Read tshiluba 1 Kulondolola 27 Bible Online

1 Kulondolola 27 - tshiluba bible

1 Kulondolola 27

¹Bena Isalele mu bungi buabo, bakadi ku mutu kua nsubu ya batatuʼabo, ne tupitene tua bantu tshinunu ne tua bantu lukama, ne bakokeshi bakadi bakuatshila mukelenge wabo mudimu mu milongo yonso ya mu ngondo ne ngondo ya mu ngondo yonso ya mu tshidimu, mu tshisumbu ne tshisumbu muakadi bantu binunu makumi abidi ne binai.

²Yashobama, muana wa Zabediele, wakadi ku mutu kua tshisumbu tshia ngondo wa kumudilu; mu tshisumbu tshiandi muakadi bantu binunu makumi abidi ne binai.

³Yeye wakadi umue wa bana ba Pelese, wakadi ku mutu kua tupitene tuonso tua mu ngondo wa kumudilu.

⁴Dodai, Muena Ahoa, wakadi ku mutu kua tshisumbu tshia mu ngondo muibidi; Mikelota wakadi ku mutu kuabo; mu tshisumbu tshiandi muakadi bantu binunu makumi abidi ne binai.

⁵Benaya, muana wa Yehoyada muakuidi, wakadi ku mutu kua tshisumbu tshia mu ngondo muisatu; mu tshisumbu tshiandi muakadi bantu binunu makumi abidi ne binai.

⁶Benaya eu wakadi umue wa bantu aba bakole makumi asatu, wakadi ku mutu kuabo mene; mu tshisumbu tshiandi muakadi muanʼandi Amizabada.

⁷Asahele, muanʼabo ne Yoaba, wakadi kapitene ka mu ngondo muinai; Zebadaya muanʼandi wakamulonda ku nyima; mu tshisumbu tshiandi muakadi bantu binunu makumi abidi ne binai.

⁸Shamehuta, Muena Yisela, wakadi kapitene ka tshisumbu tshia mu ngondo muitanu; mu tshisumbu tshiandi muakadi bantu binunu makumi abidi ne binai.

⁹Ila, muana wa Ikeshe, Muena Tekoa, wakadi kapitene ka tshisumbu tshia mu ngondo muisambombo; mu tshisumbu tshiandi muakadi bantu binunu makumi abidi ne binai.

¹⁰Helese, Muena Pelona wa bana ba Efelayima, wakadi kapitene ka tshisumbu tshia mu ngondo wa muanda mutekete; mu tshisumbu tshiandi muakadi bantu binunu makumi abidi ne binai.

¹¹Sibekai, Muena Husha wa Bena Zela, wakadi kapitene ka tshisumbu tshia mu ngondo wa muanda mukulu; mu tshisumbu tshiandi muakadi bantu binunu makumi abidi ne binai.

¹²Abiezê, Muena Anatota wa Bena Benyamina, wakadi kapitene ka tshisumbu tshia mu ngondo wa tshitema; mu tshisumbu tshiandi muakadi bantu binunu makumi abidi ne binai.

¹³Mehalai, Muena Netofa wa Bena Zela, wakadi kapitene ka tshisumbu tshia mu ngondo wa dikumi; mu tshisumbu tshiandi muakadi bantu binunu makumi abidi ne binai.

¹⁴Benaya, Muena Pilatona wa Bena Efelayima, wakadi kapitene ka mu tshisumbu tshia mu ngondo wa dikumi ne umue; mu tshisumbu tshiandi muakadi bantu binunu makumi abidi ne binai.

¹⁵Heledai, Muena Netofa wa Oteniele, wakadi kapitene ka tshisumbu tshia mu ngondo wa dikumi ne muibidi; mu tshisumbu tshiandi muakadi bantu binunu makumi abidi ne binai.

