Read tshiluba 2 Kulondolola 31 Bible Online

2 Kulondolola 31 - tshiluba bible

2 Kulondolola 31

¹Hakashika malu â, Bena Isalele bonso bakadiku bakamuangalaka ku misoko yonso ya Yuda, bakashimbula makunshi onso a bitendelelu bia mpingu, bakataha mitshi ya Bashela, bakashimbula bioshelu bionso biakadi ha mutu ha mikuna ya mu Yuda ne mu Benyamina, ne ya mu Efelayima ne mu Manashe kabidi, tô ne hakabishimbulabo bionso. Hashishe Bena Isalele bonso bakahingana, muntu ne muntu ku buhianyi buandi ne ku musoko wandi.

²Hezikiya wakasungula bakuidi ne Bena Lewi bu muakadi milongo yabo, muntu ne muntu ku mudimu wandi, ne bakuidi ne Bena Lewi, bua kufilabo milambu ya kuosha ne ya kuvuisha nʼai ditalala, ne bua kuenzabo midimu yabo, ne bua kusakidilabo ne bua kutumbishabo Nzambi mu bibi bia ku tshitudilu tshia Yehowa.

³Yeye wakafila luseke lua bintu bia mukelenge lua milambu ya kuosha dinda ne dilolo ne ku dituku dia lumingu ne habala ngondo ne ku matuku a bidia bia disanka, bu muakafundabo mu mikenji ya Yehowa.

⁴Bualu bukuabo kabidi, yeye wakelela bantu bakadi bashikama mu Yelushalema mukenji bua bobo bafile bintu biabo bikuabo kudi bakuidi ne Bena Lewi, bua bobo badijidile ku mukenji wa Yehowa.

⁵Hakambeye mukenji eu, Bena Isalele bakafila bintu bia bungi bia bintu biakahuolabo diambedi ne bia nvinyo ne bia manyi ne bia buitshi ne bia bintu bionso biakamena mu madimi abo; bakalua ne tshia dikumi tshia bintu biabo bia bungi.

⁶Bena Isalele ne Bena Yuda bakadi bashikama mu misoko ya Yuda bakalua ne tshia dikumi tshia ngombe ne tshia mikoko, ne tshia dikumi tshia bintu biakajidilabo Yehowa Nzambi wabo; bakabiteka hanshi mu bisumbu.

⁷Bakabanga kuteka bintu hanshi mu bisumbu mu ngondo muisatu, bakamana mudimu eu mu ngondo wa muanda mutekete.

⁸Hakalua Hezikiya ne bantu banene, bakamona bisumbu ebi, bakavudishila Yehowa ne bantu bandi Isalele disanka.

⁹Hashishe Hezikiya wakebesha bakuidi ne Bena Lewi bua bisumbu ebi.

¹⁰Azaya, muakuidi munene, wa mu nsubu wa Sadoka, wakamukudimuna ne, Katshia bantu bahanga kufila bintu mu nsubu wa Yehowa, tuetu tuakudia, tuakukuta, ne bintu ebi biakushala bia ha mutu; bualu bua Yehowa wakasankisha bantu bandi; bintu ebi bia bungi bidi bishala.

¹¹Hezikiya wakela dî diandi bua bantu balongolole nsubu ya mu nsubu wa Yehowa; bakenza nunku.

¹²Bakalua ne milambu ne bia dikumi bia bintu bia tshijila ne lulamatu lua mitshima yabo; Kenaniya, Muena Lewi, wakadi ku mutu kuabi, ne Shemei muanʼabo wakamulonda.

¹³Yehiele ne Azaziya ne Nahata ne Asahele ne Yelimota ne Yozabada ne Eliele ne Yisemakaya ne Mahata ne Benaya bakadi batangidi mu bianza bia Konaniya ne bia Shemei muanʼabo, bua mukenji wa mukelenge Hezikiya ne wa Azaya, mukokeshi wa mu nsubu wa Nzambi.

¹⁴Kole, muana wa Yimena, Muena Lewi, mulami wa tshibi tshia ku esete, wakadi ku mutu kua bintu bia disanka biakafilabo kudi Nzambi, bua kuabanyanganeye milambu ya Yehowa ne bintu bia tshijila.

¹⁵Edene ne Miyamina ne Yeshua ne Shemaya ne Amalia ne Shekanya bakadi ku nyima kuandi mu misoko ya bakuidi ba mu midimu yabo, bua kuabanyangana ne bana babo bintu, ne banene ne bakese.

¹⁶Ha mutu ha balume bakabalabo mu kulondolola kuabo ku bidimu bisatu tô ne ku mutu, muntu yonso wakadi ubuela mu nsubu wa Yehowa, bu muakadi mudimu wa buatshia-buatshia wa ku mulongo wa muntu ne muntu.

¹⁷Bantu bakabalabo bakadi ku kulondolola kuabo kua bakuidi ba mu nsubu ya batatu babo ne Bena Lewi ku bidimu makumi abidi tô ne ha mutu ha bidimu ebi mu midimu yabo;

¹⁸ne bantu bakuabo bakabalabo bakadi ku kulondolola kuabo, bana bakese bonso, ne bakashi, ne bana balume ne bana bakashi, ba mu tshisumbu tshiabo tshionso; bualu bua bobo bakadijidila mu mudimu wabo wa tshijila.

¹⁹Bakatela mena a bantu bakuabo bua kufilabo bintu kudi bana balume ba Alona, bakuidi bakadi bashikame mu madimi akadi ku mpenge kua musoko ne musoko, ne bua kuhabo balume bonso ba bakuidi bintu biabo ne kudi bonso bakadi babadibue mu kulondolola kua Bena Lewi.

²⁰Hezikiya Wakenza nunku ku nseke yonso ya Bena Yuda; yeye wakenza malu mimpe ne makane ne a lulamatu ku mpala kua Yehowa Nzambi wandi.

²¹Malu onso akabangeye mu mudimu wa mu nsubu wa Nzambi ne a mu mikenji ne mei bua kukeba Nzambi wandi, yeye wakaenza ne mutshima wandi wonso, wakadi ne diakalengele.