Read tshiluba Ezela 5 Bible Online

Ezela 5 - tshiluba bible

Ezela 5

¹Nunku baprofete Hagai ne Zekâya, muana wa Ido, bakambila Bena Yuda bakadi mu Yuda ne mu Yelushalema dî dia Nzambi; bakabambila dî mu dina dia Nzambi wa Isalele.

²Hashishe Zelubabela, muana wa Shaletiele, ne Yeshua, muana wa Yozadaka, bakajuka, bakabanga kuasa nsubu wa Nzambi udi mu Yelushalema; baprofete ba Nzambi bakadi nʼabo, bakabakuatshisha.

³Ku tshikondo atshi Tatenai, gouverneur wa buloba bua dishiya dia muamua dia musulu wa Pelata, ne Shetâ-bozenai ne bena mulongo wabo, bakalua kudibo, bakabakonka ne, Wakunuelela mukenji bua kuasa nsubu eu ne bua kushikisha lumbu nganyi?

⁴Hashishe tuakabambila mena a bantu bakadi basa nsubu eu.

⁵Kadi mesu a Nzambi wabo akadi kudi bakulu ba Bena Yuda, kabakabakandisha mu mudimu tô ne hakayabo ne bualu ebu kudi Dayawesha, ne hakabafundileye mukanda bua bualu ebu.

⁶Eu mmukanda wakadi Tatenai, gouverneur wa buloba bua dishiya dia musulu wa Pelata, ne Shetâbozenai ne Bena Afâsateka, bena mulongo wandi, bakadi dishiya dia musulu wa Pelata, batumine mukelenge Dayawesha;

⁷bakamutumina mukanda wakadi mufunda nunku: Ditalala dionso dikale kudi mukelenge Dayawesha.

⁸Mukelenge amanye biandi ne, Tuetu tuakuya ku buloba bua Yuda ku nsubu wa Nzambi munene udibo babikila ne mabue manene ne mabaya adi majadikibue mu bimanu bia nsubu; badi benza mudimu eu ne disuminyina ne badi batuma mudimu eu ku mpala ne bianza biabo.

⁹Hashishe tuakebesha bakulu aba ne, Wakanuelela mukenji bua nuenu nuase nsubu eu ne bua nuenu numane lumbu elu nganyi?

¹⁰Tuakabebesha mena abo kabidi bua tuetu kukumanyisha ne bua tuetu tukufundile mena a bantu badi ku mutu kuabo.

¹¹Bakatuandamuna dî diabo nunku ne, Tuetu tudi bena mudimu ba Nzambi wa diulu ne buloba; tudi tuasa nsubu wakasabo bidimu bia bungi bimane kuhita, nsubu wakasabo, wakashikishabo kudi mukelenge munene wa Isalele.

¹²Kadi hakafuisha bankambua betu Nzambi wa mu diulu tshiji, yeye wakabafila mu bianza bia Nebukadenesâ, Muena Kasada, mukelenge wa mu Babulona, nguakahaula nsubu eu ne nguakaya ne bantu aba mu Babulona.

¹³Kadi mu tshidimu tshia kumudilu tshia bukelenge bua Kolesha, mukelenge wa Babulona, mukelenge Kolesha mene wakela mukenji bua kuasabo nsubu eu wa Nzambi.

¹⁴Malonga a or kabidi ne a argent a mu nsubu wa Nzambi, akangata Nebukadenesâ mu ntempelo wakadi mu Yelushalema, wakaya nʼau mu ntempelo wa mu Babulona, mukelenge Kolesha wakangata malonga au mene mu ntempelo wa mu Babulona, wakâfila kudi muntu, dina diandi Sheshebasâ, nguakasunguleye gouverneur;

¹⁵wakamuambila ne, Angata malonga â, uye nʼau, wâteka mu ntempelo udi mu Yelushalema, base nsubu wa Nzambi mu muaba wandi.

¹⁶Hashishe Sheshebasâ eu mene wakalua, wakajadika bishimikidi bia nsubu wa Nzambi udi mu Yelushalema; batshidi basa nsubu au ku musangu au tô ne katataka, kabena banji kumumana.

¹⁷Biamona mukelenge ne mbimpe, bakebe mu nsubu wa tshibutshilu tshia mukelenge udi kuakua ku Babulona ne, Mukelenge Kolesha wakela mukenji bua kuasa nsubu eu wa Nzambi mu Yelushalema, anyi? Hashishe, mukelenge atuambile bu mudi disua diandi mu bualu ebu.