Read tshiluba Ezela 4 Bible Online

Ezela 4 - tshiluba bible

Ezela 4

¹Hakunvua bena lukuna ba Bena Yuda ne Bena Benyamina lumu ne, Bantu bakahingana ku buhika badi bashila Yehowa, Nzambi wa Isalele, ntempelo,

²bakalua kudi Zelubabela ne kudi bakadi ku mutu kua nsubu ya batatu babo, bakabambila ne, Tuase bietu nʼenu; bualu bua tuetu tudi tukeba Nzambi wenu bu nuenu, tuakufila milambu kudiye ku dituku diakalua Esâ-hadona, mukelenge wa Ashû, nʼetu kunoko tô ne ku dituku edi.

³Kadi Zelubabela ne Yeshua ne bakadi ku mutu kua biota bia batatu babo ba mu Bena Isalele bakabambila ne, Nuenu kanuena mua kuasa nʼetu nsubu wa Nzambi wetu; kadi tuetu nkayetu netuashile Yehowa, Nzambi wa Isalele, nsubu bu muakatuambila Kolesha, mukelenge wa Pelasa.

⁴Hashishe bena buloba bakatekesha maboko a Bena Yuda, bakatatshisha mu mudimu wabo,

⁵bakatatshisha bantu anu bua kubahumbishabo matuku onso a Kolesha, mukelenge wa Pelasa, tô ne ku bukokeshi bua Dayawesha, mukelenge wa Pelasa.

⁶Mu bukokeshi bua Ahashawelosha, ku tshibangidilu tshia bukokeshi buandi, bakatanda mukanda bua kubanda ba mu Bena Yuda ne ba mu Yelushalema.

⁷Mu matuku a Atashasete, Bishilama ne Miteledata ne Tabêla ne ba ku mulongo wabo bakafundila Atashasete, mukelenge wa Pelasa, mukanda; mukanda eu wakadi mufundibue mu maleta a Bena Sulia, mufundibue mu muaku wa Bena Sulia.

⁸Lehuma, mumanyi wa mikenji, ne Shimeshai secrétaire bakafundila Atashasete mukelenge mukanda wa kubanda Bena Yelushalema;

⁹hashishe Lehuma, mumanyi wa mikenji, ne Shimeshai secrétaire ne bena mulongo wabo, ne Bena Dina ne Bena Afâsateka ne Bena Tâpela ne Bena Afâseka ne Bena Âkewa ne Bena Babulona ne Bena Shushanaka ne Bena Dahaye ne Bena Elama,

¹⁰ne bisamba bikuabo bia bantu biakalua nʼabi Osenapâ, muntu munene wa butumbi, wakabateka mu musoko wa Samalea ne mu dishiya dia muamua dia musulu wa Pelata.

¹¹Eu mmukanda wakatuminabo mukelenge Atashasete: Bantu bebe ba ku buloba bua dishiya dia musulu wa Pelata ne ba ku tshikondo etshi badi bakutumina muoyo.

¹²Mukelenge amanye biandi ne, Bena Yuda aba bakafuma kûdi bakafika kutudi mu musoko wa Yelushalema; badi basa musoko au mubi wakakutombokela, bakamana kushikisha ngumbu ne bishimikidi biai.

¹³Mukelenge amanye biandi kabidi ne, Bikala musoko muashibue ne ngumbu mijadikibue, kabena bafila milambu ne bia bungendʼa mushinga ne mpunga; nunku neunyanyishe luhetu lua hakelenge.

¹⁴Bualu bua tuetu tutu tuadia luehu lua ku nsubu wa mukelenge, kambimpe bua tuetu kutangila bundu bua mukelenge, nunku tuakufunda mukanda eu bua kumanyisha mukelenge wetu;

¹⁵bua yeye atangile mu mikanda yakafunda batatuʼandi ne habaleye mukanda wa kulondolola kua malu a musoko eu, neamanye biandi ne musoko eu udi wa batomboki batu benzela hakelenge ne nseke bibi kale tô ne katataka; anu bua bualu ebu bakabutuisha musoko eu.

¹⁶Tudi tumanyisha mukelenge ne, Bikala musoko eu muashibue, ne bikala ngumbu mishikishibue, wewe kuena ne buebe buhianyi dishiya dia munemu dia musulu wa Pelata.

¹⁷Hashishe mukelenge wakatumina Lehuma, mumanyi wa mikenji, ne Shimeshai secrétaire ne bena mulongo wabo bakadi bashikama mu Samalea ne mu buloba bua dishiya dia musulu wa Pelata mukandu ne, Ditalala dikale kunudi.

¹⁸Bakumbadila mukanda unuakuntumina.

¹⁹Nakuela mukenji wanyi, ne bakukeba mu mikanda ya kulondolola kua malu, bakasangana ne, Musoko eu wakatombokela bakelenge musangu wa kale ne ditomboka ne diela dia bifufu biakadimu.

²⁰Bakelenge banene bakadi ku mutu kua Yelushalema, bakadi bakokesha buloba buonso bua dishiya dia musulu wa Pelata; bakadi bafila milambu ne bungendʼa mushinga ne mpunga kudibo.

²¹Nunku nuelele bantu aba mukenji ne, Balekele mudimu, kabashi musoko au tô ne hangamba dî dikuabo.

²²Nudimuke, kanujingakanyi ku bualu ebu; badi ne bua kudiundisha dikehesha dia bakelenge bua tshinyi?

²³Hakabalabo mukanda wa mukelenge Atashasete ku mesu kua Lehuma ne Shimeshai secrétaire ne bena mulongo wabo, bakaya kudi Bena Yuda mu Yelushalema lubilu, bakakandisha mudimu ku bukole.

²⁴Nunku bakalekela mudimu wa nsubu wa Nzambi wa mu Yelushalema; bakalekela mudimu nunku tô ne ku tshidimu tshibidi tshia mu bukokeshi bua Dayawesha, mukelenge wa Pelasa.