Read tshiluba 2 Kulondolola 29 Bible Online

2 Kulondolola 29 - tshiluba bible

2 Kulondolola 29

¹Hezikiya wakadi ne bidimu makumi abidi ne bitanu hakabangeye kukokesha; wakakokesha mu Yelushalema bidimu makumi abidi ne tshitema; dina dia mamu wandi diakadi Abiya, muana mukashi wa Zekâya.

²Yeye wakenza malu mimpe ku mesu kua Yehowa bu muakenza nkambua wandi Davidi mu malu onso.

³Mu tshidimu tshia kumudilu tshia bukelenge buandi, mu ngondo wa kumudilu, yeye wakunzulula bibi bia nsubu wa Yehowa, wakabilongolola.

⁴Yeye wakabuelamu ne bakuidi ne Bena Lewi, wakabasangisha mu muaba munene wa ku esete,

⁵wakabambila ne, Unvuai dî dianyi, nuenu Bena Lewi; nudijidile, nujidile nsubu wa Yehowa, Nzambi wa bankambua benu, umushai bukoya buonso budi mu nsubu wa tshijila.

⁶Bualu bua batatuʼetu bakenza malu mabi ku mesu kua Yehowa Nzambi wetu, bakamuhidia, bakakema nsubu wa Yehowa nyima, bakatangisha mpala yabo kukuabo.

⁷Bobo kabidi bakinshila bibi bia ku mbalanda, bakajima minda; kabakosha musenga ya manananshi, kabakafila milambu ya kuosha kudi Nzambi wa Isalele mu muaba wa tshijila.

⁸Nunku tshiji tshia Yehowa tshiakadi kudi Bena Yuda ne Yelushalema, ne yeye wakabafila bua bobo batatshishibue ne bua bobo bikale bu tshintu tshidi tshituisha bantu mikemu ne tshihendu, bu mutudi tumona ne mesu etu.

⁹Tangilai, batatu hetu bakashihibua ku miele ya nvita, ne bana betu balume ne bana betu bakashi ne bakashi betu hadi mu buhika bua bualu ebu.

¹⁰Katataka bualu budi mu mutshima wanyi bua kuhunga tshihungidi ne Yehowa, Nzambi wa Isalele, bua tshiji tshiandi tshikole tshiumuke kutudi.

¹¹Bana banyi balume, kanujangaluki; bualu bua Yehowa wakanusungula bua nuenu nuimane ku mpala kuandi bua kumukuatshila mudimu, ne bua nuenu nuikale bena mudimu bandi ne bua kumuoshela musenga wa manananshi.

¹²Hashishe Bena Lewi bakajuka, Mahata, muana wa Amasai, ne Yoele, muana wa Azaya wa bana ba Kohata; ne ba bana ba Melali, Kishi, muana wa Abedi, ne Azaya, muana wa Yehalelele; ne ba bana ba Gêshona, Yoa, muana wa Zima, ne Edene, muana wa Yoa;

¹³ne ba bana ba Elisafana, Shimeli ne Yeule; ne ba bana ba Asafa, Zekâya ne Mataniya;

¹⁴ne ba bana ba Hemana, Yehuele ne Shimei; ne ba bana ba Yedutuna, Shemaya ne Uziele.

¹⁵Bobo bakasangisha bana babo, bakadijidila, bakabuela bua kulengesha nsubu wa Yehowa bu muakadi mukenji wa mukelenge ku mei a Yehowa.

¹⁶Bakuidi bakabuela munda mua nsubu wa Yehowa bua kumulengesha, bakalua ne bukoya buonso buakamonabo mu ntempelo wa Yehowa ku tshiendedi tshia mu nsubu wa Yehowa. Bena Lewi bakabuambula, bakabutuala ku musulu wa Kidilona.

¹⁷Bakabanga ku dituku dia kumudilu dia ngondo wa kumudilu kumulengesha, ne ku dituku dia muanda mukulu bakafika ku mbalanda wa nsubu wa Yehowa; bakalengesha nsubu wa Yehowa matuku muanda mukulu; bakamana mudimu eu ku dituku dia dikumi ne disambombo dia ngondo wa kumudilu.

¹⁸Hashishe bakaya kudi mukelenge Hezikiya ku nsubu wandi, bakamuambila ne, Tuakumana kulengesha nsubu wa Yehowa wonso, ne tshioshelu ne mpanza yatshi yonso, ne mesa a bidia bilesha ne mpanza yau yonso.

