Read tshiluba Esetê 9 Bible Online

Esetê 9 - tshiluba bible

Esetê 9

¹Mu ngondo wa dikumi ne ibidi, ngondo wa Adâ mene, mu dituku dia dikumi ne asatu dia ngondo eu, bakamba diba dia kumana mukenji wa mukelenge kufika, mu dituku diakatekemenabo kudi bena lukuna ba Bena Yuda bua kubakokeshabo (kadi bualu buakakudimuka, ne Bena Yuda bakakokesha bena lukuna babo),

²Bena Yuda bakadisangisha mu misoko yabo mu nseke yonso ya mukelenge Ahashawelosha bua kukuatabo honso bakasua kubenzela bibi; nansha muntu wakamanya mua kuimana ku mpala kuabo, bualu bua ditshina diabo diakakuata bantu bonso.

³Bantu banene bonso ba mu nseke yonso ne miloho ne ba-gouverneur ne bonso bakadi benzela mukelenge mudimu bakakuatshisha Bena Yuda; bualu bua ditshina dia Môdekai diakabakuata.

⁴Bualu bua Môdekai wakadi muntu munene mu nsubu wa mukelenge, ne lumu luandi luakafika ku nseke yonso; bualu bua muntu eu Môdekai wakadiundadiunda mu butumbi buandi.

⁵Bena Yuda bakashiha bena lukuna babo bonso ne miele ya nvita, bakabashiha ne bakababutula ne bakenzela bakadi nʼabo lukinu bu muakasuabo.

⁶Mu nsubu wa mukelenge wa mu Shushana Bena Yuda bakashiha ne bakabutula bantu balume nkama itanu.

⁷Bakashiha Pâsha-nedata ne Dalafona ne Asepata,

⁸Polata ne Adalia ne Alidata,

⁹ne Pâmashata ne Alisai ne Alidai ne Wayezata,

¹⁰bana halume dikumi ba Hamana, muana wa Hamedata, muena lukuna wa Bena Yuda; kadi kabakahaula bintu biabo.

¹¹Mu dituku adi bakamanyisha mukelenge bua bungi bua bantu bakashihabo mu nsubu wa mukelenge wa mu Shushana.

¹²Mukelenge wakambila Esetê mukelenge mukashi ne, Bena Yuda bakashiha ne bakabutula bantu balume nkama itanu ba mu nsubu wa mukelenge wa mu Shushana ne bana balume ba Hamana dikumi; bakenza tshinyi mu nseke mikuabo ya mukelenge? Mpindiu dilomba diebe didi tshinyi? Nenkuhedi. Disengelela diebe dikuabo didi tshinyi? Nedienjibue.

¹³Hashishe Esetê wakamba ne, Biasua mukelenge, itabushe bua Bena Yuda badi mu Shushana benze makelela kabidi bu mudi mukenji wa lelu, balembeleshe bana balume ba Hamana dikumi ku tshiowelu atshi kabidi.

¹⁴Mukelenge wakela mukenji bua kuenzabo nunku; mukenji eu wakafuma mu Shushana, bakalembelesha bana balume ba Hamana dikumi ku tshiowelu atshi.

¹⁵Bena Yuda ba mu Shushana bakadisangisha mu dituku dia dikumi ne anai dia ngondo wa Adâ, bakashiha bantu balume ba mu Shushana nkama isatu; kadi kabakahaula bintu biabo.

¹⁶Bena Yuda bakuabo bakadi mu nseke yonso ya mukelenge bakadisangisha hamue, bakaluangana bua kusungilabo mioyo yabo, bakadi ne dikisha bua bena lukuna babo, ne bakashiha bena lukinu babo binunu makumi muanda mutekete ne bitanu; kadi kabakahaula bintu biabo.

¹⁷Bakenza bualu ebu mu dituku dia dikumi ne asatu dia ngondo wa Adâ; bakikisha mu dituku dia dikumi ne anai, bakasungula dituku adi bua kudiabo bidia bia disanka ne musangelu.

