Read tshiluba 1 Kulondolola 23 Bible Online

1 Kulondolola 23 - tshiluba bible

1 Kulondolola 23

¹Davidi wakadi muntu mununu wa matuku a bungi; yeye wakahingisha Solomo muanʼandi mu bukelenge ku mutu kua Bena Isalele.

²Yeye wakasangisha baminyampala bonso mu Isalele ne bakuidi ne Bena Lewi.

³Bakabala Bena Lewi babange kudi bakamana kukumbana bidimu makumi asatu tô ne ku mutu; bungi buabo bakabalabo muntu ne muntu buakadi binunu makumi asatu ne muanda mukulu.

⁴Bakasungula binunu makumi abidi ne binai bua kuikalabo tuhita tua bena mudimu ba mu nsubu wa Yehowa; bantu binunu bisambombo biabo bakadi balami ne balumbuluishi;

⁵bantu binunu binai bakadi balami ba ku bibi; bantu binunu binai bakatumbisha Yehowa ne bintu biakenza Davidi bia kumutumbisha nʼabi.

⁶Davidi wakabatahulula mu milongo bu muakadi bana balume ba Lewi: Gêshona ne Kohata ne Melali.

⁷Ba Bena Gêshona: Ladana ne Shimei.

⁸Bana balume ba Ladana: Yehiele wakadi kahita, ne Zetama ne Yoele, basatu.

⁹Bana balume ba Shimei: Shelomota ne Haziele ne Halana, basatu. Aba bakadi ku mutu kua nsubu ya batatu ba Ladana.

¹⁰Bana balume ba Shimei: Yahata ne Zina ne Yeusha ne Belia. Aba banai bakadi bana balume ba Shimei.

¹¹Yahata wakadi kahita, Ziza muibidi; kadi Yeusha ne Belia kabakadi ne bana balume ba bungi; nunku bobo bakadi babadibue mu nsubu umue wa batatu babo.

¹²Bana balume ba Kohata: Amalama, Yisehâ, Hebelone, Uziele, banai.

¹³Bana balume ba Amalama: Alona ne Mose; Alona wakadi mujidibue bua yeye ajidile bintu bia tshijila, yeye ne bana bandi balume tshiendelele, bua kuoshelabo Yehowa musenga wa manananshi, ne bua kumukuatshilabo mudimu ne bua kuvudishilabo bantu disanka mu dina diandi tshiendelele.

¹⁴Kadi bualu bua Mose, muntu wa Nzambi, bana bandi bakadi babadibue munkatshi mua tshisamba tshia Lewi.

¹⁵Bana balume ba Mose: Gêshoma ne Eliezê.

¹⁶Bana balume ba Gêshoma: Shebuele kahita.

¹⁷Bana balume ba Eliezê bakadi Lehabeya kahita; Eliezê kakadi ne bana bakuabo nansha; kadi bana ba Lehabeya bakadi ba bungi.

¹⁸Bana ba Yisehâ: Shelomita kahita.

¹⁹Bana ba Hebelone: Yeliya kahita, Amalia muibidi ne Yahaziele muisatu ne Yakemama muinai.

²⁰Bana balume ba Uziele: Mika kahita ne Yishiya muibidi.

²¹Bana ba Melali: Mali ne Mushi. Bana ba Mali: Eleazâ ne Kishi.

²²Eleazâ wakafua kayi ne bana balume; wakadi anu ne bana bakashi; ne bana babo balume, bana ba Kishi, bakababaka bu bakashi babo.

²³Bana ba Mushi: Mali ne Edê ne Yelemota, basatu.

²⁴Aba bakadi bana balume ba Lewi ku nsubu ya batatuʼabo, bakadi ku mutu kua nsubu ya batatuʼabo bu bantu bakabalabo ku mena abo ku muntu ne muntu, bakadi benza mudimu wa mu nsubu wa Yehowa, bakadi ne bidimu bikumbane makumi abidi tô ne ku mutu.

²⁵Bualu bua Davidi wakamba ne, Yehowa, Nzambi wa Isalele, wakaha bantu bandi ditalala; yeye udi mushikame mu Yelushalema tshiendelele;

²⁶ne Bena Lewi kabena ne bualu bua kutuala kabidi nsubu wa tshitendelelu ne bintu biakadimu bia kuenza nʼabi mudimu.

²⁷Bualu bua bakabala bana balume ba Lewi bakadi bakumbana bidimu makumi abidi tô ne ku mutu, bu muakadi mei a kunshikidilu a Davidi.

²⁸Mudimu wabo wakadi wa kukuatshisha bana ba Alona mu midimu yabo ya mu nsubu wa Yehowa ne mu biendedi ne mu nsubu mikese ne mu kujidila kua bintu bionso ne mu midimu yonso yakenzabo mu nsubu wa Nzambi;

²⁹ne bua kulongololabo bidia bioshibue ne bukula bua milambu ya bukula bubotesha, nansha bua mikata idi kayiyi ne luevene, nansha bua bidia biakalambabo mu malonga, nansha bua bidia biakinabo mu mai ne bua bihikidi bia mishindu yonso;

³⁰ne bua kuimanabo lunkelu ku difuku ku dituku bua kusakidilabo Yehowa ne bua kumutumbishabo, ne dilolo kabidi;

³¹ne bua kufilabo milambu ya kuosha kudi Yehowa ku matuku a lumingu ne bakabala ngondo ne ku matuku akatuabo bidia bia disanka ku tshikondo tshiau misangu yonso ku mpala kua Yehowa;

³²ne bua bobo balame nsubu wa kusambakena ne muaba wa tshijila, ne bana balume ba Alona, bana babo, mu mudimu wa mu nsubu wa Yehowa.