Read tshiluba 1 Kulondolola 28 Bible Online

1 Kulondolola 28 - tshiluba bible

1 Kulondolola 28

¹Davidi wakabikila bantu banene bonso ba mu Isalele, bakadi ku mutu kua bisamba, ne tupitene tua bisumbu bia bantu tuakakuatshila mukelenge mudimu mu milongo yatu, ne tupitene tua bantu tshinunu ne tua bantu lukama, ne bakadi ku mutu kua bintu bionso bia mukelenge ne bimuna biandi ne bia bana bandi ne tuhita ne bena bukitu mu Yelushalema.

²Hashishe mukelenge Davidi wakajuka hanshi, wakimana ku makasa andi, wakamba ne, Unvuai, bana betu ne bantu banyi; meme nakadi ne bualu mu mutshima wanyi bua kuibakila mushete wa tshihungidi tshia mei a Yehowa nsubu wa kuikisha ne tshitekelu tshia muinshi mua makasa a Nzambi wetu; nakabanga kulongolola bintu bia kuasa nʼabi nsubu.

³Kadi Nzambi wakangambila ne, Wewe kuena wibakila dina dianyi nsubu nansha, bualu bua wewe udi muena nvita, wakamatshisha mashi hanshi.

⁴Kadi Yehowa, Nzambi wa Isalele, wakansungula munkatshi mua bonso ba mu nsubu wa tatu wanyi, wakampingisha mu bukelenge bua Isalele tshiendelele; bualu bua yeye wakasungula Yuda bua kuikaleye ku mutu; wakasungula tshiota tshia tatu wanyi mu tshisamba tshia Yuda; munkatshi mua bana ba tatu wanyi yeye wakalesha diakalengele kundi bua kumpingisha mu bukelenge bua Isalele;

⁵ne munkatshi mua bana banyi balume (Nzambi wakumpa bana ba bungi) yeye wakasungula Solomo muanʼanyi bua kushikameye mu nkuasa wa bukelenge bua Yehowa ku mutu kua Bena Isalele.

⁶Yeye wakangambila ne, Solomo muanʼebe neibake nsubu wanyi ne biendedi bianyi; bualu bua meme nakamusungula bua kuikaleye muanʼanyi, ne meme nengikale tatu wandi.

⁷Nenjadike bukelenge buandi tshiendelele, biananukileye kutumikila mikenji yanyi ne mei anyi bu mudibi lelu.

⁸Nunku ku mesu kua Bena Isalele bonso ba mu tshisumbu tshia Yehowa, ne mu matshu a Nzambi wetu, nuenze, nukebe mikenji yonso ya Yehowa Nzambi wetu; bua nuenu nuhiane buloba ebu buimpe, bua nuenu nubushile bana benu bu buhianyi buabo tshiendelele.

⁹Wewe, muanʼanyi Solomo, Umanye Nzambi wa tatuʼebe, umukuatshile mudimu ne mutshima mutoke ne didikokela kudiye; bualu bua Yehowa udi ukebakeba mitshima ya bantu bonso; udi ujingulula meji onso adibo bela munda muabo; biwamukeba, neumuhete; kadi biwamulekela, yeye neakuhidie tshiendelele.

¹⁰Udimuke biebe, bualu bua Yehowa wakukusungula bua wewe kuibaka nsubu udi mua kuikala muaba wandi wa tshijila; wikale ne bukole, wenze nsubu eu.

¹¹Hashishe Davidi wakaha Solomo muanʼandi luidi lua mbalanda wa ntempelo, ne lua nsubu wandi, ne lua bibutshilu biandi, ne lua nsubu ya ku mutu, ne lua nsubu ya munda muandi, ne lua muaba wa tshibuikilu tshia or;

¹²ne luidi lua ngenyi yandi yonso ya biendedi bia mu nsubu wa Yehowa, ne ya nsubu yandi yonso, ne ya bibutshilu bia mu nsubu wa Yehowa, ne ya bitekelu bia bintu bia tshijila;

¹³ne ya milongo ya bakuidi ne Bena Lewi, ne ya midimu yonso ya mu nsubu wa Yehowa, ne ya mpanza yonso ya mu nsubu ya Yehowa.

¹⁴Wakidikisha bujitu bua mpanza ya or, ne bua mpanza ya mishindu yonso; ne bua mpanza ya argent, ne bua mpanza ya mishindu yonso.

¹⁵Wakidikisha bujitu bua bitekelu bia minda bia or ne minda yabi kabidi, ne bua bitekelu bia minda bia argent wakidikisha bujitu bua tshitekelu ne tshitekelu ne bua muinda ne muinda.

¹⁶Wakidikisha bujitu bua mesa a bidia bilesha, ku mesa ne mesa; ne bua argent ya mesa ne mesa;

¹⁷ne bua or ya bitubuidi bia munyinyi ne malonga ne makoho, ne bujitu bua or ya bihanza bionso, ne bua bihanza bia argent kabidi.

¹⁸Wakidikisha bujitu bua or ya tshioshelu tshia musenga wa manananshi ne or ya kuenza nʼai luidi lua dikalu dia bakeluba bakadi bolola mahuahua abo, bakabuikila mushete wa tshihungidi tshia mei a Yehowa.

¹⁹Davidi wakamba ne, Nakamanya malu au onso ku tshifundidi tshia tshianza tshia Yehowa tô ne ku bintu bionso bia mu luidi elu.

²⁰Davidi wakambila Solomo muanʼandi ne, Wikale ne bukole ne mutshima wa dikima, wenze bualu ebu; kutshinyi, kuhangi bualu ebu; bualu bua Yehowa Nzambi, Nzambi wanyi mene, udi nʼebe; yeye kena ukuhanga, kena ukulekela tô ne hawashikisha mudimu eu wonso wa mu nsubu wa Yehowa.

²¹Tangila milongo ya bakuidi ne ya Bena Lewi ya mu midimu yonso ya mu nsubu wa Nzambi; muntu yonso udi ne mutshima wa kuenza ne lungenyi lua kuenza midimu yonso neikale nʼebe; tupitene ne bantu bonso nebatumikile mikenji yebe yonso kabidi.