¹⁸Kadi Bena Yuda ba mu Shushana bakadisangisha hamue mu dituku dia dikumi ne asatu ne mu dituku dia dikumi ne anai kabidi; bakikisha mu dituku dia dikumi ne atanu, bakadisunguila dituku dia kudiabo bidia bia disanka ne musangelu.

¹⁹Nunku Bena Yuda bakadi bashikame mu misoko idi kayiyi ne ngumbu bakasungula dituku dia dikumi ne anai dia ngondo wa Adâ dituku dia kudiabo bidia bia disanka ne musangelu, ne dia kuhanganabo bintu.

²⁰Môdekai wakafunda malu â, wakatumina Bena Yuda bonso bakadi ku nseke yonso ya mukelenge Ahashawelosha mikanda, ne bakadi ha buihi ne ba kule,

²¹ya kubamanyisha ne, Bunudi nʼabu mbua kuvuluka dituku dia dikumi ne anai dia ngondo wa Adâ, ne dituku dia dikumi ne atanu dia ngondo au kabidi ku tshidimu ku tshidimu,

²²bu matuku akaheta Bena Yuda dikisha kudi bena lukuna babo ne bu ngondo wakakudimunabo kanyinganyinga kalua bu disanka, ne muadi ulua bu dituku dilengele; bajidile matuku â bu matuku a kudiabo bidia bia disanka ne musangelu ne bua kuhanganabo bintu ne bua kuhabo bahele bintu.

²³Bena Yuda bakakeba kuenza bu muakabangabo kuenza, ne bu muakadi Môdekai mubafundile;

²⁴bualu bua Hamana, muana wa Hamedata, Muena Agaga, muena lukuna wa Bena Yuda bonso, wakatungila Bena Yuda tshitungu bua kubabutuleye, wakadi wela Pû, eu nnshobo mene, bua kubashiha ne bua kubabutula;

²⁵kadi hakamanya mukelenge bualu ebu, yeye wakafundila mikanda bua kukudimuneye bualu bubi buakadiye musue kuenzela Bena Yuda ha mutu handi, ne yeye ne bana bandi balume bakowibua ku tshiowelu.

²⁶Nunku badi babikila matuku a ne, Pulima, bu mudi dina dia Pû, Nunku bua mei onso akatuabo mu mukanda eu, ne bua malu onso akatangilabo ku mesu ne bua malu onso akadi abakuata,

²⁷Bena Yuda bakahunga dî diabo bualu buabo ne bua bana babo baledibue ne bua bantu bonso bakalamata kudibo ne, Tuetu katuena tuhanga kuvuluka matuku â abidi bu muakafundabo, ne mu tshikondo tshiakasungulabo, ku tshidimu ku uhidimu;

²⁸netuvuluke matuku â ne netualame ku bikondo bionso kudi ba mu meku onso ne ba ku nseke yonso ne ba mu misoko yonso; matuku â a Pulima kaena mua kuhanga munkatshi mua Bena Yuda nansha kuvuluka kuau kudi tunkanunuina tuabo tshiendelele.

²⁹Hashishe Esetê mukelenge mukashi, muana wa Abihayila, ne Môdekai, Muena Yuda, bakafunda ne bukokeshi buonso bua kujadikabo mukanda eu muibidi bualu bua Pulima.

³⁰Bakatumina Bena Yuda bonso ba mu nseke ei lukama ne makumi abidi ne muanda mutekete ya mu bukelenge bua Ahashawelosha mikanda ya mei a ditalala ne a bushuwa,

³¹bua kujadika matuku â a Pulima mu bikondo biakasungulabo bu muakadi dî dia Môdekai, Muena Yuda, ne Esetê mukelenge mukashi, babelele mukenji, bu muakadibo badielela mukenji ne tunkanunuma tuabo, mu malu a kujila kua bia kudia ne muadi wabo.

³²Mukenji wa Esetê wakajadika malu â a Pulima; bakaufunda mu mukanda.