Read tshiluba 2 Kulondolola 30 Bible Online

2 Kulondolola 30 - tshiluba bible

2 Kulondolola 30

¹Hezikiya wakatumina Bena Isalele ne Bena Yuda bonso dî; wakafundila Bena Efelayima ne Bena Manashe mikanda bua bobo balue ku nsubu wa Yehowa mu Yelushalema, bua kudiabo bidia bia disanka dia kuhita kua Yehowa, Nzambi wa Isalele.

²Bualu bua mukelenge wakadianjila kuhunga dî ne bantu banene ne bantu bonso ba bu Yelushalema bua kudiabo bidia bu disanka dia kuhita kua Yehowa mu ngondo muibidi.

³Bualu bua kabakamanya mua kuhidia ku tshikondo tshiabi, bualu bua bakuidi bakuabo kabakanji kudijidila bungi bakumbane ne bantu kabakanji kudisangisha ku Yelushalema.

⁴Bualu ebu buakadi buimpe ku mesu kua mukelenge ne kua bantu bonso.

⁵Nunku bakahunga dî diabo bua kuela mukenji ku nseke yonso ya Isalele ku Bê-sheba tô ne ku Dana, bua bantu balue ku disanka dia kuhita kua Yehowa, Nzambi wa Isalele, ku Yelushalema; bualu bua bantu ba bungi kabakadia bidia ebi bu muakadi mukenji.

⁶Nunku miloho yakaya ne mikanda ya mukelenge ne ya bantu banene ku nseke yonso ya Bena Isalele ne ya Bena Yuda, bu muakadi mukenji wa mukelenge ne, Nuenu Bena Isalele, kudimunai mitshima yenu kudi Yehowa, Nzambi wa Abalahama ne wa Isaka ne wa Isalele, bua yeye ahingane kudi difuka dienu diakahanduka mu bianza bia bakelenge ba Ashû.

⁷Kanuikadi bu batatuʼenu ne bu bana benu, bakenzela Yehowa, Nzambi wa bankambua babo, bibi, nunku yeye wakabafila bua bobo batuishe bakuabo mikemu, bu munudi numone.

⁸Kanukoleshi mitshima yenu bu muakenza batatu benu; kadi neuhuekeshe kudi Yehowa, nubuele ku muaba wandi wa tshijila wakajidileye tshiendelele; nukuatshile Yehowa Nzambi wenu mudimu bua tshiji tshiandi tshikole tshiumuke kunudi.

⁹Bualu bua binuakudimuna mitshima yenu kudi Yehowa kabidi, bakuenu ne bana benu balela nebahete luse ku mesu kua bantu bakaya nʼabo mu buhika, nebahingane ku buloba ebu kabidi; bualu bua Yehowa Nzambi wenu udi mûle tente ne luse ne dinanga, kena unukoma nyima binuahingana kudiye.

¹⁰Nunku miloho yakaya ku musoko ne musoko ya mu Efelayima ne Manashe tô ne ku Zebuluna; kadi bobo bakabaseka, bakabalonda.

¹¹Kadi bantu bakuabo ba mu Ashe ne Manashe ne Zebuluna bakadihuekesha, bakalua ku Yelushalema.

¹²Tshianza tshia Yehowa tshiakadi kudi Bena Yuda bua kubavuisha mutshima umue, bua bobo batumikile mukenji wa mukelenge ne wa bantu bandi banene ku dî dia Yehowa.

¹³Bantu ba bungi bakadisangisha ku Yelushalema bua kudiabo bidia bidi kabiyi ne luevene mu ngondo muibidi; tshisumbu tshiakadi tshinene.

¹⁴Bobo bakajuka, bakumusha bioshelu biakadi mu Yelushalema ne mpanza ya kuoshelamu musenga wa manananshi, bakabiela mu musulu wa Kidilona.

¹⁵Bakashiha mikoko ku dituku dia dikumi ne dinai dia mu ngondo muibidi; bakuidi ne Bena Lewi bakakuatshika bundu, bakadijidila, bakatua ne milambu ya kuosha ha-kahia mu nsubu wa Yehowa.

¹⁶Bakimana muntu ne muntu mu muaba wandi bu muakadi mukenji wa Mose, muntu wa Nzambi; bakuidi bakamiamina mashi akangatabo ku bianza bia Bena Lewi.

¹⁷Bualu bua ba bungi bakadi munkatshi muabo bakadi kabayi badidila; nunku Bena Lewi bakadi ne bua kushihela muntu ne muntu wakadi kayi muakane mulambu bua kubajidila kudi Yehowa.

¹⁸Bualu bua bantu ba bungi ba mu Efelayima ne ba mu Manashe ne ba mu Yisakâ ne ba mu Zebuluna kabakanji kudilengesha, kadi bakadia bidia bia disanka dia kuhita kua Yehowa kabayi batumikila mukenji wakafundabo. Bualu bua Hezikiya wakadianjila kutulombela Nzambi ne, Yehowa muimpe abuikile mibi ya muntu yonso

¹⁹wakudimuna mutshima wandi bua kukebeye Nzambi, Yehowa, Nzambi wa bankambua bandi, bikaleye kayi mudilengeshe bu mudi mukenji wa mu muaba wa tshijila wamba.

²⁰Yehowa wakunvuila Hezikiya, wakasangasha bantu.

²¹Bena Isalele bakadi mu Yelushalema bakadia bidia bidi kabiyi ne luevene matuku muanda mutekete ne disanka dinene; Bena Lewi ne bakuidi bakatumbisha Yehowa ku dituku ku dituku, bakela bintu bia kuimba nʼabi bikole.

²²Hezikiya wakasamba Bena Lewi bonso bakadi ne meji makane mu mudimu wa Yehowa. Nunku bakadia bidia abi matuku muanda mutekete, bafile milambu ya kuosha ne milambu ya kuvuisha nʼai ditalala, batonde mibi yabo kudi Yehowa, Nzambi wa bankambua babo.

²³Bantu bonso bakahunga dî diabo bua kudiabo bidia tô matuku muanda mutekete makuabo; bakenza nunku ne disanka.

²⁴Bualu bua Hezikiya, mukelenge wa Yuda, wakaha bantu balume ba ngombe tshinunu ne mikoko binunu muanda mutekete bua kufilabo bu milambu; ne bantu banene bakaha bantu balume ba ngombe tshinunu ne mikoko binunu dikumi; bakuidi ba bungi bakadijidila.

²⁵Bena Yuda bonso ne bakuidi ne Bena Lewi ne bantu bonso bakafuma mu Isalele, ne bantu ba bende bakadi bafume mu buloba bua Isalele bakashikama mu Yuda, bakasanka.

²⁶Nunku disanka dinene diakadi mu Yelushalema; kabakadi ne disanka dinene mu Yelushalema katshia mu matuku a bukelenge bua Solomo, muana wa Davidi, mukelenge wa Isalele.

²⁷Bakuidi ne Bena Lewi bakajuka, bakavudishila bantu disanka; Nzambi wakunvua dî diabo, ne kutendelela kuabo kuakafika tô ne mu diulu ku muaba wandi wa tshijila.