¹⁹Tuakujidila kabidi mpanza yonso yakimasha mukelenge Ahaza mu bukelenge buandi bubi; Iliona, idi ku mpala kua tshioshelu tshia Yehowa.

²⁰Hashishe mukelenge Hezikiya wakabika hatshiatshia, wakasangisha bantu banene ba mu musoko, wakabanda nʼabo ku nsubu wa Yehowa.

²¹Bakalua ne balume ba ngombe muanda mutekete ne bimpanga muanda mutekete ne mikoko muanda mutekete ne mpumbu ya mbushi muanda mutekete bu milambu ya kubuikila nʼai mibi ya bantu bua bukelenge ne bua nsubu ne bua ba mu Yuda. Yeye wakelela bakuidi, bana ba Alona, mukenji bua kuyifila kudi Yehowa ha tshioshelu.

²²Bakashiha balume ba ngombe, bakuidi bakangata mashi, bakamiamina ha tshioshelu; bakashiha bimpanga, bakamiamina mashi ha tshioshelu; bakashiha mikoko kabidi, bakamiamina mashi ha tshioshelu.

²³Bakalua ne mpumbu ya mbushi ya milambu ya kubuikila nʼai mibi ku mpala kua mukelenge ne kua bantu bonso; bakatentekasha bianza biabo ha mutu hai;

²⁴bakuidi bakayishiha, bakafila mashi ai ha tshioshelu bua kubuikila nʼau mibi ya Bena Isalele bonso; bualu bua mukelenge wakela mukenji wandi bua bobo bafidile Bena Isalele bonso milambu ya kuosha ne ya kubuikila nʼai mibi.

²⁵Yeye wakateka Bena Lewi mu nsubu wa Yehowa ne biamu bia kukumakasha ne nzenze ne bisanji bu muakadi mukenji wa Davidi ne wa Gada, mumonyi wa malu wa mukelenge, ne wa Natana muprofete; bualu bua mukenji wakadi wa Yehowa mukana mua baprofete bandi.

²⁶Bena Lewi bakimana ne bintu bia misambu bia Davidi, ne bakuidi bakadi ne mpungi.

²⁷Hezikiya wakela mukenji bua kufilabo milambu ya kuosha ha tshioshelu. Hakabangabo kuosha milambu, bakabanga kutumbisha Yehowa ne misambu ne mpungi ne bintu bia kuimba nʼabi bia Davidi, mukelenge wa Isalele.

²⁸Bantu bonso bakatendelela, bimbi ba misambu bakimba, bena mpungi bakela mpungi; bakenza nunku tô ne hakahia milambu ya kuosha yonso.

²⁹Hakamanabo kufila milambu, mukelenge ne bantu bonso bakadi nʼandi bakinama mitu yabo, bakatendelela.

³⁰Mukelenge Hezikiya ne bantu banene bakela mukenji kabidi bua Bena Lewi batumbishe Yehowa ne misambu ya mei a Davidi ne a Asafa, mumonyi wa malu. Bakimba misambu ne disanka, bakinama mitu yabo, bakatendelela.

³¹Hashishe Hezikiya wakamba ne, Tuakadi idila kudi Yehowa; semenai ha buihi ne milambu ya kusakidila nʼai Yehowa mu nsubu wandi. Bantu bakalua ne milambu ya kumusakidila nʼai; bantu bakasua kuenza nunku mu mitshima yabo bakalua ne milambu ya kuosha kabidi.

³²Milambu ya kuosha yakalua nʼai bantu yakadi balume ba ngombe makumi muanda mutekete ne bimpanga lukama ne mikoko nkama ibidi; yoyo yonso yakadi milambu ya kuoshela Yehowa.

³³Bintu bia tshijila biakadi ngombe nkama isambombo ne mikoko binunu bisatu.

³⁴Kadi bakuidi bakatamba bukese, kabakamanya mua kûbula biseba bia milambu yonso ya kuosha; nunku bana babo Bena Lewi bakabakuatshisha tô ne hakamanabo mudimu wonso ne hakadijidila bakuidi bonso; bualu bua Bena Lewi bakadi ne mitshima miakane bua kudijidila bakahita bakuidi kudifila.

³⁵Milambu ya kuosha yakadi ya bungi, ne manyi a milambu ya kuvuisha nʼai ditalala, ne milambu ya bintu bia kunua bia milambu yonso ya kuosha. Nunku bakalongolola mudimu wa mu nsubu wa Yehowa.

³⁶Hezikiya wakasanka ne bantu bonso kabidi, bua malu akalongoluela Nzambi bantu; bualu bua bakenza bualu ebu lukasa.