Read tshiluba Ekesode 11 Bible Online

Ekesode 11 - tshiluba bible

Ekesode 11

¹Yehowa wakambila Mose ne, Nentume mulau umue mukuabo kudi Palo ne ha buloba bua Ejipitu; ne ku nyima yeye neanulekele, hanulekeleye, yeye neanuihate tshiendelele.

²Wambile bantu mu matshu abo ne, Mulume yonso alombe muena mutumba nʼandi, ne mukashi yonso alombe mukashi muena mutumba nʼandi bilenga bia argent ne bilenga bia or.

³Yehowa wakaha bantu dikasa dimpe kudi Bena Ejipitu Muntu eu Mose wakadi muntu munene be mu buloba bua Ejipitu ne ku mesu kua bena mudimu ba Palô ne ku mesu kua bantu bandi.

⁴Mose wakamba ne, Yehowa udi wamba ne, Mundankulu meme nenye munkatshi mua Ejipitu;

⁵banʼa bute bonso ba mu buloba bua Ejipitu nebafue, ku muanʼa bute wa Palô udi ushikama ha nkuasa wandi wa bukelenge tô ne kudi muanʼa bute wa mukashi udi uhela manvua andi, banʼa bute ba bimuna bionso nebafue kabidi.

⁶Muadi mukole newikale mu buloba bua Ejipitu buonso; kakuena kuanze kuikala muadi bu eu, ne kawena wikalaku kabidi.

⁷Kadi nansha mbua kena mua kubululala umue wa Bena Isalele, nansha muntu nansha nyama, bua nuenu mumanye ne, Yehowa udi utahulula Bena Ejipitu ne Bena Isalele.

⁸Bantu bebe bonso nebalue kundi, nebankukuile, nebambe ne, Ya biebe ne bantu bonso badi balonda ku nyima kuebe, ne ku nyima kua bualu ebu nempatuke. Wakaluhuka kudi Palô ne tshiji tshikole.

⁹Yehowa wakambila Mose ne, Palô kena ukunvuila nansha, bualu bua kuvudisha malu anyi a kukema mu buloba bua Ejipitu.

¹⁰Mose ne Alona bakenza malu â onso a kukema ku mesu kua Palô, Yehowa wakakolesha mutshima wa Palô, yeye bakalekela Bena Isalele mu buloba buandi.