ya cèdre yakadi bungi buakadibo kabayi bamanye; bualu bua Bena Sidona ne Bena Tulo bakalua kudi Davidi ne mitshi ya cèdre ya bungi.

⁵Davidi wakamba ne, Muanʼanyi Solomo utshidi nsongalume udi mutekete, ne nsubu utudi tuibakila Yehowa udi ne bua kuikala muakane ne wa butumbi ku nseke yonso ya buloba; nunku meme nembange kusangisha bintu. Nunku Davidi wakasangisha bintu bia bungi diambedi yeye kayi muanze kufua.

⁶Hashishe yeye wakabikila Solomo muanʼandi, wakamuelela mukenji bua kuibakileye Yehowa, Nzambi wa Isalele, nsubu.

⁷Davidi wakambila Solomo muanʼandi ne. Bualu buakadi mu mutshima wanyi bua kuibaka nsubu mu dina dia Yehowa Nzambi wanyi.

⁸Kadi dî dia Yehowa diakalua kundi ne, Wewe wakamatshisha mashi a bungi hanshi, wakaluangana nvita ya bungi; wewe kuena ungibakila nsubu bua meme kutekamu dina dianyi nansha, bualu bua wewe wakamatshisha mashi a bungi hanshi ha buloba ku mesu kuanyi.

⁹Kadi mona, wewe neulele muana wa balume, neikale muena ditalala; nemmuhe ditalala kudi bena lukuna bonso badi bamunyunguluke; bualu bua dina diandi nedikale Solomo; nenvuishe ditalala ne dikisha mu buloba bua Isalele mu matuku andi.

¹⁰Yeye neibakile dina dianyi nsubu; yeye neikale muanʼanyi, meme nengikale tatu wandi; nenjadike nkuasa wa bukelenge buandi mu Isalele tshiendelele.

¹¹Katataka, muanʼanyi, Yehowa ikale nʼebe; wikale ne diakalengele, wibakile Yehowa, Nzambi webe, nsubu bu muakuambeye bualu buebe.

¹²Kadi Yehowa akuhe lungenyi ne meji a kujingulula nʼau malu, akuteke ku mutu kua Bena Isalele; bua wewe kutumikila mikenji ya Yehowa, Nzambi webe.

¹³Hashishe wewe newikale ne diakalengele biwadimuka bua kutumikila mikenji ne mei biakambila Yehowa Mose bua Bena Isalele; wikale ne dikima ne mutshima mukole; kutshinyi, kukuatshiki buowa.

¹⁴Mona, mu kuhuekela kuanyi nakamana kulongoluela nsubu wa Yehowa binunu lukama lua ntalanta[11] ya or ne binunu tshinunu bia ntalanta ya argent ne biamu bia mitaku ne biamu bifike bidibo kabayi bamanye mua kubala, bualu bua bidi bia bungi; nakalongolola mabaya ne mabue kabidi; wewe udi mumanye mua kusangishila bintu ha mutu habi.

¹⁵Bualu bukuabo kabidi, bena mudimu ba bungi badi nʼebe, bahandi ba mabue ne ba mabaya ne bantu bonso badi ne meji a kuenza midimu yonso,

¹⁶ya or ne ya argent ne ya tshiamu tshia mitaku ne ya tshiamu tshifike, bidi kabiyi mua kubadibua. Juka, ubange mudimu eu; Yehowa ikale nʼebe.

¹⁷Davidi wakelela baminyampala bonso ba mu Isalele mukenji bua kukuatshishabo Solomo muanʼandi, wamba ne,

¹⁸Yehowa Nzambi wenu kena nʼenu, anyi? Yeye kakanuha ditalala mu nseke yonso, anyi? Bualu bua yeye wakafila bena buloba ebu mu bianza bienu; bena buloba bakateketa ku mpala kua Yehowa ne ku mpala kua bantu bandi.

¹⁹Nunku nutokeshe mitshima yenu ne mioyo yenu bua kukeba Yehowa, Nzambi wenu; jukai, nuashile Yehowa Nzambi muaba wandi wa tshijila, bua nuenu nulue ne mushete wa tshihungidi tshia mei a Yehowa ne bintu bia tshijila bia Nzambi mu nsubu unudi mubaka mu dina dia Yehowa.