Read tshiluba 2 Kulondolola 21 Bible Online

2 Kulondolola 21 - tshiluba bible

2 Kulondolola 21

¹Yehoshafata wakalala tulu ne bankambua bandi, bakamujika diatshimue ne bankambua bandi mu musoko wa Davidi; Yeholama muanʼandi wakakokesha mu muaba wandi.

²Yeye wakadi ne bana babo, bana halume ba Yehoshafata: Azaya ne Yehiele ne Zekâya ne Azaya ne Mikaele ne Shefataya; aba bonso bakadi bana ba Yehoshafata, mukelenge wa Yuda.

³Tatu wabo wakabaha maha manene a argent ne or a bungi ne bintu bia mushinga mukole ne misoko ya ngumbu mu buloba bua Yuda; kadi wakahingisha bukelenge kudi Yeholama, bualu bua yeye wakadi muanʼa bute.

⁴Hakadia Yeholama bukelenge bua tatuʼandi ne hakadikolesheye, yeye wakashiha bana babo bonso ne muele wa nvita ne bantu banene bakuabo kabidi hakadi mu Isalele.

⁵Yeholama wakadi ne bidimu makumi asatu ne bibidi hakabangeye kukokesha; wakakokesha mu Yelushalema bidimu muanda mukulu.

⁶Yeye wakenda mu nshila ya bakelenge ba Isalele, bu muakenza ba mu nsubu wa Ahaba; bualu bua yeye wakabaka muana mukashi wa Ahaba; wakenza malu mabi ku mesu kua Yehowa.

⁷Kadi Yehowa kakabutula tshiota tshia Davidi, bualu bua tshihungidi tshiakahungeye ne Davidi, bua yeye wakamulaya muinda ne bana bandi tshiendelele.

⁸Mu matuku andi Bena Edome bakatombokela Bena Yuda, bakadisunguila mukelenge.

⁹Hashishe Yeholama wakasabuka ne tupitene tuandi ne makalu onso akadiye nʼau; bakajuka butuku, bakashiha Bena Edome bakadi babanyunguluka ne tupitene tua makalu.

¹⁰Nunku Bena Edome badi batombokela Bena Yuda tô ne ku dituku edi; hashishe Bena Libina bakamutombokela kabidi, bualu bua yeye wakahidia Yehowa, Nzambi wa batatuʼandi.

¹¹Bualu bukuabo kabidi, yeye Wakenza bitendelelu ku mutu kua mikuna ya Yuda, wakenzesha Bena Yelushalema malu a masandi, wakahambuisha Bena Yuda.

¹²Mukanda wakafika kudiye mutume kudi muprofete Eliya ne, Yehowa, Nzambi wa Davidi tatuʼebe, udi wamba ne, Bualu bua wewe kuena wenda mu nshila ya Yehoshafata tatuʼebe, ne ya Asa mukelenge wa Yuda,

¹³kadi udi wenda mu nshila ya bakelenge ba Isalele, wakenzesha Bena Yuda ne ba mu Yelushalema malu a masandi bu muakenza ba mu nsubu wa Ahaba, ne bualu bua wewe wakashiha bana benu ba mu nsubu wa tatuʼebe bakadi bakuhita buakane;

¹⁴mona, Yehowa neatume tshihuhu tshikole kudi bantu bebe ne kudi bana bebe ne kudi bakashi bebe ne kudi bintu bionso biudi nʼabi;

¹⁵disama dikole nedikukuate munda muebe, tô ne hahatuka maja ebe onso bualu bua disama edi ku dituku ku dituku.

¹⁶Yehowa wakasonsola mitshima ya Bena Peleshete ne ya Bena Alabâ badi ha buihi ne Bena Atiopa bua kuluanganabo ne Yeholama;

¹⁷bakalua kudi Bena Yuda, bakahaula buloba, bakaya ne bintu bionso biakadi mu nsubu wa mukelenge ne bana bandi balume ne bakashi bandi; bakamushila anu muana umue, Yehoaza, muanʼandi wa mukala.

¹⁸Ku nyima kua bualu ebu Yehowa wakamutumina disama dia mu mala andi diakadibo kabayi bamanye mua kuondaha.

¹⁹Hakahita bidimu bibidi, mala andi akahatuka bualu bua disama diandi; yeye wakafua bua masama makole. Bantu kabakamuoshela bintu mu madilu andi bu muakenzelabo batatu bandi.

²⁰Yeye wakadi ne bidimu makumi asatu ne bibidi hakabangeye kukokesha; wakakokesha mu Yelushalema bidimu muanda mukulu; yeye wakumuka, bantu kabayi bamunange; bakamujika mu musoko wa Davidi, kadi kabakamujika mu nkita ya bakelenge.