Read tshiluba Esetê 5 Bible Online

Esetê 5 - tshiluba bible

Esetê 5

¹Hakahita matuku asatu, Esetê wakadiluatshisha bilulu biandi bia bukelenge, wakimana mu tshiendedi tshia munda mua nsubu wa mukelenge ku mbelu kua nsubu wa mukelenge; mukelenge wakadi mushikame mu nkuasa wandi wa bukelenge mu nsubu wa bukelenge, ku tshibueledi tshia nsubu.

²Hakadi mukelenge utangila Esetê mukelenge mukashi muimane mu tshiendedi, yeye wakasangana luse ku mesu kuandi, mukelenge wakoluela Esetê dikombo dia or diakadi mu tshianza tshiandi. Nunku Esetê wakasemena ha buihi, wakalenga lusongo lua dikombo.

³Hashishe mukelenge wakamuebesha ne, Wewe Esetê, mukelenge mukashi, udi musue tshinyi? Dilomba diebe didi tshinyi? Nebakuhedi tô ne ku tshituha tshia bukelenge.

⁴Esetê wakamukudimuna ne, Bikalabi bimpe kudi mukelenge, mukelenge ne Hamana balue ku disanka dinakalongoluela mukelenge.

⁵Hashishe mukelenge wakamba ne, Babikile Hamana lubilu, benze bu muakuamba Esetê. Nunku mukelenge ne Hamana bakalua ku bidia bia disanka biakabalongoluela Esetê.

⁶Hakadibo banue nvinyo ya ku bidia bia disanka, mukelenge wakebesha Esetê ne, Tshiudi ulomba ntshinyi? Nebakuhetshi. Dilomba diebe didi tshinyi? Nebakuhedi, tô ne ku tshituha tshia bukelenge.

⁷Hashishe Esetê wakamukudimuna ne, Dikonka ne dilomba dianyi bidi nunku:

⁸bingikala ne luse ku mesu kua mukelenge, ne biasua mukelenge kuitaba ku dikonka dianyi ne kuenza bu mudi dilomba dianyi, mukelenge ne Hamana balue ku disanka dinene dindi mbalongoluela, ne makelela nengenze bu muakuamba mukelenge.

⁹Hashishe Hamana wakaluhuka ne disanka dia bungi mu mutshima wandi; kadi hakatangila Hamana Môdekai mushikame ku tshibi tshia mukelenge ne yeye kayi mubike, kayi mumushile muaba, wakasangana ne tshiji tshikole kudi Môdekai.

¹⁰Kadi Hamana wakadikanda, wakaya kuandi; wakatuma dî, wakabikila balunda bandi ne mukashi wandi Zeleshe.

¹¹Hamana wakabamanyisha bua butumbi bua bubanji buandi, ne bungi bua bana bandi bakaleleye, ne ku mutu kua malu onso kuakamuteka mukelenge ne bu muakamubandisheye ku mutu kua bantu banene bonso ne bena mudimu ba mukelenge.

¹²Hamana wakamba dî dikuabo kabidi ne, Bulelela, Esetê mukelenge mukashi kakitabusha bua muntu mukuabo aye ne mukelenge ku bidia bia disanka biakalongololeye anu meme; ne makelela kabidi wakumbikila meme ne mukelenge bua kudia nʼandi.

¹³Kadi malu a onso kaena asankisha handi ntangila Môdekai, Muena Yuda, mushikame ku tshibi tshia mukelenge.

¹⁴Hashishe mukashi wandi Zeleshe ne balunda bandi bakamuambila ne, Balongolole tshiowelu bule bua coudées[3] makumi atanu, hatshiabu wewe wambile mukelenge bua kuowelaku Môdekai; hashishe neumanye mua kuya ne mukelenge ne disanka ku bidia bia disanka dinene. Bualu ebu buakasankisha mutshima wa Hamana; yeye wakalongololesha tshiowelu.