Read tshiluba Nehemiya 4 Bible Online

Nehemiya 4 - tshiluba bible

Nehemiya 4

¹Hakunvua Sanebalata ne, Badi basa lumbu, wakadi ne tshiji tshikole, Wakafika munda, wakaseka Bena Yuda.

²Yeye wakamba ku mpala kua bana babo ne kua masalayi a Bena Samalea, wakabebesha ne, Bena Yuda aba batekete badi benza tshinyi? Nebadiashile lumbu anyi? Nebafile milambu ya kuosha, anyi? Nebamane bualu ebu dituku dimue, anyi? Nebasangashe mabue adi bu mishiki mu diala akamanabo kuosha, anyi?

³Tobiya, Muena Amona, wakadi hehi nʼandi, wakamba ne, Babanda mubuabua ha mutu ha lumbu lua mabue ludibo basa udi mua kulushimbula.

⁴O Nzambi wetu, unvua bu mudibo batulengulula, ukudimune bihendu biabo ha mutu habo, ubafile mu buloba bua bahika bu bintu biakahaulabo;

⁵kubabuikididi mibi yabo, kumushi malu mabi abo ku mesu kuebe nansha; bualu bua bobo bakakufuisha tshiji ku mesu kua bibaki ba lumbu.

⁶Nunku tuakasa lumbu; lumbu luonso luakatuangana tô ne ku tshituha tshia bule bualu, bualu bua bantu bakadi ne mitshima ya kuenza mudimu.

⁷Kadi hakunvua Sanebalata ne Tobiya ne Bena Alabâ ne Bena Amona ne Bena Ashedodo ne, Badi bananukila kuasa ngumbu ya Yelushalema ne badi bamba kukanda miaba yakadi mishimbuka, bakadi ne tshiji tshikole;

⁸hashishe buonso buabo bakatuelela tshifufu bua kuluanganabo ne Bena Yelushalema ne bua kutompakasha malu etu.

⁹Kadi tuetu tuakatendelela Nzambi wetu tuakasungula batentekedi bua kutentekelabo munya ne butuku.

¹⁰Bena Yuda bakamba ne, Bukole bua batuadi ba majitu buakukehela, bilu bia bungi bidi bishala, katuena bamanye mua kuasa lumbu.

¹¹Bakadi nʼetu lukuna bakamba ne, Kabena bamanye bualu, kabena batutangila tô ne hatuamueneka munkatshi muabo bua kubashiha ne bua kubalekesha mudimu.

¹²Hashishe, hakalua Bena Yuda kutudi bakadi bashikama ha buihi nʼabo, bakatuambila misangu dikumi ku nseke yonso ne, Bunudi nʼabu mbua kuhingana kutudi.

¹³Nunku nakateka bantu ku meku abo kuinshi kua lumbu mu muaba munene ne miele ya nvita ne mafuma ne mata mu bianza biabo.

¹⁴Nakatangila ne nakajuka, nakambila bantu banene ne bakokeshi ne bantu bakuabo ne, Kanubatshinyi, nuvuluke Mukelenge wenu munene, mukole, nuluangane bikole bualu bua bana benu ne bana benu ba balume ne bana benu ba bakashi baledibue ne bua bakashi benu ne nsubu yenu.

¹⁵Hakunvua bena lukuna betu ne, Badi bamanye malu etu, ne Nzambi wabo wakukudimuna tshifufu tshietu, tshiakalua tshianana, tuakahingana buonso buetu ku lumbu, muntu ne muntu ku mudimu wandi.

¹⁶Ku tshikondo atshi tshituha tshia bantu banyi bakenza mudimu ne tshituha tshikuabo tshiakakuata mafuma ne ngabu ne mata ne bikowelu bia nvita; bakokeshi bakashala ku nyima kua tshisamba tshionso tshia Bena Yuda.

¹⁷Bibaki ba lumbu ne batuadi ba bintu bakadiangatshila bintu bia nvita; muntu ne muntu wakenza mudimu ne tshianza tshimue, wakakuata bintu bia nvita mu tshianza tshikuabo;

¹⁸bibaki ba lumbu muntu ne muntu wakadi ne muele wandi wa nvita mubuesha mu mukaba; bakenza mudimu nunku. Muedi wa mpungi wakadi ha buihi nʼanyi.

¹⁹Nakambila bantu banene ne bakokeshi ne bantu bakuabo ne, Mudimu udi mukole ne munene, ne tuetu tudi bahanduluke ba mutu ha lumbu bashilangane umue kudi mukuabo;

²⁰nunku mu miaba yonso mudi nunyua muadi wa mpungi, nudisangisheku kutudi; Nzambi wetu neatuluile nvita.

²¹Tuakenza mudimu nunku: tshituha tshia bantu tshiakakuata mafuma ku dinda tô ne ku butuku hakamueneka mitoto.

²²Ku musangu umue eu nakambila bantu ne, Muntu ne muntu ashikame ne muena mudimu wandi mu Yelushalema bua bobo bamanye mua kutulama butuku ne bua kukuata mudimu mu munya.

²³Nunku meme ne bana betu ne bena mudimu banyi ne bena nvita bakadi bandonda katuakavula bilulu bietu; muntu yonso wakaya ne bintu biandi bia nvita ku mai.