¹⁶Tupitene tua bisamba bia Bena Isalele: Eliezê, muana wa Zikeli, wakadi ku mutu kua Bena Lubena; Shefataya, muana wa Mâka, wakadi ku mutu kua Bena Shimeona;

¹⁷Hashabeya, muana wa Kemuele, wakadi ku mutu kua Bena Lewi; Sadoka wakadi ku mutu kua bana ba Alona;

¹⁸Elihu, muanʼabo ne Davidi, wakadi ku mutu kua Bena Yuda; Omeli, muana wa Mikaele, wakadi ku mutu kua Bena Yisakâ;

¹⁹Yishemaya, muana wa Obadaya, wakadi ku mutu kua Bena Zebuluna; Yelemota, muana wa Azazele, wakadi ku mutu kua Bena Nafatale;

²⁰Hoshea, muana wa Azazaya, wakadi ku mutu kua Bena Efelayima; Yoele, muana wa Pedaya, wakadi ku mutu kua tshituha tshia Bena Manashe;

²¹Ido, muana wa Zekâya, wakadi ku mutu kua tshituha tshia Bena Manashe ba mu Gilada; Yâsiele, muana wa Abinê, wakadi ku mutu kua Bena Benyamina;

²²Azalele, muana wa Yelohama, wakadi ku mutu kua Bena Dana. Etu ntupitene tua bisamba bia Bena Isalele.

²³Kadi Davidi kakabala bantu bakadi kabayi bakumbane bidimu makumi abidi; bualu bua Yehowa wakabalaya ne, Nenkumbashe Bena Isalele bu mitoto ya mu diulu.

²⁴Yoaba, muana wa Seluya, wakabanga kutubala, kadi yeye kakashikisha mudimu eu; tshiji tshia Yehowa tshiakahatukila Bena Isalele bua bualu ebu; kabakafunda bungi buabo mu mukanda wa kulondolola kua malu a mukelenge Davidi.

²⁵Azemaweta, muana wa Adiele, wakadi ku mutu kua bibutshilu bia mukelenge; Yonatana, muana wa Uziya, wakadi ku mutu kua bibutshilu bia mu madimi ne bia mu bimenga ne bia mu misoko mikese ne bia mu nsubu ya mukelenge;

²⁶Ezeli, muana wa Keluba, wakadi ku mutu kua mudimu wonso wa madimi;

²⁷Shimei, Muena Lamata, wakadi ku mutu kua madimi a tumuma tukese; Zabedi, Muena Shefemi, wakadi ku mutu kua bintu biakakumbana mu madimi a tumuma tukese biakatekabo mu bitekelu bia nvinyo;

²⁸Bâla-hanana, Muena Gedê, wakadi ku mutu kua mitshi ya diye ne ya sycomore ya mu bibanda; Yoasha wakadi ku mutu kua bitekelu bia manyi;

²⁹Shitelai, Muena Shalona, wakadi ku mutu kua bimuna biakadishabo mu Sifiona; Shafata, muana wa Adelai, wakadi ku mutu kua bimuna bia mu bibanda;

³⁰Obila, Muena Yishemaele, wakadi ku mutu kua tumelo; Yedeya, Muena Melonita, wakadi ku mutu kua nyama ya mpunda; Yaziza, Muena Hageli, wakadi ku mutu kua mikoko.

³¹Aba bonso bakadi ku mutu kua bintu bia Davidi.

³²Yonatana, manseba wa Davidi, muntu wa lungenyi lule ne mufundi kabidi, wakadi mufidi wandi wa meji; Yehiele, muana wa Hakemoni, wakadi mukuatshishi wa bana ba mukelenge;

³³Ahitofele wakadi mufidi wa meji wa mukelenge; Hushai, Muena Eleke, wakadi mulunda wa mukelenge;

³⁴ku nyima kua Ahitofele kuakadi Yehoyada, muana wa Benaya, ne Ebeyatâ; Yoaba wakadi kapitene ka masalayi a mukelenge.